Mijimbu 2 23:1-21
23 Jino mumwaka wakusokesa 7, Yehoyata ahamukile nakulikasa chivwasano natupitau twamakulukaji.+ Alikashile chivwasano naAzaliya mwanaYelohame, naIshimele mwanaYehohanane, naAzaliya mwanaOvete, naMaseya mwanaAtaya, naElishafwate mwanaJikili.
2 Kufumaho, vahitanganyine muYuta mwosena nakukungulula vaLevi+ mujinganda jaYuta josena, navatwamina vakujizuvo javakakuluka javaIsalele. Kahomu vejile kuYelusalema,
3 lizavu lyosena lyalikashile chivwasano+ namwangana kuzuvo yaKalunga wamuchano. Kufumaho, Yehoyata ambile kuli vakiko ngwenyi:
“Talenu! Mwanamwangana ikiye mwayula nge muze Yehova ahanjikile hali vana vaNdavichi.+
4 Lingenu ngana: Handununenu vapilishitu navaLevi vaze navazatanga haSambata mumazavu atatu.+ Lizavu limwe lipwenga namulimo wakulama kuvikolo.+
5 Lizavu likwavo lilame zuvo* yamwangana,+ lizavu likwavo lipwenga kuchikolo vavuluka ngwavo Chikolo ChakuChihela, kaha vatu vosena vapwenga muvipango vyazuvo yaYehova.+
6 Kanda nakupwa mutu mwengila muzuvo yaYehovako shina vapilishitu navaLevi kaha vaze veji kuzachilangamo.+ Vapilishitu navaLevi vanahase kwingilamo mwomwo vanapu hilizavu lyajila. Vatu veka vosena valamenga vyuma vize navalweze Yehova.
7 VaLevi vakajingilike mwangana che ndo, kaha mutu himutu akakwate vitwa vyenyi mumavoko. Weshowo mwakengila muzuvo mukamujihe. Mukalama mwangana kweshokwo mwakayanga.”*
8 Ngocho vaLevi navaYuta vosena valingile nge muze avalwezele kapilishitu Yehoyata. Mutu himutu ambachile lizavu lyavatu jenyi vaze vapwile nakuzata halikumbi lyaSambata, navaze kavapwile nakuzata halikumbi lyaSambatako,+ mwomwo kapilishitu Yehoyata kasuwile mazavu+ avaka-kuzata vakotokeko.
9 Jino kapilishitu Yehoyata ahanyine vaze tupitau twamakulukaji+ makunga, namikingo,* najikepwe jamujingulule vize vyapwilenga vyaMwangana Ndavichi,+ vize vyapwile muzuvo yaKalunga wamuchano.+
10 Alwezele vatu vosena vemane mutu himutu navitwa* vyenyi mumavoko, kufumisa kuluhachi lwazuvo kuchilyo swi nakuluhachi lwazuvo kuchimoswe, kwakamwihi nalijiko lyakulumbila, kwakamwihi nazuvo. Vajingilikile mwangana che ndo.
11 Jino valowele mwanamwangana,+ kaha vamuvwikile muchama nakumuhana mukanda waUnjiho.*+ Vamuswanyishile hawangana, kaha Yehoyata navana venyi vamuwavishile. Vambile ngwavo: “Ove mwangana, yoyanga lika!”+
12 Omu Ataliya evwile jishindo javatu vaze vapwile nakulaha nakwalisa mwangana, hahaze vene ayile kuzuvo yaYehova+ kuze kwapwile vatu.
13 Hakuheta kuze, amwene mwangana nemana kwakamwihi napanda kuchikolo. Kaha vilolo+ navaka-kwimba jineta vapwile namwangana. Vatu vosena vawahililile+ nakwimba jineta. Kaha vaka-kwimba visaji vyamikole vapwile nakutumbula myaso yakwalisa Kalunga. Ngocho Ataliya apihililile nakupula uvwalo wenyi, kaha atambakanyine ngwenyi: “Vanangufumbukila! Vanangufumbukila!”
14 Oloze kapilishitu Yehoyata alowele tupitau twamakulukaji vaze vatongwele vapwenga vakulwane jamaswalale. Avalwezele ngwenyi: “Mufumisenu halizavu lyenu, kaha weshowo mwamukava mumujihe napoko yamukwale.” Mwomwo kapilishitu ambile ngwenyi: “Kanda namumujihila muzuvo yaYehovako.”
15 Ngocho vamukwachile, kaha omu vahetele nenyi kuChikolo chaTuvalu chakuzuvo* yamwangana, hahaze vene vamujihile.
16 Jino Yehoyata alingishile mwangana navatu vosena naikiye valishike lushiko ngwavo navapwanga lika vatu jaYehova.+
17 Omu vyakumine vyumevi, vatu vosena vejile kuzuvo* yaMbale, kaha vayipuzwile.+ Vapuzwile nawa majiko enyi akulumbila, namakombelo enyi akusonga.+ Vajihilile nawa Matane uze apwile kapilishitu kaMbale+ kulutwe lwamajiko aze akulumbila.
18 Kufumaho Yehoyata atongwele vapilishitu navaLevi vapwenga tulama kuzuvo yaYehova. Vapilishitu navaLevi vakiko Ndavichi ahakile mumazavu kuzuvo yaYehova mangana valumbilenga Yehova vimuna vakuvatula+ kweseka nomu vasoneka muJishimbi jaMose.+ Valumbilenga vimuna kana nakuwahilila oku vali nakwimba myaso nge kutesa namuze avalwezele Ndavichi.
19 Vaka-kulama kuvikolo+ avahakile kuvikolo vyazuvo yaYehova kuchina vatu vaze vanapihi navengila.
20 Kaha alwezele vaze tupitau twamakulukaji,+ navatu vavalemu, navaka-kuyula, navatu vosena, vashinjikize mwangana kufuma kuzuvo yaYehova. Kaha vahichile jila yakuchikolo chahelu nakumutwala kuzuvo* yamwangana. Vatwamishile mwangana halitanda+ lyawangana.+
21 Shikaho vatu vosena vawahililile. Kaha munganda mwosena mwaunjile mwomwo vajihile Ataliya napoko yamukwale.
Kwinyikila Chamwishi
^ Chipwe “nganda.”
^ Hepe., “omu mwakengilanga nomu mwakalovokanga.”
^ Jikepwe jajindende jize vambachilenga vaka-kwasa mata amanana.
^ Chipwe “namatongo.”
^ Pamo wapwile mukanda wakuvunga waJishimbi jaKalunga.
^ Chipwe “chakunganda.”
^ Chipwe “kutembele.”
^ Chipwe “kunganda.”
