Mijimbu 2 3:1-17
3 Jino Solomone aputukile kutunga zuvo yaYehova+ muYelusalema haPili yaMoliya,+ haze Yehova alisolwelele kuli ise Ndavichi.+ Ayitungilile hachihela chize awahishile Ndavichi, hachizungwilo chaOlonane+ kaYevuse.
2 Aputukile kuyitunga halikumbi lyamuchivali lyakakweji wamuchivali, mumwaka wamuchiwana wachiyulo chenyi.
3 Kaha chihela chize alile Solomone chakutungilaho zuvo yaKalunga wamuchano chapwile jikuvite 60 muusuku, najikuvite 20 muwihi,+ kweseka nomu vapiminenga kushikulu.*
4 Senge yize yapwile kulutwe yapwile jikuvite 20 muwihi, kaha yatesekele hamwe namuwihi wazuvo.* Mukujindama helu yapwile jikuvite 120. Kaha mukachi ashililemo ulu wakutomesa.+
5 Muzuvo yayinene alilemo maliva amunjunyipe, kaha ashililemo ulu wakutomesa.+ Kufumaho asonenemo vifwanyisa vyamikoma+ namalenge.+
6 Kaha zuvo ayishilile malolwa amwaza andando yayinene.+ Ulu+ azachishile wafumine kuPalavaime.
7 Eyi zuvo, namyalachi yayo, namikwilichi, najimbango jayo, namapito ayo avishilile ulu.+ Kaha hajimbango asoneneho vifwanyisa vyavakeluve.+
8 Kufumaho atungile kapete,* muze Mwajila Chikuma.+ Kapete kana muusuku katesekele hamwe namuwihi wazuvo. Kapwile jikuvite 20 muusuku, najikuvite 20 muwihi. Kapete kana akashilile ulu wakutomesa wakuteseka mujitalende* 600.+
9 Jimbambo jaulu jalemene jishekele* 50. Tupete twahelu atushilile ulu.
10 Jino muze Mwajila Chikuma atengelelemo vifwanyisa vyavakeluve vavali, kaha avashilile ulu.+
11 Mavava avakeluve+ osena asuhwile jikuvite 20. Livava lyakeluve umwe lyasuhwile jikuvite jitanu, kaha lyakwachile hambango yazuvo. Livava lyenyi likwavo lyasuhwile jikuvite jitanu, kaha lyakwachile kulivava lyakeluve mukwavo.
12 Livava lyakeluve mukwavo lyasuhwile jikuvite jitanu, kaha lyakwachile hambango yikwavo yazuvo. Livava lyenyi likwavo lyasuhwile jikuvite jitanu, kaha lyakwachile kulivava lyakeluve mukwavo.
13 Mavava avaze vakeluve osena apwile akutanduuka, kaha asuhwile jikuvite 20. Vemanyine, vatalile muze Mwajila.
14 Atongele nawa lihina lyakuvatasana+ lyawanda ulauluka, nawou waungonyi, nawou uchila, nawanda weka wamwaza. Atongeleleho vifwanyisa vyavakeluve.+
15 Kaha kulutwe lwazuvo atungilileko jipanda+ jivali jize jasuhwile jikuvite 35. Mutwe wapanda hipanda wazandamine jikuvite jitanu.+
16 Kaha atengele nawa malenge akufwana nge usanga, awahakile helu lyajipanda. Atengele nawa jiloma 100 nakujihaka kuli aze malenge.
17 Jize jipanda ajimikile kulutwe lwatembele. Panda yimwe ayimikile kuchilyo,* panda yikwavo ayimikile kuchimoswe.* Panda yakuchilyo ayilukile ngwenyi Yakine,* panda yakuchimoswe ayilukile ngwenyi Mbowaze.*
Kwinyikila Chamwishi
^ Kuvite yimwe yapwile jisendimita 44.5. Oloze vamwe ngwavo ‘kupima chakushikulu’ vavuluka hano chatalisa kukuvite yayisuku yize yapwile jisendimita 51.8. Tala Chihande B14.
^ Chipwe “jikuvite 20 kufuma hasongo nahasongo muwihi wazuvo.”
^ Hepe., “zuvo.”
^ Talende yimwe yapwile jikilongalamu 34.2. Tala Chihande B14.
^ Shekele yimwe yapwile jingalamu 11.4. Tala Chihande B14.
^ Chipwe “kusulo.”
^ Chipwe “kunote.”
^ Ulumbunwiso, “[Yehova] Azamise.”
^ Kulumbununa pamo, “Ngolo.”
