Mijimbu 2 30:1-27
-
Hezekiya mwalinga chiwanyino chaPaseka (1-27)
30 Hezekiya atumine mazu kuli vaIsalele+ navaYuta vosena, asonekele nawa mikanda kuli vaEfwalime navaManase+ mangana vezenga kuzuvo yaYehova muYelusalema valingile Yehova Kalunga kaIsalele+ chiwanyino chaPaseka.
2 Oloze mwangana, navilolo jenyi, nalizavu lyosena muYelusalema valivwasanyine kulinga Paseka mukakweji wamuchivali.+
3 Kavahashile kulinga chiwanyino kana mukakweji wakulivangako+ mwomwo kakwapwile vapilishitu vavavulu vaze valijilikileko,+ kaha nawa vatu kavalikungulwile muYelusalemako.
4 Mwangana nalizavu lyosena vamwene chuma valivwasanyine kupwa chakwoloka.
5 Ngocho valikashile kuvilika luvila muIsalele mwosena, kufuma kuMbele-sheva swi nakuNdane+ lwakwamba nge vatu vezenga kuYelusalema nakulingila Yehova Kalunga kaIsalele chiwanyino chaPaseka, mwomwo kunyima kavalikungulwile hamwe nakulinga chiwanyino kana nge kutesa nomu vasonekako.+
6 Jino tunganda* vambachile mikanda avahanyine mwangana navilolo jenyi, vayile kuli vaIsalele navaYuta vosena. Mumikanda kana mwangana ambile ngwenyi: “Enu vaIsalele, kindulukenu kuli Yehova Kalunga kaApalahama, naIsaka, naIsalele, mangana naikiye akinduluke kuli vasalaho vaze vanapuluka mumavoko avamyangana javaAsulya.+
7 Kanda namupwa nge vakakuluka jenu navandumbwenuko vaze valingile vyuma vyavipi kumeso aYehova Kalunga kavakakuluka javo numba avanongese, nge omu munalimwena nameso enu.+
8 Shikaho kanda namukakamisa michima yenu ngana mwavakakuluka jenuko.+ Liluulenu kuli Yehova, twayenu kuchihela chenu chajila+ chize najilika haya myaka yosena mumuzachile Yehova Kalunga kenu mangana apeule utenu wenyi hali enu.+
9 Kachi nge namukinduluka kuli Yehova, kaha vandumbwenu navana venu navavevwila keke kuli vaze vanavakwate ufunge+ nakuvetavisa vakinduluke kulifuchi lino.+ Mwomwo Yehova Kalunga kenu apwa muka-kutetela,* wakeke.+ Keshi kumyumba nyimako nge namukinduluka kuli ikiye.”+
10 Ngocho vaze tunganda* vayile kujinganda josena jamungalila yavaEfwalime, navaManase,+ navaZevulune. Oloze vatu vapwile nakuvaseha nakuvahenda.+
11 Chipwe ngocho, vatu vamwe vakuli vaAshele, navaManase, navaZevulune valinyishile nakuya kuYelusalema.+
12 Jino Kalunga wamuchano akiswile vaYuta valinunge hamwe* nakulinga vyuma vize avalwezele Yehova kuhichila muli mwangana navilolo.
13 Ngocho vatu vavavulu vakungulukile muYelusalema mangana valinge Chiwanyino chaJimbolo Jakuzeneka Chimbalwila+ mukakweji wamuchivali.+ Lyapwile lizavu lyalinene chikuma.
14 Vafumishile majiko akulumbila aze apwile muYelusalema.+ Vafumishile nawa majiko akulumbila vyuma vyalivumba lyamwaza+ osena nakuwambila muChinema chaKichilone.
15 Kufumaho vajihile chimuna wakuvatula waPaseka halikumbi lyakusokesa 14 lyakakweji wamuchivali. Vapilishitu navaLevi vevwile sonyi, ngocho valijilikile nakuneha mawana akulumba kuzuvo yaYehova.
16 Vemanyine muvihela vyavo kweseka naJishimbi jaMose, mutu waKalunga wamuchano. Kaha vapilishitu vasapwilile aze manyinga+ vavahanyine kuli vaLevi halijiko lyakulumbila.
17 Hakuwana nge halizavu hapwile vatu vavavulu vaze kavalijilikileko, ngocho vaLevi vajihilile vatu vaze vapihile+ vimuna vakuvatula vaPaseka mangana vavajilike kumeso aYehova.
18 Vatu vavavulu, chikumanyi vaEfwalime, navaManase,+ navaIsakale, navaZevulune kavalitomeseleko, oloze valile Paseka chakuzeneka kukavangiza vyuma vasoneka. Ngocho Hezekiya avalombelele ngwenyi: “Yehova uze apwa wamwaza,+ akonekele
19 vosena vaze vanalizange mumichima yavo nakutondatonda Kalunga wamuchano+ Yehova, Kalunga kavakakuluka javo, numba tuhu kavalitomesele kweseka najindongi jakulitomesako.”+
20 Ngocho Yehova evwililile Hezekiya, kaha akonekelele* vatu.
21 Jino vaIsalele vaze vapwile muYelusalema vawahililile chikuma+ nakulinga Chiwanyino chaJimbolo Jakuzeneka Chimbalwila+ hamakumbi 7. VaLevi navapilishitu valishilenga Yehova hakumbi hakumbi, vamwimbililenga Yehova visaji.+
22 Hezekiya akolezezele* vaLevi vosena vaze vazachililenga Yehova namuchima wakunangakana. Vatu vosena valile hamakumbi osena 7 achiwanyino.+ Vahanyinenga vimuna vamawana akusolola kuunda,+ vasakwililenga Yehova Kalunga kavakakuluka javo.
23 Kufumaho lizavu lyosena lyalivwasanyine kulinga chiwanyino kana hamakumbi akwavo 7. Kaha vachilingile nakuwahilila hamakumbi aze 7.+
24 Hezekiya mwangana wavaYuta ahanyinyineko lizavu vakuji javangombe 1,000 namikoko 7,000. Vilolo nawa vahanyinyineko lizavu vakuji javangombe 1,000 namikoko 10,000.+ Vapilishitu vavavulu valijilikile.+
25 Lizavu lyosena lyavaYuta, navapilishitu, navaLevi, nalizavu lyosena lize lyafumine muIsalele,+ navamwiza+ vaze vafumine mulifuchi lyaIsalele, navamwiza vaze vatwaminenga muYuta vawahilililenga.
26 Vatu vawahililile chikuma muYelusalema mwomwo kakwapwile chiwanyino chakufwana nge chizeko, kufuma vene hamakumbi aSolomone mwanaNdavichi mwangana wavaIsalele.+
27 Jino vapilishitu vaze vapwile vaLevi vemanyine nakukisula vatu,+ kaha Kalunga avevwililile. Kulomba chavo chahetele mwilu, muchihela chenyi chajila muze atwama.
Kwinyikila Chamwishi
^ Hepe., “vaka-kulaha.”
^ Chipwe “muka-kukokweza.”
^ Hepe., “vaka-kulaha.”
^ Hepe., “ahanyine vaYuta muchima umwe.”
^ Hepe., “okile.”
^ Hepe., “ahanjikile kumichima.”
