Mijimbu 2 16:1-14
16 Mumwaka wakusokesa 36 wachiyulo chaAsa, mwangana wavaIsalele Mbasha+ anyemukilile vaYuta, kaha aputukile kutunga* nganda yaLama+ mangana vatu vazeneke kulovoka chipwe kwingila munganda yaAsa mwangana wavaYuta.+
2 Jino Asa ambachile palata, naulu havikumba vyamuzuvo yaYehova,+ nahavikumba vyamuzuvo* yamwangana, avitumine kuli Mbene-hatate mwangana waSulya+ uze atwaminenga kuNdamashiku. Asa ambile ngwenyi:
3 “Ami nayove twalikasa chivwasano* ngana chize alikashile tata naiso. Ngocho ngunakutumina palata naulu. Yako uhokole chivwasano* chize walikashile naMbasha mwangana wavaIsalele mangana alitwamine kungunyemukila.”
4 Ngocho Mbene-hatate evwililile vyuma ahanjikile Mwangana Asa, kaha atumine tupitau twamaswalale jenyi vakalukuke jinganda javaIsalele. Kaha valukukile Iyone,+ naNdane,+ naAvele-maime, navihela vyakulamina vikumba vyosena vyamujinganda jaNafwatale.+
5 Omu Mbasha evwile mujimbu kana, hahaze vene alitwaminyine kutunga* Lama, echele mulimo apwile nakuzata.
6 Jino Mwangana Asa ayile navaYuta vosena nakumbata malolwa navitondo vize Mbasha asakile kutungisa+ Lama.+ Kaha Mwangana Asa avitungishile* Ngeva+ naMijipa.+
7 Halwola kana, Hananyi+ muka-kumona vyakulutwe ejile kuli Asa mwangana wavaYuta. Ambile kuli ikiye ngwenyi: “Hakuwana nge kawafwelelanga* muli Yehova Kalunga koveko, oloze wafwelelanga* muli mwangana waSulya, ngocho maswalale jamwangana waSulya vanakuchinyi.+
8 Maswalale vavaEchopa navaLivya vapwile vavavulu chikuma, kaha nawa vapwile namatemba amavulu navaka-kutambukila hatuvalu vavavulu. Oloze Yehova akuhanyinevo mumavoko ove mwomwo wamufwelelele.+
9 Yehova eji kutalatalanga hamavu hosena+ mangana asolole ngolo jenyi jakukafwa vaze veji kumuzachilanga namuchima wavo wosena.+ Oloze ove unalingi vyuma vyauleya. Shikaho kufuma vene oholili navakuzungisanga lika.”+
10 Oloze Asa akwachilile utenu Hananyi muka-kumona vyakulutwe mwomwo yavyuma ahanjikile. Ngocho amuhakile mukamenga* mwomwo amupihishile kumuchima. Kufuma vene haze, Asa aputukile kuyanjisa navatu veka.
11 Mujimbu waAsa wavyuma alingile kufuma kukuputuka swi nakumakumishilo vausoneka muMukanda waVamyangana javaYuta navaIsalele.+
12 Jino Asa aputukile kuviza musongo wamahinji mumwaka wakusokesa 39 wachiyulo chenyi, kaha musongo kana watohwele chikuma. Asa katondeletondele Yehova amukafweko numba vene halwola kanelu lwamisongo yenyi. Oloze ayile kuli vimbuke vamukafwe.
13 Asa atokele ngana mwavakakuluka jenyi.+ Afwile mumwaka wakusokesa 41 wachiyulo chenyi.
14 Ngocho vamufunjile muchimbumbe chenyi chachinene chize alifulilile ivene muNganda yaNdavichi.+ Vamusavalikile hamusela uze vahakile maji ambalasamu namaji eka akulipwila alivumba lyamwaza akuyenga kuvyuma vyakulisezaseza.+ Kaha nawa vamuhanyine kavumbi hakuwika kakahya kakanene.*
Kwinyikila Chamwishi
^ Chipwe “kutunga kembwe; kutungulula.”
^ Chipwe “vyamunganda.”
^ Chipwe “lushiko.”
^ Chipwe “twalishika lushiko.”
^ Chipwe “kutunga kembwe; kutungulula.”
^ Chipwe “avitungishile kembwe; avizachishile hakutungulula.”
^ Hepe., “kawapendaminanga.”
^ Hepe., “wapendaminanga.”
^ Hepe., “muzuvo yajikuli.”
^ Chasoloka nge kavalumbile Asako, oloze vochele vyuma vyalivumba lyamwaza.
