Mijimbu 2 2:1-18
-
Kuwahisa mulimo wakutunga tembele (1-18)
2 Jino Solomone alwezele vatu vatunge zuvo yize navavulukilanga lijina lyaYehova+ nazuvo* yenyi yawangana.+
2 Solomone asonekele malunga 80,000 vapwenga vaka-kusonga malolwa kujipili, namalunga 70,000 vazatenga milimo yeka,*+ namalunga 3,600 vapwenga tulama vavaka-kuzata milimo.+
3 Kufumaho, Solomone atumine mazu kuli Hilame+ mwangana waTule ngwenyi: “Ngukafweko nge muze wakafwile tata Ndavichi uze watuminyine vitondo vyamushitale mangana atungise zuvo* yenyi.+
4 Ami nguli nakutunga zuvo navavulukilanga lijina lyaYehova Kalunga kami mangana ngukamujilikileyo yikapwe yenyi. Muzuvo kana mukiko nawa nangukamulumbilanga vyuma vyalivumba lyamwaza,+ nakuhakanga jimbolo+ jakulumbika* lwola lwosena, nakuhanyinamo mawana akulumba chimene nachingoloshi,+ nahajiSambata,+ nahakumweka chakakweji,+ nahaviwanyino+ vyaYehova Kalunga ketu. Elu lwapwa lushimbi lwamyaka namyaka luze veji kukavangizanga vaIsalele.
5 Zuvo nguli nakutunga nayipwa yayinene, mwomwo Kalunga ketu apwa wamunene chikuma kuhambakana tulunga veka vosena.
6 Kaha iyaze mwahasa kumutungila zuvo? Kachi nge melu amukehela,+ kaha ami yami iyaze numba ngumutungile zuvo atwamengamo? Nangumutungila kaha zuvo yakulumbilamo vimuna vakuvatula mangana vakakumukenga wishi kumeso enyi.
7 Shikaho ngutumineko chitotombwe umwe uze apwa kuluwa kumilimo yakufula ulu, napalata, naunengu,+ nafwelu, nakutunga wanda waungonyi, nawou uchila, nawou ulauluka, uze nawa atachikiza kusona. Mweza nakuzata navitotombwe jami vaze vapwa vakuluwa vamuYuta namuYelusalema, vaze nanguhane tata Ndavichi.+
8 Ngutumineko vitondo vyamishitale, navitondo vyaminjunyipe,+ navitondo vyamalamunge+ vyakuLevanone, mwomwo ngwatachikiza ngwami vangamba jove vatachikiza kanawa kuteta mitondo yakuLevanone.+ Vangamba jami navazachila hamwe navangamba jove+
9 mangana vanguwahishile vitondo vyavivulu, mwomwo zuvo yize nangutunga nayipwa yayinene chikuma.
10 Jino ami nangutuma vyakulya vyavangamba jove+ vaze navatetanga mitondo. Nangutuma tiliku yakuheta mujikole* 20,000, nambale yakuheta mujikole 20,000, navinyo vyakuheta mujimbate* 20,000, namaji akuheta mujimbate 20,000.”
11 Kaha Hilame mwangana waTule asonekele mazu kuli Solomone ngwenyi: “Yehova azanga vatu jenyi, shikaho nakutongwela upwenga umwangana wavo.”
12 Hilame ambile cheka ngwenyi: “Vamwalise Yehova Kalunga kaIsalele uze atengele melu namavu, mwomwo nahane Mwangana Ndavichi mwana wamangana,+ wakuzangama, kaha nawa wakunangakana,+ uze mwatungila Yehova zuvo nakulitungila nawa ivene zuvo yawangana wenyi.
13 Shikaho nangutuma Hilame-avi, chitotombwe uze apwa kuluwa, kaha nawa wakunangakana.+
14 Naye yaHilame-avi apwa wakumuyachi waNdane, oloze ise apwile wakuTule. Hilame-avi atwama nauhashi wakufula ulu, napalata, naunengu, nafwelu, nakusonga malolwa, namaliva. Atwama nawa nauhashi wakutunga wanda waungonyi, nawou ulauluka, nawou uchila,+ namahina amwaza. Nahase kusona mujijila jakulisezaseza nakutunga vyeshovyo vyuma navamulweza.+ Mwazachilanga hamwe navitotombwe jove vaze vapwa vakuluwa navitotombwe jaiso Ndavichi mwata wami vaze vapwa vakuluwa.
15 Ove mwata wami, tutumine etu vangamba jove tiliku, nambale, namaji, navinyo vize unatushiki.+
16 Etu natuteta mitondo kuLevanone+ yeshoyo nausaka, kaha natukukashilayo mikuta nakuyihaka hameya mangana tukuneheleyo kuNjopa.+ Kahove nauyimbata nakuyineha kuYelusalema.”+
17 Ngocho Solomone alavile malunga vosena vaze vapwile vamwiza mulifuchi lyaIsalele,+ kaha vapwile 153,600. Ava malunga avalavile kufuma halwola luze avalavile ise Ndavichi.+
18 Solomone asakwileho malunga 80,000 vapwenga vaka-kusonga malolwa+ kujipili, namalunga 70,000 vazatenga milimo yeka,* namalunga 3,600 vapwenga tulama vakutala vatu vaze vazachilenga milimo.+
Kwinyikila Chamwishi
^ Chipwe “nanganda.”
^ Chipwe “vapwenga vaka-kumbata viteli.”
^ Chipwe “nganda.”
^ Kulumbununa, jimbolo jakuhana Kalunga.
^ Kole yimwe yapwile jilita 220. Tala Chihande B14.
^ Mbate yimwe yapwile jilita 22. Tala Chihande B14.
^ Chipwe “vapwenga vaka-kumbata viteli.”
