Mijimbu 2 27:1-9
-
Yotame mwangana wavaYuta (1-9)
27 Yotame+ aputukile kuyula omu apwile namyaka yakusemuka 25, kaha ayulile myaka 16 muYelusalema. Lijina lyanaye apwile ikiye Yelusha mwanaZatoke.+
2 Yotame alingilenga vyuma vyakwoloka kumeso aYehova ngana muze alingilenga ise Ujiya.+ Oloze ikiye kengilile mutembele yaYehovako.+ Chipwe ngocho, vatu valingilenga vyuma vyavipi.
3 Yotame ikiye atungile chikolo chahelu chazuvo yaYehova.+ Kaha atungile nawa vyuma vyavivulu kukembwe yaOfwele.+
4 Atungile nawa jinganda+ mungalila yajipili yaYuta,+ najinganda jeka jajikembwe+ natuposhi+ mumisenge.
5 Alwile nawa jita namwangana wavaAmone,+ kaha afungulwile vaAmone. Ngocho vaAmone vamuhanyine jitalende* 100 japalata, najikole* 10,000 jatiliku, najikole 10,000 jambale mumwaka kana. Vamuhanyine nawa vyuma kana mumwaka wamuchivali nawou wamuchitatu.+
6 Ngocho Yotame akwachilenga lika ngolo, mwomwo alingilenga vyuma vyamwaza kumeso aYehova Kalunga kenyi.
7 Mujimbu wosena waYotame wavyuma alingile, najijita josena alwile, najijila jenyi josena vavisoneka muMukanda waVamyangana javaIsalele navaYuta.+
8 Yotame apwile namyaka yakusemuka 25 omu aputukile kuyula, kaha ayulile myaka 16 muYelusalema.+
9 Yotame atokele ngana mwavakakuluka jenyi, kaha vamufunjile muNganda yaNdavichi.+ Kaha mwanenyi Ahaze aswanyine hawangana.+
Kwinyikila Chamwishi
^ Talende yimwe yapwile jikilongalamu 34.2. Tala Chihande B14.
^ Kole yimwe yapwile jilita 220. Tala Chihande B14.