Mijimbu 2 19:1-11
19 Yehoshafwate mwangana wavaYuta akindulukile wamutonyi*+ kuzuvo* yenyi kuYelusalema.
2 Jino Yehu+ mwanaHananyi+ muka-kumona vyakumwenesa ayile kuli Mwangana Yehoshafwate, kaha ambile kuli ikiye ngwenyi: “Uno chinapu chakutamo kuli ove kukafwa vaka-kuhuka+ chipwe kuzanga vaze vahunga Yehova nyi?+ Hakuwana nge unalingi chuma kanechi, ngocho Yehova nakukwachila utenu.
3 Chipwe ngocho, kuli vyuma vimwe vyamwaza vize unalingi.+ Unafumisa jipanda jajila jamitondo* mulifuchi, kaha nawa unalizange mumuchima* wove nakutondatonda Kalunga wamuchano.”+
4 Yehoshafwate atwaminenga lika muYelusalema. Kaha atambukilile cheka vatu kufuma kuMbele-sheva swi nakungalila yajipili yaEfwalime,+ mangana avakindulwise kuli Yehova Kalunga kavakakuluka javo.+
5 Atongwele nawa vaka-kuyula mulifuchi lyosena, mujinganda jamuYuta josena jakujingulwisa jikembwe.+
6 Ambile kuli vaka-kuyula ngwenyi: “Hakenu mangana kuvyuma muli nakulinga, mwomwo kamweshi nakuyulila vatuko, oloze muli nakuyulila Yehova. Kaha ikiye ali nayenu omu muli nakuyula.+
7 Shikaho, ivwenu Yehova woma.+ Lilamenu omu namuzata milimo yenu, mwomwo Yehova Kalunga ketu keshi kuhengesa chiyulo,+ chipwe kutala vatu kumeso,+ chipwe kutambula maswekezako.”+
8 Yehoshafwate atongwele nawa vaLevi vamwe, navapilishitu vamwe, navatwamina vamwe vakujizuvo javakakuluka javaIsalele muYelusalema mangana vayulilengako Yehova nakusopa milonga yavatu vamuYelusalema.+
9 Kaha avalwezele ngwenyi: “Omu mukiko namulinganga mwomwo yakumwivwa Yehova woma, nakashishi, namichima yenu yosena:
10 Kachi nge vandumbwenu vaze vali nakutwama mujinganda javo navaneha chihande chakumwanga manyinga,+ chipwe nge naveza nakuhulisa hajishimbi, chipwe hajindongi, chipwe hamazu akuyula, kaha enu mwatela kuvahuhumuna mangana vazeneke kupwa namulonga kumeso aYehova. Mokomoko Kalunga mwamikwachila utenu navandumbwenu. Omu mukiko namulinganga mangana muzeneke kupwa namulonga.
11 Talenu, kapilishitu wamukulwane Amaliya ikiye mwamitwaminyinanga muvyuma vyaYehova+ vyosena. Zevachiya mwanaIshimele ikiye mwatwaminyinanga vaze vakuzuvo yaYuta muvyuma vyakupandama kuli mwangana. VaLevi vakiko navapwanga vakulwane jenu. Jikizenu nakuzata kanawa milimo yenu. Yehova apwenganga navaze veji kulinganga vyuma vyamwaza.”+
Kwinyikila Chamwishi
^ Chipwe “mukuunda.”
^ Chipwe “kunganda.”
^ Tala Mukana waMazu.
^ Chipwe “unalikase mumuchima.”
