Mijimbu 2 26:1-23
26 Jino vatu vamuYuta vosena vasakwile Ujiya+ uze apwile namyaka yakusemuka 16, kaha vamuswanyishile hawangana waise Amajiya.+
2 Omu alingile mwangana Amajiya hanatoko lyehi ngana mwavakakuluka jenyi,+ Ujiya atungulwile nganda yaElote+ nakuyikindulwisa kuli vaYuta.
3 Ujiya+ aputukile kuyula omu apwile namyaka yakusemuka 16, kaha ayulile myaka 52 muYelusalema. Lijina lyanaye apwile ikiye Yekoliya wamuYelusalema.+
4 Ujiya alingilenga vyuma vyakwoloka kumeso aYehova nge muze alingilenga ise Amajiya.+
5 Atondeletondelenga Kalunga hamakumbi aZekaliya uze amunangwilenga kwivwa Kalunga wamuchano woma. Kaha hamakumbi aze atondeletondelenga Yehova, Kalunga wamuchano amulingishile afukile.+
6 Ujiya ayile nakulwa jita navaFwilishite,+ kaha akatuvile kembwe yanganda yaNgata,+ nakembwe yanganda yaYavane,+ nakembwe yanganda yaAshatote+ nakufungulula jinganda kana. Kufumaho atungile jinganda mungalila yaAshatote namungalila yavaFwilishite.
7 Kalunga wamuchano akafwilenga lika Ujiya omu alwilenga jita navaFwilishite, navaMeune, navaAlavya+ vaze vatwaminenga kuNgule-mbale.
8 VaAmone+ vaputukile kuhana Ujiya milambu. Kutwala muze, puho yenyi yahetele nakuEjipitu, mwomwo apwile nangolo chikuma.
9 Ujiya atungile nawa tuposhi vakukola+ muYelusalema kuChikolo ChamuMbango,+ nakuChikolo chaChinema,+ nakuPanda yaMalolwa.
10 Atungile nawa tuposhi+ mupambo nakufula* mashima amavulu (mwomwo apwile navimuna vavavulu chikuma). Omu mukiko alingile nakuShefwela namuchana.* Apwilenga navanjimi navaka-kuzata mumande amivinyo kujipili nakuKalamele mwomwo azangilenga kulima.
11 Ujiya apwile nalizavu lyamaswalale vaze vapwile vakulizanga kulwa jita. Vayilenga nakulwa jita mumazavu akulongesa kanawa. Vavalavile nakuvasoneka+ kuli Yeyele muka-kusoneka+ naMaseya uze apwilenga mukulwane. Yeyele naMaseya vavatwaminyine kuli Hananyiya uze apwile chilolo chamwangana.
12 Vatwamina vosena vakujizuvo javakakuluka, vaze vapwile tupitau twavava vaka-kwasa jita vangolo vapwile 2,600.
13 Maswalale vosena vaze vatwaminyinyinenga kuli ava tupitau vapwile 307,500. Maswalale kana vapwile vangolo, vakulizanga kulwa jita, kaha vakafwilenga mwangana kulwa navaka-kole jenyi.+
14 Ujiya ahanyine maswalale jenyi vosena jikepwe, namakunga,+ namatepa akukola, natuhuma vavikungo,+ namata amanana, namalolwa amuchikapa chakwashisa.+
15 Atungile nawa makina ajita muYelusalema aze vamanjimela vatakile mwakuwatungila. Makina kana vawahakile hatuposhi,+ namujimbango jajikembwe, kaha ashilenga mivwi namalolwa amanene. Ngocho Ujiya ayile puho chikuma mwomwo vamukafwilenga kuvatu vavavulu, kaha nawa apwile nangolo.
16 Oloze omu Ujiya alingile nakwate lyehi ngolo, aputukile kulivwimba, ngocho ahichikishilemo mwono wenyi. Avulumwine mulonga kumeso aYehova Kalunga kenyi hakwingila mutembele yaYehova mangana alumbe vyuma vyalivumba lyamwaza halijiko lyakulumbila vyuma vyalivumba lyamwaza.+
17 Hahaze vene, kapilishitu Azaliya navapilishitu jaYehova veka vakuhamuka 80 vamukavile muze mutembele.
18 Omu vamuwanyine, vamwambile ngwavo: “Ove Ujiya, kachatelemo ove kulumbila Yehova vyuma vyalivumba lyamwazako!+ Vapilishitu vakiko kaha vatela kulumba vyuma vyalivumba lyamwaza, mwomwo vakiko vaka-tanga yaAlone+ vaze vajilika. Lovoka muno muchihela chajila mwomwo unavulumuna mulonga. Yehova Kalunga keshi kukuhana ulemu havyumevi unalingiko.”
19 Oloze Ujiya apihililile navapilishitu oku nakwate chiloso mulivoko lyenyi mangana alumbe vyuma vyalivumba lyamwaza. Omu apihililile,+ akwachiwile mbumba+ haluholo oku ali navapilishitu muzuvo yaYehova, kwakamwihi nalijiko lyakulumbila vyuma vyalivumba lyamwaza.
20 Omu kapilishitu wamukulwane Azaliya navapilishitu vosena vamushishikile, vamwene nakwachiwa mbumba haluholo. Ngocho vamulowele haweluka washiwashi, kaha naivene anguhwishile kulovoka, mwomwo Yehova amuvetele namusongo wambumba.
21 Mwangana Ujiya apwile lika nambumba+ palanga nakulikumbi afwile. Ujiya vamufumishile muzuvo yaYehova, kaha atwaminenga muzuvo yauka wenyi. Mwanenyi Yotame ikiye apwile mwata wazuvo* yamwangana, kaha ayulilenga vatu vamulifuchi lize.+
22 Mujimbu wosena waUjiya wavyuma alingile kufuma kukuputuka swi nakumakumishilo vausonekele kuli kapolofweto Isaya+ mwanaAmoze.
23 Kutwala muze Ujiya atokele ngana mwavakakuluka jenyi, kaha vamufunjile navakakuluka jenyi hamwe. Vamufunjile muchipapa chize chapwilile kusali yafuka yavamyangana, mwomwo vambile ngwavo: “Apwa muka-mbumba.” Kaha mwanenyi Yotame+ aswanyine hawangana.
Kwinyikila Chamwishi
^ Chipwe “namuchihela chakusalama.”
^ Chipwe “nakutota.” Pamo mashima amumalolwa.
^ Chipwe “wanganda.”
