Mijimbu 2 20:1-37
20 Kutwala muze, vaMowave,+ navaAmone,+ navaAmonyime* vamwe vejile nakulwa jita naYehoshafwate.
2 Ngocho Yehoshafwate vamulwezele ngwavo: “Kujingalila jakukalungalwiji,* kuEtome+ kunafumu lizavu lyalinene lize linakukatukila. Lizavu kana lili kuHazazone-tamale, kuEne-ngechi.”+
3 Ngocho Yehoshafwate evwile woma chikuma, kaha atondatondele Yehova.+ Avilikile lwola lwakulijilika kulya kuvatu vosena muYuta.
4 Kutwala muze, vaYuta valikungulwilile hamwe mangana vehule Yehova.+ Vafumine kujinganda jamuYuta josena mangana vehule Yehova.
5 Jino Yehoshafwate emanyine mukachi kalizavu lyavatu vamuYuta namuYelusalema, kuzuvo yaYehova, kulutwe lwachipango chachihya,
6 ambile ngwenyi:
“Ove Yehova Kalunga kavakakuluka jetu, ove yove Kalunga watwama mwilu,+ ove yove ukwechi wata hamawangana avaka-mafuchi osena.+ Ove ukwechi ngolo chikuma, kaha kakweshi mutu nahase kukwimanyina nakoleko.+
7 Ove Kalunga ketu, wahangile vatu vaze vatwaminenga mulifuchi lino mangana vafume kumeso avatu jove vaIsalele. Kaha lifuchi lino walihanyine vana* vasepa lyove Apalahama+ mangana lipwenga luheto lwavo lwahaya myaka yosena.
8 Vatwaminenga mulifuchi lino, kaha vakutungililile chihela chajila chize vavulukililenga lijina lyove.+ Vambile ngwavo,
9 ‘Kachi nge lupi lunatuwane, numba lupwa poko yamukwale, chipwe kutuzangamisa, chipwe musongo wachihita, chipwe zala yakalombolombo, kaha hinatwimana kuzuvo yino nakumeso ove (hakuwana nge zuvo yino yikiko navavulukilanga lijina lyove)+ nakuteta kuli ove mangana utukafwe muvihuli vyetu, kahove wivwilile nakutulwila.’+
10 Jino tala vyuma vali nakulinga vaAmone, navaMowave navatu vakungalila yajipili yaSeile+ vaze wambile ngwove kanda navavalukukako omu vaIsalele valovokele mulifuchi lyaEjipitu. VaIsalele vapeukile vatu kana, kaha kavavanongeseleko.+
11 Oloze vakiko vali nakutulinga mwamupi hakwiza vatuhange mulifuchi lize lyapwa luheto lwove watuhanyine kupwa uswana wetu.+
12 Ove Kalunga ketu, vazangamise.+ Etu katweshi nangolo jakulwa nalyeli lizavu lyalinene linatunyemukilako. Etu katwatachikijile mwakulingilako,+ oloze tunatale kuli ove.”+
13 Halwola kanelu, vaYuta vosena, navana vavo vavandende navava vakukola, namapwevo javo vemanyine kumeso aYehova.
14 Jino shipilitu yaYehova yejile hali Yahajele, kaLevi muka-tanga yaAsafwe uze apwile halizavu. Yahajele apwile mwanaZekaliya, Zekaliya mwanaMbenaya, Mbenaya mwanaYeyele, Yeyele mwanaMatanyiya.
15 Yahajele ambile ngwenyi: “Ivwililenu enu vaYuta muvosena, nayenu vatu vamuYelusalema, nayove mwangana Yehoshafwate! Yehova nambe kuli enu ngwenyi, ‘Kanda namwivwa woma chipwe kulizuzukila mwomwo yalyeli lizavu lyalineneko. Keshi yenu namulwa eyi jitako, oloze Kalunga ikiye mwalwa jita kana.+
16 Hamene mukaye mukalihumangane navo. Vakiko navakejilila kujila yaJize, kaha namukavawanyina kusongo yachinema* shimbu kanda muhete kupambo yaYelwele.
17 Enu kamweshi kulwa jita kaneyiko. Imanenu muvihela vyenu, imanenu ndundulu+ mangana mumone omu Yehova mwamilwila.*+ Enu vatu vamuYuta namuYelusalema, kanda namwivwa woma chipwe kulizuzukilako.+ Hamene mukaye mukalihumangane navo, mwomwo Yehova mwapwa nayenu.’”+
18 Hahaze vene, Yehoshafwate afukamine chameso hamavu nakulifukula, kaha vatu vamuYuta namuYelusalema vosena navakiko valifukwile kumeso aYehova nakulemesa Yehova.
19 Kaha vaLevi vaze vapwile vakutanga yavaKohate+ navaKola vakatukile, valishile Yehova Kalunga kaIsalele namazu akukanguka.+
20 Lichako, vamenekele chimenemene nakuya mupambo yaTekowa.+ Omu vapwile nakuya, Yehoshafwate ambile ngwenyi: “Ngwivwililenu enu vatu vamuYuta namuYelusalema! Fwelelenu Yehova Kalunga kenu, kaha namumika. Fwelelenu vapolofweto jenyi,+ kaha namufukila.”
21 Omu Yehoshafwate alingile hanatwame lyehi punga navatu, atongwele malunga vamwe mangana vembile Yehova myaso+ nakumwalisa oku vanavwale uvwalo wajila. Malunga kana vatetekelele kulutwe lwamalunga vaka-kwasa jita. Vambilenga ngwavo: “Musakwililenunga Yehova mwomwo zangi yenyi yakwilila kuyatwama haya myaka yosena.”+
22 Omu vawahililile nakuputuka kwimba myaso, Yehova atumine vatu vaswaminyine vaAmone, navaMowave, navatu vakungalila yajipili yaSeile vaze valukukile Yuta, kaha vaputukile kulijiha mwavomwavo.+
23 VaAmone, navaMowave valumukilile vatu vakungalila yajipili yaSeile,+ kaha vavajihile nakuvanongesa. Omu vakumishile kujiha vatu kana, valyalumukilile nakuputuka kulijiha mwavomwavo.+
24 Oloze omu vaYuta vahetele kukaposhi kakutalila kamupambo,+ vatalile kuze kwapwile lize lizavu, kaha vamwene vivimbi kuswanga kuswanga hamavu.+ Kakwapwile mutu ayovokeleko.
25 Ngocho Yehoshafwate navatu jenyi vejile nakupukula vyuma vyavatu kana. Vawanyine vyuma vyavivulu vyakufwana nge uvwalo, navyuma vyeka vyamwaza. Vavazulilevyo nakuvimbata, kaha vavihoneneneko.+ Vyuma kana vavituchile hamakumbi atatu, mwomwo vyapwile vyavivulu chikuma.
26 Kuheta halikumbi lyamuchiwana, valikungulwilile muChinema* chaMbelaka mangana valise* Yehova. Shikaho vavulukila chihela kana ngwavo Chinema chaMbelaka*+ palanga nakulelo lino.
27 Kufumaho, vatu vamuYuta namuYelusalema vosena hohamwe naYehoshafwate uze apwile nakuvatwaminyina vakindulukile kuYelusalema oku vanawahilila, mwomwo Yehova afungulwile vaka-kole javo.+
28 Vejile muYelusalema navisaji vyamikole, natulyalya,+ najineta,+ kaha vayile kuzuvo yaYehova.+
29 Mawangana akumafuchi osena evwile Yehova woma omu evwile ngwavo nalu jita navaka-kole javaIsalele.+
30 Ngocho muwangana waYehoshafwate mwapwilenga kuunda. Kalunga kenyi amulingishile atwame mukuunda chakuzeneka kumuzungisa kuli vaka-kole jenyi vaze vamujingilikile.+
31 Yehoshafwate atwalileho lika kuyula vaYuta. Apwile namyaka yakusemuka 35 omu aputukile kuyula, kaha ayulile myaka 25 muYelusalema. Lijina lyanaye apwile ikiye Azuva mwanaShilihi.+
32 Yehoshafwate akavilenga jijila jaise Asa.+ Kapyapumukilemoko, alingilenga vyuma vyakwoloka kumeso aYehova.+
33 Oloze kafumishile vihela vyakulundukako,+ kaha vatu nawa kavalizangile mumichima yavo mangana vatondetonde Kalunga kavakakuluka javoko.+
34 Mujimbu wosena waYehoshafwate wavyuma alingile kufuma kukuputuka swi nakumakumishilo watwama mumijimbu asonekele Yehu+ mwanaHananyi+ yize yatwama muMukanda waVamyangana javaIsalele.
35 Kutwala muze, Yehoshafwate mwangana wavaYuta alikashile chivwasano naAhajiya mwangana wavaIsalele uze alingilenga vyuma vyavipi.+
36 Ngocho vapachililenga hamwe mato aze ayilenga kuTalashishe.+ Mato kana vawapachililenga muEjone-ngevele.+
37 Oloze Eliyeze mwanaNdotavahu wakuMalesha apolofwetele vyuma vyavipi hali Yehoshafwate. Ambile ngwenyi: “Hakuwana nge unalikase chivwasano naAhajiya, ngocho Yehova mwanongesa milimo yove.”+ Shikaho aze mato apazwojokele,+ kaha kawahashile kuya kuTalashisheko.
Kwinyikila Chamwishi
^ Chipwe pamo, “navaMeune.”
^ Pamo “Kalungalwiji waKufwa.”
^ Hepe., “mbuto.”
^ Chipwe “yamwanakalwiji.”
^ Chipwe “mwamipululula.”
^ Chipwe “muChana.”
^ Hepe., “vakisule.”
^ Ulumbunwiso, “Kisu.”
