Mijimbu 2 29:1-36
29 Hezekiya+ aputukile kuyula omu apwile namyaka yakusemuka 25, kaha ayulile myaka 29 muYelusalema. Lijina lyanaye apwile ikiye Aviya mwanaZekaliya.+
2 Hezekiya alingilenga vyuma vyakwoloka kumeso aYehova+ nge muze alingilenga kakuluka yenyi Ndavichi.+
3 Mumwaka wakulivanga wachiyulo chenyi, mukakweji wakulivanga, asokolwele mapito akuzuvo yaYehova nakuwawahisa.+
4 Kufumaho, akungulwilile vapilishitu navaLevi muchihela chasanga kumututuko.
5 Ambile kuli vakiko ngwenyi: “Enu vaLevi ngwivwililenu. Lijilikenu,+ jilikenu nawa zuvo yaYehova Kalunga kavakakuluka jenu. Fumisenu vyuma vyavipi muchihela chajila.+
6 Masetu kavashishikileko, valingile vyuma vyavipi kumeso aYehova Kalunga ketu.+ Vamusezele, vamumbile nyima, kaha vasuvililile tavanaku yaYehova.+
7 Vasokele nawa mapito akusenge,+ nakujima manongo.+ Valitwaminyine kulumbila Kalunga kaIsalele vyuma vyalivumba lyamwaza+ navimuna vakuvatula+ muchihela chajila.
8 Ngocho Yehova akwachilile vatu vamuYuta namuYelusalema+ utenu nakuvanongesa, kaha vatu vevwile woma, valikomokelele nakulihaha hali vakiko,* nge omu munalimwena enu vavene.+
9 Vakakuluka jetu valindumukile kujipoko jamikwale,+ kaha vana vetu vamalunga navava vamapwevo, namapwevo jetu vavatwalile muufunge hachuma kanechi.+
10 Ami jino nguli nakufwila kulishika lushiko naYehova Kalunga kaIsalele+ mangana apeule utenu wenyi hali etu.
11 Enu vana vami, luno keshi lwola lwakulizelendendako,* mwomwo Yehova namisakula mwimanenga kumeso enyi nakumuzachila,+ mulumbenga vimuna vakuvatula mangana vakakumukenga wishi.”+
12 Ngocho vaLevi vemanyine. Kuli vaKohate+ kwapwile Mahate mwanaAmasai naYowele mwanaAzaliya, kuli vaMelali+ kwapwile Kishe mwanaAvachi naAzaliya mwanaYehalelele, kuli vaNgeleshone+ kwapwile Yowa mwanaJima naEtene mwanaYowa,
13 kuli vana vaElizafwane kwapwile Shimili naYuwele, kuli vana vaAsafwe+ kwapwile Zekaliya naMatanyiya,
14 kuli vana vaHemane+ kwapwile Yehyele naShimei, kuli vana vaYelutune+ kwapwile Shemaya naUjiyele.
15 Kufumaho vakungulwile vandumbwavo, kaha valijilikile, vaputukile kutomesa zuvo yaYehova nge kutesa namazu aYehova+ aze vavalwezele kuli mwangana.
16 Vapilishitu vengilile muzuvo yaYehova nakuyitomesa. Valowele vyuma vyavipi vyosena vize vawanyine mutembele yaYehova, kaha vavitwalile muchipango+ chazuvo yaYehova. Jino vaLevi vavimbachile nakuvitwala kuweluka kuChinema chaKichilone.+
17 Vaputukile mulimo wakujilika zuvo yaKalunga halikumbi lyakulivanga lyakakweji wakulivanga. Kaha halikumbi lyakusokesa 8 lyakakweji kana, vahetele kusenge yazuvo yaYehova.+ Vajilikile zuvo yaYehova hamakumbi 8, kaha vakumishile mulimo wosena halikumbi lyakusokesa 16 lyakakweji wakulivanga.
18 Kufumaho vayile kuli Mwangana Hezekiya, vambile kuli ikiye ngwavo: “Tunatomesa zuvo yaYehova yosena, nalijiko lyakulumbila wana wakulumba+ navinoma+ vyalyo vyosena, namesa yakuhaka jimbolo jakulumbika*+ navinoma vyayo vyosena.
19 Vinoma vyosena vize ambilile Mwangana Ahaze halwola luze ayulilenga, luze alingilenga vyuma vyavipi,+ tunaviwahisa nakuvijilika.+ Kaha tunavihake kulijiko lyakulumbila lyaYehova.”
20 Jino Mwangana Hezekiya ahindukile chimenemene, akungulwile vilolo vamunganda, kaha vayile kuzuvo yaYehova.
21 Vanehele vakuji javangombe 7, navizamba jamikoko 7, navana vamikoko vavizamba 7, navizamba javapembe 7 vawana wahashili wahawangana, nahachihela chajila, nahali vaYuta.+ Kaha alwezele vapilishitu vaka-tanga yaAlone valumbe ava vimuna halijiko lyakulumbila lyaYehova.
22 Vajihile vaze vangombe,+ kaha vapilishitu vambachile manyinga nakuwasapwila halijiko lyakulumbila.+ Kufumaho vajihile vaze vizamba jamikoko, kaha vasapwilile manyinga halijiko lyakulumbila. Vajihile nawa vaze vana vamikoko vavizamba, kaha vasapwilile manyinga halijiko lyakulumbila.
23 Jino vanehele vaze vizamba javapembe vawana wahashili kumeso amwangana nalizavu lyosena, kaha vanangikile mavoko avo hali vaze vapembe.
24 Vapilishitu vajihile vaze vapembe, kaha vahanyine manyinga avo kupwa wana wahashili halijiko lyakulumbila mangana valinge chakufwika hashili yavaIsalele vosena. Valingile ngocho mwomwo mwangana ambile ngwenyi wana wakulumba nawana wahashili upwenga wakufwika shili yavaIsalele vosena.
25 Halwola kanelu, mwangana alwezele vaLevi vemane kuzuvo yaYehova najingunga, navisaji vyamikole, natulyalya+ nge kutesa nalushimbi lwaNdavichi,+ naNgate+ uze apwile mutu wamwangana muka-kumona vyakumwenesa, nakapolofweto Natane.+ Lushimbi kanelu lwafumine kuli Yehova kuhichila muli vapolofweto jenyi.
26 Ngocho vaLevi vemanyine navisaji vyaNdavichi, kaha vapilishitu vemanyine najineta.+
27 Jino Hezekiya alwezele vatu valumbe vimuna vakuvatula halijiko lyakulumbila.+ Kahomu vaputukile kulumba uze wana wakulumba, vaputukile kwimba mwaso waYehova nakwimba nawa jineta jize jakavangijilenga chivumo chavisaji vyaNdavichi mwangana wavaIsalele.
28 Lizavu lyosena lyafukamine nakulifukula oku vaka-kwimba mwaso vali nakwimba, kaha nawa jineta jili nakuvuma. Valingile lika ngocho palanga nomu vakumishile kulumba wana.
29 Kahomu vakumishile kulumba uze wana, mwangana navatu vosena vaze apwile navo vafukamine hamavu nakulifukula.
30 Jino Mwangana Hezekiya navilolo valwezele vaLevi valise Yehova namyaso yaNdavichi+ naAsafwe+ muka-kumona vyakumwenesa. Ngocho valishile Kalunga nakuwahilila, kaha vafukamine hamavu nakulifukula.
31 Hezekiya ambile ngwenyi: “Hakuwana nge vanamijilika* muzachilenga jino Yehova, nehenu vimuna vakuvatula, namawana akusakwilila kuzuvo yaYehova.” Ngocho lizavu lyosena lyaputukile kuneha vimuna vakuvatula namawana akusakwilila. Vatu vosena vaze vapwile namichima yakulisuula vanehele mawana akulumba.+
32 Lizavu lyanehele vimuna vawana wakulumba vakuheta kuvangombe 70, navizamba jamikoko 100, navana vamikoko vavizamba 200. Vimuna vosenava vapwile vawana wakulumbila Yehova.+
33 Kaha vimuna vawana wajila vapwile vangombe 600, namikoko 3,000.
34 Oloze vapilishitu vapwile vavandende, kaha kavahashile kuva vimuna vawana wakulumbako. Ngocho vandumbwavo vaLevi vavakafwile+ palanga nomu vakumishile mulimo kanou, nomu nawa vapilishitu valijilikile+ mwomwo vaLevi vahakile chikuma muchima* kukulijilika kuhambakana vapilishitu.
35 Kaha nawa mawana akulumba,+ namaji amawana akusolola kuunda,+ namawana avinyo akuhanyina kumwe namawana akulumba+ avulile chikuma. Milimo yahazuvo yaYehova vaputukile cheka kuyizata.*
36 Ngocho Hezekiya navatu vosena vawahililile havyumevi avalingilile Kalunga wamuchano,+ mwomwo vyuma kana vyalingiwile mukukasumuna.
Kwinyikila Chamwishi
^ Chipwe “nakuvatoleka.”
^ Chipwe “lwakunokako.”
^ Kulumbununa, jimbolo jakuhana Kalunga.
^ Hepe., “Hakuwana nge munazalisa mavoko enu.”
^ Hepe., “vapwile namichima yakusungama.”
^ Chipwe “kuyilongesa.”
