Mijimbu 2 12:1-16
12 Omu wangana waLehovowame wazamine, nomu Lehovowame apwile jino nangolo,+ asezele Jishimbi jaYehova.+ NavaIsalele vosena vamukavangijile nakuseza jishimbi jaKalunga.
2 Jino kuheta mumwaka wamuchitanu wachiyulo chaMwangana Lehovowame, Shishake+ mwangana waEjipitu alukukile nganda yaYelusalema, mwomwo vatu vamunganda kana kavapwile vakushishika kuli Yehovako.
3 Shishake ejile namatemba 1,200, navaka-kutambukila hatuvalu 60,000, namaswalale vavavulu chikuma kufuma kuEjipitu. Ava vatu vapwile vaLivya, navaSukime, navaEchopa.+
4 Shishake atambwile jinganda jakukingiwa jamuYuta. Kutwala muze, ahetele nakuYelusalema.
5 Jino kapolofweto Shemaya+ ejile kuli Lehovowame navilolo javaYuta vaze vakungulukile muYelusalema hakuchina Shishake. Ambile kuli vakiko ngwenyi: “Yehova nambe ngwenyi, ‘Munanguseze,+ shikaho ngunamihane mumavoko aShishake.’”
6 Ngocho vilolo javaIsalele namwangana valinyishile+ kumeso aKalunga, vambile ngwavo: “Yehova apwa wakwoloka.”
7 Omu Yehova amwene ngwenyi vanalinyisa kumeso enyi, Yehova ambile kuli Shemaya ngwenyi: “Hakuwana nge vanalinyisa kumeso ami, shikaho kangweshi kuvanongesako.+ Nanguvapululula kalinwaha. Kangweshi kusolwela Yelusalema utenu wami kuhichila muli Shishakeko.
8 Chipwe ngocho, navapwanga vangamba jenyi mangana vatachikize chihandwa chatwama hakunguzachila ami nakuzachila vamyangana* vakumafuchi eka.”
9 Ngocho Shishake mwangana waEjipitu alukukile nganda yaYelusalema. Kaha ambachile vikumba vyamuzuvo yaYehova,+ navize vyamuzuvo* yamwangana. Ambachile vyosena, kuhakilako najikepwe jaulu josena jize atengele Solomone.+
10 Jino Mwangana Lehovowame atengele jikepwe jeka jaunengu, kaha ajihanyine mumavoko avakulwane javaka-kulama* vaze valaminenga kuchikolo chazuvo yamwangana.
11 Omu mwangana ejilenga kuzuvo yaYehova, vaze vaka-kulama vajimbachilenga, kaha vajikindulwishilenga cheka kukapete kavaka-kulama.
12 Hakuwana nge Lehovowame alinyishile, Yehova apewile utenu wenyi hali ikiye,+ ngocho kanongesele nganda yosenako.+ Kaha nawa muYuta mwapwile vatu vamwe vavilinga vyamwaza.+
13 Mwangana Lehovowame azamishile wangana wenyi muYelusalema, kaha atwalileho lika kuyula. Jino Lehovowame apwile namyaka yakusemuka 41 omu aputukile kuyula, kaha ayulile myaka 17 muYelusalema, nganda yize Yehova asakwile kumiyachi yavaIsalele yosena mangana vayivulukilenga lijina lyenyi. Lijina lyanaye apwile ikiye Nama, kaAmone.+
14 Oloze Lehovowame alingilenga vyuma vyavipi, mwomwo kafwililile kutondatonda Yehova+ namuchima wenyi wosenako.
15 Mujimbu waLehovowame wavyuma alingile kufuma kukuputuka swi nakumakumishilo watwama mumijimbu yavisaka yakapolofweto Shemaya+ naIto+ muka-kumona vyakumwenesa. Lehovowame naYelovowame+ valizungishilenga lwola lwosena.
16 Kutwala muze, Lehovowame atokele ngana mwavakakuluka jenyi, kaha vamufunjile muNganda yaNdavichi.+ Kaha mwanenyi Aviya+ aswanyine hawangana.