Mijimbu 2 24:1-27
24 Yehowashe aputukile kuyula omu apwile namyaka yakusemuka 7,+ kaha ayulile myaka 40 muYelusalema. Lijina lyanaye apwile ikiye Jiviya wakuMbele-sheva.+
2 Yehowashe alingilenga vyuma vyakwoloka kumeso aYehova hamakumbi osena ayoyelenga kapilishitu Yehoyata.+
3 Yehoyata ambachilile Yehowashe mapwevo vavali, kaha Yehowashe asemene vana vamalunga navava vamapwevo.
4 Kutwala muze, Yehowashe asakile kuwahisa zuvo yaYehova.+
5 Ngocho akungulwile vapilishitu navaLevi, avalwezele ngwenyi: “Yenunga mujinganda jaYuta mukungulule jimbongo kuli vaIsalele vosena jakuwahishisanga zuvo yaKalunga+ mwaka himwaka. Anguhwisenu kulinga chuma kana.” Oloze vaLevi kavanguhwishileko.+
6 Jino mwangana asanyikile kapilishitu wamukulwane Yehoyata, amuhulishile ngwenyi:+ “Mwomwo ika unahonena kulweza vaLevi vayenga muYuta namuYelusalema vakatambule mulambu wajila wachikungulwilo chavaIsalele wakuzachisa kumbalaka yaUnjiho+ uze avulukile ngamba yaYehova Mose?+
7 Mwomwo vana vauze pwevo wakuhuka Ataliya+ vatuvile zuvo yaKalunga wamuchano+ nakumbata vyuma vyajila vyamuzuvo yaYehova vyosena, vavihanyine kuli vaMbale.”
8 Jino vasongele chikasha+ nakuchihaka haweluka, kuchikolo chazuvo yaYehova+ nge muze avalwezele mwangana.
9 Kufumaho, vavilikile luvila muYuta namuYelusalema mwosena lwakulweza vatu vanehele Yehova mulambu wajila+ uze ngamba yaKalunga wamuchano Mose alwezele vaIsalele vahanenga mupambo.
10 Vilolo vosena navatu vosena vawahililile,+ kaha vanehelenga mawana nakuwahaka muze muchikasha palanga nomu chazalile.*
11 Omu vaLevi vanehelenga chize chikasha kuli mwangana, nomu vamwene ngwavo jimbongo jinavulu muchikasha, muka-kusoneka wamwangana natemesa wakapilishitu wamukulwane vejilenga nakufumisa jize jimbongo muchikasha.+ Kufumaho vakindulwishilenga chize chikasha haze vachitumbikilenga. Omu mukiko valingilenga hakumbi hakumbi, ngocho vakungulwile jimbongo jajivulu chikuma.
12 Jino mwangana naYehoyata vahanyinenga jize jimbongo kuli tupitau vaze vatalilenga mulimo wakuzuvo yaYehova, kaha vakambilenga vaka-kusonga malolwa navitotombwe mangana vawahise zuvo yaYehova.+ Vakambilenga nawa vaka-kufula vyuma vyafwelu navyevi vyaunengu mangana vawahise zuvo yaYehova.
13 Tupitau vaze vatalilenga mulimo wakuwahisa zuvo yaKalunga wamuchano vaputukile mulimo, kaha mulimo wazovolokele. Ngocho zuvo yaKalunga wamuchano vayiwahishile nakupwa cheka ngana muze yapwile hakavanga, kaha yakolele.
14 Omu wakumine mulimo, vambachile jimbongo jize jasalileho nakujihana kuli mwangana naYehoyata. Jimbongo kana vajizachishile kukutenga vinoma vyakuzuvo yaYehova, vinoma vyakuzachisa, navinoma vyakuhanyina mawana, najipasa, navinoma vyeka vyaulu napalata.+ Ngocho valumbilenga jino vimuna vakuvatula+ muzuvo yaYehova hamakumbi aYehoyata osena.
15 Yehoyata apwile wakusuuluka mwomwo ayoyele myaka yayivulu, kaha afwile haushinakaji wenyi. Apwile namyaka yakusemuka 130 omu afwile.
16 Ngocho vamufunjile hamwe navamyangana+ muNganda yaNdavichi mwomwo alingile vyuma vyamwaza muIsalele+ kupandama kuli Kalunga wamuchano nakuzuvo yaKalunga.
17 Omu alingile Yehoyata nafu lyehi, vilolo javaYuta vejile kuli mwangana nakulifukula. Kaha mwangana evwililile vyuma vahanjikile.
18 Vatu vasuvililile zuvo yaYehova Kalunga kavakakuluka javo, vaputukile kulemesa jipanda jajila jamitondo* namakombelo. Ngocho Kalunga akwachilile utenu* vatu vamuYuta namuYelusalema mwomwo yamulonga kanou vavulumwine.
19 Yehova avatuminyinenga lika vapolofweto mangana vakinduluke kuli ikiye. Kaha vapolofweto vavahuhumwinenga,* oloze vakiko kavevwililileko.+
20 Jino shipilitu yaKalunga yejile* hali Zekaliya mwanakapilishitu Yehoyata,+ kaha emanyine mukachi kavatu nakwamba ngwenyi: “Kalunga wamuchano nambe ngwenyi, ‘Muli nakuhokwela ika jishimbi jaYehova? Kamweshi kufukilako! Hakuwana nge munaseze Yehova, ngocho naikiye nawa mwamiseza.’”+
21 Oloze vamufumbukilile,+ vamwashile malolwa muchipango chazuvo yaYehova+ nge muze avalwezele mwangana.
22 Mwangana Yehowashe kanukile zangi yakwilila yize Yehoyata ise yaZekaliya amusolweleleko, kaha ajihile Zekaliya. Omu Zekaliya apwile hakamwihi nakufwa, ambile ngwenyi: “Yehova akuzangamise havyumevi unalingi.”+
23 Jino kukuputuka chamwaka,* maswalale javaSulya vejile nakulwa jita naYehowashe, kaha valukukile Yuta naYelusalema.+ Vajihile vilolo+ vosena, kaha vambachile vyuma vapukwile nakuvituma kuli mwangana wakuNdamashiku.
24 Numba tuhu maswalale javaSulya vapwile vavandende, oloze Yehova avalingishile vafungulule maswalale javaYuta vavavulu chikuma,+ mwomwo vaYuta vasezele Yehova Kalunga kavakakuluka javo. Ngocho maswalale javaSulya vazangamishile Yehowashe.
25 Jino omu vamusezele (hakuwana nge vamulemekele chikuma*), vangamba jenyi vamufumbukilile mwomwo amwangile manyinga avana* vakapilishitu Yehoyata.+ Ngocho vamujihilile hakahela kenyi.+ Omu afwile, vamufunjile muNganda yaNdavichi,+ oloze keshi kufuka yavamyanganako.+
26 Ava vakiko vafumbukilile+ Yehowashe: Zavate mwanaShimeyate kaAmone wapwevo naYehozavate mwanaShimilite kaMowave wapwevo.
27 Mijimbu yavana vaYehowashe vamalunga, navyuma vyavipi vahanjikilenga hali ikiye,+ namulimo azachile wakuwahisa* zuvo yaKalunga wamuchano+ vyosena vavisoneka muMukanda waVamyangana. Kaha mwanenyi Amajiya aswanyine hawangana.
Kwinyikila Chamwishi
^ Chipwe pamo, “palanga nomu vosena vakumishile kuhana.”
^ Tala Mukana waMazu.
^ Hepe., “Ngocho utenu wejile hali.”
^ Chipwe “vavambulililenga unjiho wakuvapayisa.”
^ Hepe., “yafwikile.”
^ Hepe., “hakwiza chamwaka.”
^ Chipwe “apwile namisongo yayivulu.”
^ Chipwe “amwana.” Pamo vazachisa vana hakusaka kusolola ulemu.
^ Hepe., “wakwala chihela.”
