Mijimbu 2 14:1-15
14 Jino Aviya atokele ngana mwavakakuluka jenyi, kaha vamufunjile muNganda yaNdavichi.+ Mwanenyi Asa aswanyine hawangana. Hamakumbi enyi, mulifuchi lyosena mwapwile kuunda hamyaka 10.
2 Asa alingilenga vyuma vyamwaza, vyakwoloka kumeso aYehova Kalunga kenyi.
3 Afumishile majiko akulumbila atulunga veka,+ navihela vyakulunduka. Apuzwile nawa jipanda jajila jamalolwa,+ nakuteta jipanda jajila jamitondo.*+
4 Kufumaho, alwezele vaYuta vatondetonde Yehova Kalunga kavakakuluka javo nakulama Jishimbi jenyi.
5 Kaha afumishile vihela vyakulunduka navitumbikilo vyavyuma vyalivumba lyamwaza+ mujinganda jaYuta josena. Muwangana wenyi mwapwilenga lika kuunda.
6 Asa atungile jinganda jakukingiwa muYuta+ mwomwo mulifuchi mwapwile kuunda. Hamyaka yoseneyi, kavamuzungishilengako mwomwo Yehova amulingishile atwame mukuunda chakuzeneka kumuzungisa kuli vaka-kole jenyi.+
7 Ngocho ambile kuli vaYuta ngwenyi: “Tutungenu eji jinganda nakujijingulwisa jikembwe natuposhi,+ nakuhakako vikolo* natupachiso. Lifuchi lyosena lichili lyetu mwomwo tunatondotondo Yehova Kalunga ketu. Tunamutondotondo, kaha natulingisa tutwame mukuunda chakuzeneka kutuzungisa kuli vaka-kole jetu vaze vanatujingilika.” Shikaho, mulimo wavo wakutunga wafukililile.+
8 Asa apwile nalizavu lyamaswalale vakuheta ku 300,000 vamuYuta vaze vapwile najikepwe jajinene namakunga. Apwile nawa navaka-kwasa jita vangolo 280,000 vavaMbenjamine vaze vapwile namikingo* namata amanana.+
9 Kutwala muze, Zela uze apwile kaEchopa ejile nalizavu lyenyi lyamaswalale 1,000,000 namatemba 300 mangana alwenga navo jita.+ Omu ahetele kuMalesha,+
10 Asa ayile akalwe nenyi jita, kaha valitanjikile mumazavu akulongesa kanawa muChinema chaZefwata kuMalesha.
11 Jino Asa alombele kuli Yehova Kalunga kenyi+ ngwenyi: “Ove Yehova, ove weji kukafwanga vatu, numba vapwa vavavulu, numba vapwa vakuzeneka ngolo.+ Shikaho ove Yehova Kalunga ketu, tukafwe mwomwo tunapendamina hali ove,+ kaha nawa tuneza nakulwa nalizavu eli mulijina lyove.+ Ove Yehova, ove wapwa uKalunga ketu. Kanda nawechelela mutu akufungululeko.”+
12 Shikaho Yehova afungulwile vaze vaEchopa kumeso aAsa navaYuta, kaha vaEchopa vachinyine.+
13 Asa navatu jenyi vahangasanyine vaEchopa swi nakuNgelale.+ VaEchopa vafwile, naumwe wauchi asalileho. Vavanongesele kuli Yehova namaswalale jenyi. Kaha Asa navatu jenyi vambachile vyuma vyakupupa vyavivulu chikuma.
14 Vanongesele nawa jinganda jajingilikile kuNgelale josena, mwomwo Yehova azuzwishile vatu vamujinganda kana nawoma. Mujinganda kana mwapwile vyuma vyavivulu chikuma, ngocho vajipupile josena.
15 Valukukile nawa jimbalaka javaze vafungilenga vimuna, kaha vavatambwile mikoko navangamela vavavulu. Kufumaho, vakindulukile kuYelusalema.
Kwinyikila Chamwishi
^ Tala Mukana waMazu.
^ Hepe., “vikolo vyamapito avali.”
^ Jikepwe jajindende jize vambachilenga vaka-kwasa mata amanana.
