Mijimbu 2 21:1-20
21 Jino Yehoshafwate atokele ngana mwavakakuluka jenyi, kaha vamufunjile navakakuluka jenyi hamwe muNganda yaNdavichi. Mwanenyi Yeholame amushishile hawangana.+
2 VandumbwaYeholame, vana vaYehoshafwate vamalunga vapwile Azaliya, naYehyele, naZekaliya, naAzaliya, naMikayele, naShefwachiya. Vosenava vapwile vana vaYehoshafwate mwangana wavaIsalele.
3 Sevo avahanyine mawana amavulu apalata naulu, navikumba vyeka, najinganda jakukingiwa muYuta.+ Oloze wangana auhanyine kuli Yeholame+ mwomwo ikiye apwile twatwa.
4 Omu Yeholame alingile naswane lyehi hawangana waise, azamishile wangana wenyi hakujiha vandumbwenyi vamalunga+ vosena napoko yamukwale. Ajihile nawa vilolo vamwe vavaIsalele.
5 Yeholame apwile namyaka yakusemuka 32 omu aputukile kuyula, kaha ayulile myaka 8 muYelusalema.+
6 Yeholame akavilenga jijila jajipi javamyangana javaIsalele,+ nge muze valingilenga vaze vakuzuvo yaAhave. Ambachile mwanaAhave kupwa pwevo lyenyi,+ kaha alingilenga vyuma vyavipi kumeso aYehova.
7 Oloze Yehova kasakile kunongesa vaze vakuzuvo yaNdavichiko mwomwo yalushiko luze ashikile Ndavichi.+ Kalunga ashikile kukahana linongo kuli Ndavichi nakuli vana venyi hamakumbi osena navayoyanga.+
8 Hamakumbi ayulilenga Yeholame, vaEtome valikangile kuli vaYuta,+ kaha valitongwelele mwangana wavo.+
9 Ngocho Yeholame ayile kuEtome natupitau twenyi vajita namatemba enyi ajita osena. Jino kuheta naufuku, ahindukile nakulukuka vaEtome vaze vamujingilikile hohamwe natupitau twamatemba ajita.
10 VaEtome vanalikangenga kuli vaYuta palanga nakulikumbi lyalelo. Navatu vamunganda yaLivina+ nawa valikangile kuli Yeholame halwola luze, mwomwo asezele Yehova Kalunga kavakakuluka jenyi.+
11 Yeholame atungile nawa vihela vyakulunduka+ hajipili jamuYuta, ngocho alingishile vatu vamuYelusalema valinge ujila wakushipilitu nakuhungumwisa jino vaYuta.
12 Kutwala muze, kapolofweto Elija+ asonekelele Yeholame mazu ngwenyi: “Yehova Kalunga kakakuluka yove Ndavichi nambe ngwenyi, ‘Kawakavile jijila jaiso Yehoshafwate+ chipwe jijila jaAsa+ mwangana wavaYutako.
13 Oloze unakave jijila jajipi javamyangana javaIsalele,+ nakulingisa vaYuta navatu vamuYelusalema valinge ujila wakushipilitu+ nge muze valingile vaze vakuzuvo yaAhave.+ Unajihi nawa vandumbwove+ vakuzuvo yaiso, vaze vapwile vatu vamwaza kuhambakana yove.
14 Ngocho Yehova mwakazangamisa vatu jove, navana vove, namapwevo jove, nakunongesa nawa luheto lwove lwosena.
15 Kahove nawa naukaviza misongo yayivulu, kuhakilako namusongo wamujimo. Musongo kana naukatohwelangako lika hakumbi hakumbi palanga nomu mijingwa yove nayikatutuluka.’”
16 Kaha Yehova akatwile+ vaFwilishite*+ navaAlavya+ vaze valihachile navaEchopa mangana vanyemukile Yeholame.
17 Ngocho valukukile Yuta nakwingila mulifuchi kana, kaha vambachile luheto lwamuzuvo* yamwangana lwosena.+ Vambachile nawa vana venyi, namapwevo jenyi, kusezaho mwanenyi umwe kaha wakasulasongo Yehowahaze.*+
18 Kufumaho, Yehova amuvetele namusongo wamujimo wakuhona kuka.+
19 Omu mwahichile myaka yivali yamuundu, mijingwa yenyi yatutulukile mwomwo yamusongo kana, kaha afwile. Vatu jenyi kavawikile kakahya nakumuhana kavumbi nge muze valingililenga vakakuluka jenyiko.+
20 Yeholame apwile namyaka yakusemuka 32 omu aputukile kuyula muYelusalema, kaha ayulile myaka 8. Naumwe wauchi alinyengele kufwa chenyi. Vamufunjile muNganda yaNdavichi,+ oloze keshi kufuka yavamyanganako.+
Kwinyikila Chamwishi
^ Hepe., “akatwile shipilitu yavaFwilishite.”
^ Chipwe “lwamunganda.”
^ Ikiye nawa Ahajiya.
