Mijimbu 2 11:1-23
11 Omu Lehovowame ahetele kuYelusalema, akungulwile vaka-jita vakuheta ku 180,000 vaze vanangula* vakuzuvo yaYuta naMbenjamine+ valwenga jita navaIsalele vosena mangana wangana ukinduluke kuli ikiye.+
2 Jino Yehova ahanjikile kuli kapolofweto kenyi* Shemaya+ ngwenyi:
3 “Hanjika kuli Lehovowame mwanaSolomone mwangana wavaYuta, nakuli vaIsalele vosena muYuta naMbenjamine, ngwove,
4 ‘Yehova nambe ngwenyi: “Kanda namuya nakuzungisa vandumbwenuko. Mutu himutu akinduluke kuzuvo yenyi mwomwo ami yami ngunalingisa chuma kana chisoloke.”’”+ Ngocho vosena vononokele mazu aYehova, kaha vakindulukile kumembo avo, kavazungishile Yelovowameko.
5 Lehovowame atwaminenga muYelusalema, kaha atungile jinganda jakukingiwa muYuta.
6 Atungile* Mbetelema,+ naEtame, naTekowa,+
7 naMbete-zule, naSoko,+ naAtulame,+
8 naNgata,+ naMalesha, naJifwe,+
9 naAtolaime, naLakishe,+ naAzeka,+
10 naZola, naAiyalone,+ naHevelone.+ Jinganda joseneji jajikembwe japwile muYuta naMbenjamine.
11 Kufumaho, Lehovowame akingile jinganda kana nakuhakamo tupitau twamaswalale, kaha avahanyinenga vyakulya, namaji, navinyo.
12 Mujinganda josena ahakilemo jikepwe jajinene, namakunga amanene. Jinganda kana ajikingile chikuma. Kaha Lehovowame atwalileho lika kuyula vaYuta navaMbenjamine.
13 Jino vapilishitu navaLevi vamuIsalele vosena vafumine kujingalila javo josena, vejile nakukundwiza Lehovowame.
14 VaLevi vasezele vipapa vyavo naluheto lwavo+ nakwiza muYuta namuYelusalema mwomwo vavahangile hamilimo yavo yaupilishitu yakuzachila Yehova.+ Vavahangile kuli Yelovowame navana venyi.
15 Yelovowame atongwele vapilishitu jenyi mangana vazachilenga havihela vyakulunduka,+ nakuzachila nawa vangombe+ navandemone vakufwana nge vapembe*+ vaze atengele.
16 Jino vatu vakumiyachi yavaIsalele vosena vaze vatondeletondelenga Yehova Kalunga kaIsalele namichima yavo yosena vakavangijile vapilishitu navaLevi kuYelusalema mangana vakahane Yehova Kalunga kavakakuluka javo vimuna vakuvatula.+
17 Vazamishile wangana waYuta nakukundwiza Lehovowame mwanaSolomone hamyaka yitatu. Hamyaka eyi vakavilenga jijila jaNdavichi naSolomone.
18 Jino Lehovowame ambachile Mahalate mwanaYelimote, Yelimote mwanaNdavichi. Naye yaMahalate apwile mwanaAvihayile, Avihayile mwanaElyave, Elyave+ mwanaYese.
19 Kutwala muze, Mahalate asemene vana vamalunga. Asemene Yeushe, naShemaliya, naZahame.
20 Kufumaho Lehovowame ambachile Maka muzukulu lyaAvasalome.+ Kutwala muze, Maka asemene Aviya,+ naAtai, naJiza, naShelomite.
21 Lehovowame azangile chikuma Maka muzukulu lyaAvasalome kuhambakana mapwevo jenyi natulumbu twenyi twamasano+ vosena. Ambachile mapwevo 18 natulumbu twamasano 60, kaha asemene vana vamalunga 28 navana vamapwevo 60.
22 Jino Lehovowame atongwele Aviya mwanaMaka kupwa mwata kaha nawa twamina wavandumbwenyi mwomwo ajinyine kumutongola apwenga mwangana.
23 Lehovowame alingile vyuma mukunangakana nakutwala* vana venyi vamwe vamalunga kujingalila josena javaYuta navaMbenjamine, kujinganda jakukingiwa josena.+ Avahanyinenga vyakulya vyavivulu nakuvambachila mapwevo vavavulu.
Kwinyikila Chamwishi
^ Hepe., “vaze vasakula.”
^ Hepe., “mutu waKalunga wamuchano.”
^ Chipwe “Atungile kembwe.”
^ Hepe., “vangombe navapembe.”
^ Chipwe “nakusanda.”
