Mijimbu 2 31:1-21
31 Omu chakumine chiwanyino, vaIsalele vosena vaze vapwile kuchiwanyino vayile mujinganda javaYuta, vapuzwile jipanda jajila jamalolwa,+ vatetele jipanda jajila jamitondo,*+ nakusanda vihela vyakulunduka+ namajiko akulumbila+ mujingalila javaYuta, navaMbenjamine, navaEfwalime, navaManase,+ palanga nomu vakumishile kulinga ngocho. Kufumaho vaIsalele vosena vakindulukile kujinganda javo, mutu himutu kuluheto lwenyi.
2 Jino Hezekiya atongwele vapilishitu mumazavu avo,+ navaLevi nawa mumazavu avo.+ Vapilishitu navaLevi vavatongwele mutu himutu azatenga milimo yenyi,+ ahanenga mawana akulumba, namawana akusolola kuunda, azatenga milimo yaKalunga, nakumusakwilila, nakumwalisa kuvikolo vyakuvipango* vyazuvo yaYehova.+
3 Mwangana ahanyine luheto lwenyi lumwe kupwa mawana akulumba+ achimene nawawa achingoloshi,+ namawana akulumba hajiSambata,+ nahakumweka chakakweji,+ nahaviwanyino,+ kweseka nomu vasoneka muJishimbi jaYehova.
4 Mwangana alwezele nawa vatu vamuYelusalema vahanenga vapilishitu navaLevi vyazano vyavo,+ mangana vahase kukavangiza jishimbi jaYehova.
5 Omu vaIsalele vevwile mazu amwangana, vanehele jimbuto jakulivanga jamanona jajivulu, navinyo vyavihya vyavivulu, namaji+ amavulu, nauchi wauvulu, najimbuto jeka jamumande josena.+ Vanehele vyuma vyavivulu vyakusokesa mumakumi vyakuvyuma vyavo vyosena.+
6 Kaha vaIsalele navaYuta vaze vatwaminenga mujinganda javaYuta navakiko vanehele vangombe namikoko vakusokesa mumakumi, navyuma vyajila+ vyakusokesa mumakumi vize vajilikilile Yehova Kalunga kavo. Vyosena vavinehele nakuvilumbika milumba milumba.
7 Vaputukile kulumbika mawana avo mukakweji wamuchitatu,+ kaha vamanyishile mukakweji wakusokesa 7.+
8 Omu Hezekiya navilolo vejile, vamwene yize milumba, ngocho valishile Yehova nakukisula vatu jenyi vaIsalele.
9 Jino Hezekiya ahulishile vapilishitu navaLevi kutalisa kuli yize milumba.
10 Kaha kapilishitu wamukulwane Azaliya wakuzuvo yaZatoke amukumbulwile ngwenyi: “Kufuma haze vaputukile vatu kuneha mawana muzuvo yaYehova,+ vanapunga nakulya nakwikuta, oloze kuchinasale vyavivulu chikuma mwomwo Yehova nakisula vatu jenyi. Evi vili aha vikiko vinasaleho.”+
11 Ngocho Hezekiya avalwezele vawahise tupete vakutulikila*+ muzuvo yaYehova, kaha vavawahishile.
12 Vanehelenga nakashishi mawana, navyuma vyakusokesa mumakumi+ navyuma vyajila. Konanyiya kaLevi ikiye apwile kapitau uze atalilenga mawana kana, kaha ndumbwenyi Shimei ikiye apwile muhato wenyi.
13 Yehyele, naAzajiya, naNahate, naAsahele, naYelimote, naYozavate, naElyele, naIshimakiya, naMahate, naMbenaya vakiko vapwile vatemesa vaze vakafwilenga Konanyiya nandumbwenyi Shimei, nge kutesa nomu ahanjikile Mwangana Hezekiya. Kaha Azaliya ikiye apwile kapitau wakuzuvo yaKalunga wamuchano.
14 Kole mwanaImina, kaLevi uze apwile muka-kulama kuchikolo chakumutamba wakumututuko+ ikiye atalilenga mawana akulisakila+ aKalunga wamuchano. Ikiye nawa apangililenga wana uze vahanyinenga Yehova+ navyuma vyajila chikuma.+
15 Etene, naMinyamine, naYeshuwa, naShemaya, naAmaliya, naShekanyiya vakiko vapwile mwishi yenyi mujinganda javapilishitu,+ kaha vazachilenga milimo yatela vatu vakashishi. Vapangililenga vandumbwavo vavalemu navava vamokomoko vyazano vyakuteseka hamwe mumazavu avo.+
16 Vapangilile nawa malunga vamyaka yakusemuka yitatu nakuya kwilu vaze vasonekele kweseka navisaka vyavo, vaze vejilenga hakumbi hakumbi nakuzachila kuzuvo yaYehova, nakuzata milimo yamumazavu avo.
17 Vapilishitu vavasonekele kweseka navisaka vyavo najizuvo javakakuluka javo.+ Kahomu mukiko vasonekele navaLevi vaze vapwile namyaka yakusemuka 20 nakuya kwilu+ kweseka namilimo yamumazavu avo.+
18 Hali vaze vasonekele kweseka navisaka vyavo hapwile navana vavo vosena, vamalunga navava vamapwevo, namapwevo javo, nalizavu lyavo lyosena. Valijilikile vazatenga milimo yajila mwomwo vazachilenga milimo yatela vatu vakashishi.
19 Hapwile nawa vapilishitu, vaka-tanga yaAlone, vaze vatwaminenga mujingalila* jajingilikile jinganda javo.+ Vatongwele malunga vaze vavulukile hamajina mujinganda josena mangana vahane vyazano kuli vapilishitu vosena nakuli vaLevi vaze vasonekele kweseka navisaka vyavo.
20 Hezekiya alingile vyumevi muYuta mwosena, alingilenga lika vyuma vyamwaza, vyakwoloka kumeso aYehova Kalunga kenyi, kaha apwile wakushishika.
21 Vyuma vyosena alingile hakutondatonda Kalunga kenyi, numba vipwa vyakupandama kuzuvo yaKalunga wamuchano+ chipwe vyakupandama kuJishimbi, avilingilenga namuchima wenyi wosena, kaha afukililenga.
Kwinyikila Chamwishi
^ Tala Mukana waMazu.
^ Hepe., “vyakuvilombo.”
^ Chipwe “tupete vakulila.”
^ Hepe., “muvipapa.”
