Mijimbu 2 25:1-28
25 Amajiya aputukile kuyula omu apwile namyaka yakusemuka 25, kaha ayulile myaka 29 muYelusalema. Lijina lyanaye apwile ikiye Yehowatane wamuYelusalema.+
2 Amajiya alingilenga vyuma vyakwoloka kumeso aYehova, oloze keshi namuchima wenyi wosenako.
3 Omu alingile hanazamisa lyehi wangana wenyi, ajihile vangamba jenyi vaze vajihile ise.+
4 Oloze vana vavo kavajihileko nge kutesa navyuma vasonekele muJishimbi, mumukanda waMose muze Yehova ahanjikile ngwenyi: “Visemi kanda vakafwila hamilonga yavana vavoko, kaha vana nawa kanda vakafwila hamilonga yavisemi javoko. Mutu himutu akafwile hashili yenyi.”+
5 Amajiya akungulwilile vaYuta hamwe, kaha avalwezele vemane kweseka najizuvo javakakuluka javo, kweseka natupitau twamakombakaji natupitau twamakulukaji vakumuyachi waYuta namuyachi waMbenjamine.+ Kufumaho asonekele vaze vapwile namyaka yakusemuka 20 nakuya kwilu,+ kaha vapwile maswalale 300,000 vaze vahashile kulwa jita nakuzachisa makunga najikepwe jajinene.
6 Kaha akambile vaka-kwasa jita vangolo vavaIsalele 100,000. Avakambile najitalende* 100 japalata.
7 Jino mutu waKalunga wamuchano ejile kuli Amajiya, amwambile ngwenyi: “Ove mwangana, kanda nauya namaswalale javaIsaleleko mwomwo Yehova keshi navaIsaleleko,+ keshi navaEfwalimeko.
8 Oloze yako uka wove, komike hakulwa jita. Mokomoko Kalunga wamuchano mwakakulimbwisa kumeso avaka-kole jove, mwomwo akwechi ngolo jakukafwa+ mutu chipwe kumulimbwisa.”
9 Oloze Amajiya ehwile uze mutu waKalunga wamuchano ngwenyi: “Nyi ngachilihi jize jitalende jami 100 ngunahane vaze maswalale javaIsalele?” Uze mutu waKalunga wamuchano amukumbulwile ngwenyi: “Yehova nahase kukuhana vyuma vyavivulu kuhambakana jitalende kana.”+
10 Ngocho Amajiya alwezele vaze maswalale vafumine kuEfwalime vakinduluke kwimbo lyavo. Oloze vaze maswalale vapihililile chikuma navaYuta, ngocho vakindulukile kwimbo lyavo namatoto.
11 Jino Amajiya omikile nakuya hamwe namaswalale jenyi kuChinema chaMungwa.+ Omu ahetele kuze, ajihile malunga vavaSeile+ 10,000.
12 Malunga vavaYuta vakwachile malunga vavaSeile 10,000. Vavambachile nakuvatwala helu lyalilolwa, kaha vavambililenga hamavu kufuma haze helu, ngocho vosena vachikikile chikichiki.
13 Oloze maswalale javaIsalele vamwe vaze ahilwishile Amajiya vazeneke kuya nenyi kujita+ valukukile jinganda javaYuta kufuma kuSamaliya+ swi nakuMbete-holone.+ Vajihile vatu 3,000, kaha vapukwile nawa vyuma vyavivulu chikuma.
14 Oloze omu Amajiya afumine kuze ayile nakujiha vaEtome, ejile natulunga twavaSeile. Avatengele kupwa tulunga twenyi,+ kaha aputukile kulifukula kuli vakiko nakuvalumbila vimuna vakuvatula mangana vakakumuke wishi.
15 Ngocho Yehova akwachilile Amajiya utenu, kaha amutuminyine kapolofweto kenyi nakumulweza ngwenyi: “Ika uli nakulemesela tulunga vaze vahonanga kupululula vatu javo mulivoko lyove?”+
16 Shimbu apwile nakuhanjika, mwangana ambile kuli ikiye ngwenyi: “Likumbi muka twakutongwele kupwa umuka-kulweza mwangana mangana?+ Hola kulu,+ mokomoko navakujiha.” Ngocho uze kapolofweto aholele, oloze ambile ngwenyi: “Ngunatachikiza ngwami Kalunga najinyi kukunongesa mwomwo yavyumevi unalingi nahakuzeneka kwivwilila mulizu lyami.”+
17 Omu Amajiya mwangana wavaYuta alingile natwame lyehi punga navaka-kumulweza mangana, atumine tunganda kuli mwangana wavaIsalele Yehowashe mwanaYehowahaze, Yehowahaze mwanaYehu ngwenyi: “Twaya tulwenga jita.”*+
18 Kaha Yehowashe mwangana wavaIsalele atumine mazu ano kuli Amajiya mwangana wavaYuta ngwenyi: “Mutuvapoko wakuLevanone watumine mazu kuli mushitale wakuLevanone ngwawo, ‘Hana mwanove wapwevo kuli mwanami apwenga pwevo lyenyi.’ Oloze chisuma umwe wakuLevanone ejile nakulyatangila uze mutuvapoko.
19 Ove uli nakulisasa ngwove, ‘Ami ngunajihi* vaEtome.’+ Shikaho uli nakulivwimba nakusaka vakutohwese. Oloze twama muzuvo* yove. Ikaze musangumwina ndombo nakuneha lupi hali ove ivene nahali vaYuta?”
20 Oloze Amajiya akanyine kwivwilila.+ Kalunga wamuchano ikiye alingishile vyuma kana visoloke mangana avahane mumavoko avaka-kole+ javo mwomwo yakulemesa tulunga twavaEtome.+
21 Ngocho Yehowashe mwangana wavaIsalele ayile nakulwa jita naAmajiya mwangana wavaYuta kuMbete-shemeshe+ nganda yamuYuta.
22 VaYuta vavafungulwile kuli vaIsalele, ngocho mutu himutu achinyinyine kwimbo* lyenyi.
23 Yehowashe mwangana wavaIsalele akwachile Amajiya mwangana wavaYuta kuMbete-shemeshe. Amajiya apwile mwanaYehowashe, Yehowashe mwanaYehowahaze.* Ayile nenyi hamwe kuYelusalema, kaha Yehowashe apuzwile lihanya lyajikuvite 400* hambango yaYelusalema, kufuma kuChikolo chaEfwalime+ swi nakuChikolo ChamuMbango.+
24 Yehowashe ambachile ulu wosena, napalata navyuma vyeka vize vyapwile muzuvo yaKalunga wamuchano kuli* Ovete-etome, navikumba vyamuzuvo* yamwangana,+ navafunge. Kaha akindulukile kuSamaliya.
25 Mwangana wavaYuta Amajiya+ mwanaYehowashe ayoyele myaka 15 kufuma hakufwa chaYehowashe+ mwanaYehowahaze mwangana wavaIsalele.+
26 Mujimbu wosena waAmajiya wavyuma alingile kufuma kukuputuka swi nakumakumishilo vausoneka muMukanda waVamyangana javaYuta navaIsalele.
27 Kufuma halwola luze Amajiya alitwaminyine kukavangiza Yehova, vamufumbukilile+ muYelusalema, kaha achinyinyine kuLakishe. Oloze vatumine vatu vamukave kuLakishe, kaha vakamujihilile kuze.
28 Ngocho vamumbachile hatuvalu nakumukindulwisa, kaha vamufunjile muNganda yaYuta navakakuluka jenyi hamwe.
Kwinyikila Chamwishi
^ Talende yimwe yapwile jikilongalamu 34.2. Tala Chihande B14.
^ Chipwe “tuliwane meso nameso.”
^ Hepe., “Ove unajihi.”
^ Chipwe “munganda.”
^ Hepe., “kumbalaka.”
^ Kafwe jimita 178. Tala Chihande B14.
^ Ikiye nawa Ahajiya.
^ Chipwe “mumavoko.”
^ Chipwe “vyamunganda.”
