Mijimbu 2 28:1-27
28 Ahaze+ aputukile kuyula omu apwile namyaka yakusemuka 20, kaha ayulile myaka 16 muYelusalema. Kalingilenga vyuma vyakwoloka kumeso aYehova ngana muze alingilenga kakuluka yenyi Ndavichiko.+
2 Ahaze akavilenga jijila javamyangana javaIsalele,+ kaha atengele makombelo akuzuzulula+ avaMbale.
3 Alumbilenga nawa vimuna vakuvatula muChinema chaMwanaHinome* mangana vakakumuke wishi.+ Alumbile navana venyi mukakahya hakukavangiza vilinga vyaunyengwe vyavaka-mafuchi+ aze Yehova ahangile kumeso avaIsalele.
4 Alumbilenga nawa vimuna vakuvatula havihela vyakulunduka,+ nahajipili, namwishi yamitondo yakujika mafwo+ yosena mangana vakakumuke wishi.
5 Ngocho Yehova Kalunga kenyi amuhanyine mumavoko amwangana waSulya,+ kaha amufungulwile. Mwangana waSulya ambachile vatu jaAhaze vavavulu nakuvatwala muufunge kuNdamashiku.+ Kalunga ahanyine nawa Ahaze mumavoko amwangana wavaIsalele, kaha ajihile vatu jaAhaze vavavulu.
6 Peka+ mwanaLemaliya ajihile malunga vakuhamuka 120,000 muYuta mulikumbi lyangongo, mwomwo vasezele Yehova Kalunga kavakakuluka javo.+
7 Kaha Jikili kaEfwalime muka-kulwa jita ajihile Maseya mwanamwangana, naAzalikame uze atalilenga nganda* yamwangana, naElekana uze apwilenga ngambela yamwangana.
8 VaIsalele nawa vakwachile ufunge vandumbwavo 200,000. Havatu kana hapwile mapwevo, navana vamalunga navava vamapwevo. Vapukwile vyuma vyavivulu, kaha vavitwalile kuSamaliya.+
9 Oloze kapolofweto kaYehova Otete apwile kuze. Ngocho akikililile vaze maswalale vapwile nakwiza kuSamaliya, kaha ambile kuli vakiko ngwenyi: “Talenu! Yehova Kalunga kavakakuluka jenu nahane vaYuta mumavoko enu mwomwo avakwachilanga utenu.+ Munavajihi namatoto, kaha Kalunga namono matoto enu.
10 Jino muli nakusaka nawa vatu vamuYuta namuYelusalema vapwenga vangamba jenu vamalunga navava vamapwevo.+ Kutala enu muli nakulimona ngwenu kamweshi namulonga kumeso aYehova Kalunga kenuko nyi?
11 Shikaho ngwivwililenu! Kindulwisenu ava vafunge mwakwatanga kuli vandumbwenu, mwomwo Yehova namikwachila utenu.”
12 Jino Azaliya mwanaYehohanane, naMbelekiya mwanaMeshilemote, naYehijikiya mwanaShalume, naAmasa mwanaHatalai, vaze vapwile vamyata javaEfwalime vayile nakulihumangana navaze maswalale vapwile nakufuma kujita.
13 Vambile kuli vakiko ngwavo: “Kanda namuneha ava vafunge kunoko, mwomwo natupwa namulonga kumeso aYehova. Vyuma muli nakusaka kulinga naviwezela kushili yetu nakumilonga yetu, mwomwo milonga yetu yinavulu chikuma, kaha Kalunga nakwachila vaIsalele utenu.”
14 Ngocho vaze maswalale vahanyine vyuma vapupile+ navaze vafunge kuli vilolo nalizavu lyosena.
15 Kaha malunga vamwe vaze vavulukile hamajina vakatukile, vatambwile vaze vafunge. Vambachile uvwalo umwe kuvyuma vyakupukula, vauhanyine vafunge vosena vaze vazenekele uvwalo. Vavavwikile uze uvwalo nakuvahana mendelo, navyakulya, navyakunwa, namaji akulikwita. Vambachile nawa vafunge vaze vazeyele, vavahakile havimbulu nakuvatwala kuli vandumbwavo kuYeliko, kunganda yamikoma. Kufumaho vaze malunga vakindulukile kuSamaliya.
16 Halwola luze, Mwangana Ahaze alombele vamyangana javaAsulya vamukafwe.+
17 VaEtome vejile cheka nakulukuka Yuta, kaha vakwachile vaYuta vamwe ufunge.
18 VaFwilishite+ navakiko valukukile jinganda jamungalila yaShefwela+ naNengeve muYuta. Vatambwile nganda yaMbete-shemeshe,+ naAiyalone,+ naNgetelote, naSoko najimbongi jajingilikileko, naChimina+ najimbongi jajingilikileko, naNgimizo najimbongi jajingilikileko. Kaha vatwaminenga mujinganda kana.
19 Yehova enyishile vaYuta mwomwo yaAhaze mwangana wavaIsalele. Ahaze echelele vaYuta valinge vyuma vyavipi, ngocho ahengesele chikuma kuli Yehova.
20 Kutwala muze, Chilingate-pilinese+ mwangana waAsulya ejile nakulwa jita naAhaze, kaha amumwenesele vihuli+ mukutela kumukolezeza.
21 Ahaze ambachile vyuma vyosena vyamuzuvo yaYehova, namuzuvo* yamwangana,+ namujizuvo javilolo, avihanyine mwangana waAsulya kupwa wana. Oloze echi kachamukafwileko.
22 Mulwola kanelu lwavihuli, Mwangana Ahaze aswezele kulinga vyuma vyavipi kumeso aYehova.
23 Aputukile kulumba vimuna vakuvatula kutulunga twavatu vamuNdamashiku+ vaze vamufungulwile.+ Ambile ngwenyi: “Hakuwana nge vamyangana vaSulya vali nakuvakafwa kutulunga twavo, nangulumbila ava tulunga vimuna vakuvatula mangana nayami nawa vangukafwe.”+ Oloze tulunga kana vamuhukanyishile hohamwe navaIsalele vosena.
24 Ahaze akungulwile nawa vinoma vyamuzuvo yaKalunga wamuchano,+ aviteteletetele. Kaha asokele vikolo vyakuzuvo yaYehova.+ Kufumaho alitungilile majiko akulumbila hamakanyiko ajijila jamuYelusalema josena.
25 Atungile vihela vyakulunduka mujinganda jamuYuta josena haze alumbililenga tulunga veka vimuna vakuvatula mangana vakakumuke wishi.+ Kaha evwishile Yehova Kalunga kavakakuluka jenyi kupihya.
26 Mujimbu wosena waAhaze wavyuma alingile kufuma kukuputuka swi nakumakumishilo vausoneka muMukanda waVamyangana javaYuta navaIsalele.+
27 Ahaze atokele ngana mwavakakuluka jenyi, kaha vamufunjile munganda yaYelusalema. Kavamufunjile hafuka yavamyangana javaIsaleleko.+ Kaha mwanenyi Hezekiya aswanyine hawangana.
