Mijimbu 2 15:1-19
-
Vyuma alingile Asa (1-19)
15 Jino shipilitu yaKalunga yejile hali Azaliya mwanaOtete.
2 Ngocho ayile kuli Asa, kaha ambile kuli ikiye ngwenyi: “Ove Asa nayenu vaYuta navaMbenjamine muvosena, ngwivwililenu. Yehova mwapwanga nayenu kachi nge nayenu nawa namupwanga lika naikiye.+ Kachi nge namumutondatonda, kaha namumuwana.+ Oloze nge namumuseza, kaha naikiye mwamiseza.+
3 VaIsalele vatwaminenga chakuzeneka Kalunga wamuchano, nakapilishitu wakuvanangula, najishimbi+ halwola lwalusuku.*
4 Oloze omu vakindulukile kuli Yehova Kalunga kaIsalele nakumutondatonda mwomwo yakumona vihuli, vamuwanyine.+
5 Halwola luze, vatu vosena vatambukilenga nachiwomawoma,* mwomwo mulifuchi lyosena mwapwilenga pindangano.
6 Lifuchi limwe lyanongeselenga lifuchi likwavo, kaha nganda yimwe yanongeselenga nganda yikwavo mwomwo Kalunga anehele chimbalanganyi muli vakiko navihuli vyakulisezaseza.+
7 Oloze enu jikizenu, kanda namulizuzukilako,*+ mwomwo navakamifweta hamilimo yenu.”
8 Omu Asa evwile mazu awa naupolofweto wakapolofweto Otete, omikile nakufumisa makombelo osena aunyengwe mulifuchi lyaYuta+ naMbenjamine, namujinganda jize atambwile kungalila yajipili yaEfwalime. Kaha awahishile lijiko lyakulumbila lyaYehova lize lyapwile kulutwe lwasenge yazuvo yaYehova.+
9 Kufumaho Asa akungulwile vaYuta navaMbenjamine vosena, navamwiza vavavulu vaze vafumine kumuyachi waEfwalime, naManase, naShimeyone.+ Vamwiza kana vachinyinyine kuli Asa kufuma kuli vaIsalele omu vamwene ngwavo Yehova Kalunga kenyi apwile naikiye.
10 Valikungulwilile kuYelusalema mukakweji wamuchitatu mumwaka wakusokesa 15 wachiyulo chaAsa.
11 Halikumbi kana, vahanyine Yehova vimuna vakuvatula vakufuma kuvyuma vyakupupa vize vanehele. Vahanyine vangombe 700 namikoko 7,000.
12 Kufumaho, valikashile chivwasano chakutondatonda Yehova Kalunga kavakakuluka javo namichima yavo yosena namyono* yavo yosena.+
13 Weshowo akanyine kutondatonda Yehova Kalunga kaIsalele vatelele kumujiha, numba apwa wamokomoko numba wamulemu, lunga chipwe pwevo.+
14 Ngocho valishingile lushingo kuli Yehova nalizu lyakukanguka, oku vali nakulikuwa nakwimba jineta najimbinga.
15 Kaha vaYuta vosena vawahililile hakulishinga lushingo kana, mwomwo valishingilelwo namichima yavo yosena, kaha nawa vatondeletondelenga Kalunga namichima yavo yosena, ngocho vamuwanyine.+ Shikaho, Yehova avalingishile vatwame mukuunda chakuzeneka kuvazungisa kuli vaka-kole javo vaze vavajingilikile.+
16 Mwangana Asa afumishile nawa kaka yenyi wapwevo Maka+ hachihela chenyi vamuvulukilenga ngwavo naye yamwangana, mwomwo atengele kaponya waunyengwe wakuzachisa hakulemesa panda yajila yamutondo.*+ Asa atetele uze kaponya wakaka yenyi nakumupazwojola, kaha amwochelele kuChinema chaKichilone.+
17 Oloze kafumishile+ vihela vyakulunduka muIsaleleko.+ Chipwe ngocho, Asa azachilile Kalunga namuchima wenyi wosena hamakumbi akuyoya chenyi osena.+
18 Kaha vyuma vize ajilikile ikiye naise vyakufwana nge palata, naulu, navinoma+ vyakulisezaseza avinehele muzuvo yaKalunga wamuchano.
19 Kakwapwile jitako palanga namumwaka wakusokesa 35 wachiyulo chaAsa.+
Kwinyikila Chamwishi
^ Hepe., “hamakumbi amavulu.”
^ Hepe., “kakwapwile kuunda kuli ou alovokelenga chipwe kuli ou engililengako.”
^ Hepe., “kanda namuzeula mavoko enuko.”
^ Tala Mukana waMazu.
^ Tala Mukana waMazu.
