Mijimbu 2 13:1-22
13 Aviya aputukile kuyula vaYuta+ mumwaka wakusokesa 18 wachiyulo chaMwangana Yelovowame.
2 Ayulile myaka yitatu muYelusalema. Lijina lyanaye apwile ikiye Mikaya+ mwanaUliyele wakuNgiveya.+ Aviya naYelovowame+ valizungishilenga.
3 Ngocho Aviya ayile nalizavu lyamaswalale jenyi vangolo 400,000 vaze vanangula* mangana akalwe jita+ naYelovowame. Kaha Yelovowame navatu jenyi vaka-kwasa jita vangolo 800,000 vaze vanangula* navakiko valitanjikile mumazavu akulongesa kanawa mangana valwenga jita naAviya.
4 Jino Aviya emanyine haPili yaZemalaime yize yatwama mungalila yajipili yaEfwalime, ambile ngwenyi: “Ove Yelovowame nayenu vaIsalele muvosena, ngwivwililenu.
5 Uno kamwatachikiza ngwenu Yehova Kalunga kaIsalele alikashile chivwasano chamungwa*+ naNdavichi chakuhana wangana kuli ikiye navana venyi+ mangana vayulenga vaIsalele haya myaka yosenako numba?+
6 Oloze Yelovowame+ mwanaNevate, Nevate ngamba yaSolomone mwanaNdavichi, alikangile kuli mwata wenyi.+
7 Jino malunga vamokomoko, vatuvihu vejilenga kuli Yelovowame nakumukundwiza. Valikangile kuli Lehovowame mwanaSolomone mwomwo apwile kanyike kaha nawa wawoma, ngocho kahashile kuvafungululako.
8 “Enu muli nakushinganyeka ngwenu munahase kwimanyina nakole wangana waYehova uze uli mumavoko avana vaNdavichi, mwomwo lizavu lyenu linapu lyalinene, kaha nawa muli navana vavangombe vaulu vaze amitengelele Yelovowame kupwa tulunga twenu.+
9 Talenu, enu munahange vapilishitu jaYehova,+ vaka-tanga yaAlone, navaLevi, kaha munatongola vapilishitu jenu nge omu valinga vaka-mafuchi eka.+ Weshowo mutu naminehelanga mwanangombe wakuji navizamba jamikoko 7 munamutongolanga kupwa kapilishitu katuponya vaze kavapwa tulungako.
10 Oloze etu kwetu, Yehova ikiye Kalunga ketu,+ kaha katwamusezeleko. Vapilishitu jetu, vaka-tanga yaAlone vali nakuzachila Yehova, kaha vaLevi nawa vali nakuvakafwa kuzata milimo.
11 Vali nakulumbanga mawana akulumba mangana akakumuke wishi kuli Yehova chimene hichimene nachingoloshi hichingoloshi.+ Vali nakuwalumbilanga kumwe navyuma vyalivumba lyamwaza.+ Jimbolo jakulumbika*+ nawa vali nakujihakanga hamesa yaulu wakutomesa, kaha vali nakumunyikanga manongo hachitumbikilo chamanongo chaulu+ chingoloshi hichingoloshi.+ Etu tuli nakuzakama milimo yetu atuhana Yehova Kalunga ketu, oloze enu munamuseze.
12 Shikaho talenu! Kalunga wamuchano ali nayetu, kaha ali nakututwaminyina navapilishitu jenyi najineta jakuvilikisa luvila lwakulwa jita nayenu. Ngocho enu vaIsalele, kanda namuzunga naYehova Kalunga kavakakuluka jenuko, mwomwo kamweshi kufukilako.”+
13 Oloze Yelovowame atumine vatu jenyi vamwe vanyengumuke mangana vejilile vaYuta kunyima. Ngocho Yelovowame navatu jenyi vamwe vapwile kulutwe lwavaYuta, kaha vatu jenyi vakwavo vapwile kunyima yavaYuta.
14 Omu vaYuta vatalile kunyima, vamwene kuli vaka-kole javo, kulutwe nawa kuli vaka-kole javo. Ngocho vatetele kuli Yehova+ oku vapilishitu vali nakwimba jineta.
15 Jino vaYuta vavilikile luvila lwajita. Kahomu vavilikile luvila kana, Kalunga wamuchano afungulwile Yelovowame navaIsalele vosena kumeso aAviya navaYuta.
16 Ngocho vaIsalele vachinyine kumeso avaYuta, kaha Kalunga avahanyine mumavoko avo.
17 Aviya navatu jenyi vajihile vaIsalele vavavulu chikuma. Vaka-kwasa jita vavaIsalele vaze vafwile vapwile 500,000.
18 Shikaho vaIsalele vavenyishile halikumbi lize, oloze vaYuta vafungulwile jita mwomwo vapendaminyine hali Yehova Kalunga kavakakuluka javo.+
19 Jino Aviya ahangasanyine lika Yelovowame, kaha amutambwile jinganda. Amutambwile Mbetele+ najimbongi jajingilikileko, naYeshana najimbongi jajingilikileko, naEfwelone+ najimbongi jajingilikileko.
20 Yelovowame kapwile cheka nangolo hamakumbi aAviyako. Kutwala muze, Yehova avetele Yelovowame, kaha afwile.+
21 Oloze Aviya akwachilenga lika ngolo. Kutwala muze ambachile mapwevo 14,+ kaha asemene vana vamalunga 22 navana vamapwevo 16.
22 Mujimbu wavyuma alingile Aviya navize ahanjikile vyatwama mumijimbu* yakapolofweto Ito.+
Kwinyikila Chamwishi
^ Hepe., “vasakula.”
^ Hepe., “vasakula.”
^ Kulumbununa, chivwasano chamyaka namyaka chize kachalumukako.
^ Kulumbununa, jimbolo jakuhana Kalunga.
^ Chipwe “mumukanda.”
