Mijimbu 2 32:1-33
32 Omu vyakumine vyumevi namilimo eyi yamwenemwene+ azachile Hezekiya, Senakelive mwangana waAsulya ejile nakulukuka Yuta. Ahakile jinganda jakukingiwa muchingombela mangana ngwenyi ajilukuke nakujitambula.+
2 Omu Hezekiya amwene ngwenyi Senakelive neza mangana alwenga jita navatu vamuYelusalema,
3 atwamine punga navilolo jenyi navatu jenyi vaka-kulwa jita mangana vajike tuselwoke vakuweluka wanganda,+ kaha vamukafwile.
4 Vatu vavavulu valikungulwile, vajikile tuselwoke vosena natulwiji vaze vahichile mulifuchi vosena, mwomwo vambile ngwavo: “Vamyangana javaAsulya kanda naveza nakuwana meya amavuluko.”
5 Hezekiya alikolezezele nakutungulula kembwe yosena yize yapuzukile, kaha atungilileho tuposhi. Atungile nawa kembwe yikwavo yakusali. Awahishile nawa Mulundu*+ waNganda yaNdavichi, atungile vitwa* vyavivulu najikepwe jajivulu.
6 Kufumaho atongwele tupitau twamaswalale mangana valame vatu, kaha avakungulwilile kuchihela chasanga, kuchikolo changanda. Avakolezezele* ngwenyi:
7 “Umikenu, jikizenu. Kanda namwivwa woma chipwe kulizuzukila mwomwo yamwangana waAsulya+ nalizavu lyenyiko. Kuli etu kuli vavavulu kuhambakana vaze vali kuli ikiye.+
8 Ikiye napendamina hangolo javatu, oloze etu Yehova Kalunga ketu ikiye mwatukafwa nakutwashila jita.”+ Ngocho vatu vakwachile ngolo hakwivwa mazu awa ahanjikile Hezekiya mwangana wavaYuta.+
9 Jino Senakelive mwangana waAsulya apwile kuLakishe+ namaswalale jenyi vosena. Kaha atumine vangamba jenyi kuYelusalema kuli Hezekiya mwangana wavaYuta nakuli vaYuleya vosena muYelusalema+ ngwenyi:
10 “Senakelive mwangana waAsulya nambe ngwenyi, ‘Uno munafwelela haka numba mutwame lika muYelusalema okunyi vanayihake muchingombela?+
11 Hezekiya ali nakumihungumwisa mangana mufwenga kuzala nalipwila hakwamba ngwenyi: “Yehova Kalunga ketu mwatupululula mulivoko lyamwangana waAsulya.”+
12 Ou Hezekiya ngwetu ikiye afumishile vihela vyakulunduka+ vyaKalunga kenu* namajiko enyi akulumbila.+ Ikiye nawa alwezele vatu vamuYuta namuYelusalema ngwenyi: “Mwatela kulifukula kulijiko lyakulumbila limwe kaha. Halijiko kana hakiko mwatela kulumbanga vimuna jenu vakuvatula mangana vakakumuke wishi.”+
13 Uno kamwatachikijile vyuma ngwalingile navakakuluka jami kuli vatu veka naveka vakumafuchi osenako nyi?+ Kutala tulunga twavaka-mafuchi vahashile kupululula mafuchi avo mulivoko lyami numba?+
14 Kalunga muka hatulunga twavaka-mafuchi aze vanongesele kuli vakakuluka jami ahashile kupululula vatu jenyi mulivoko lyami numba enu mufwelele ngwenu Kalunga kenu mwamipululula mulivoko lyami?+
15 Shikaho kanda namwitavila Hezekiya amyonge nakumihungumwisako.+ Kanda namumufwelelako, mwomwo kakweshi kalunga kavaka-mafuchi chipwe kalunga kawangana, uze ahashile kupululula vatu jenyi mulivoko lyami chipwe mumavoko avakakuluka jamiko. Ngocho naKalunga kenu keshi kuhasa kumipululula mulivoko lyamiko.’”+
16 Vangamba jaSenakelive vasawile chikuma Yehova Kalunga wamuchano nangamba yenyi Hezekiya.
17 Senakelive asonekele nawa mikanda+ yakusaula Yehova Kalunga kaIsalele+ nakumutoleka, ngwenyi: “Kalunga kaHezekiya keshi kuhasa kupululula vatu jenyi mulivoko lyamiko,+ ngana muze tulunga twavaka-mafuchi vahonene kupululula vatu javo mulivoko lyami.”
18 Vatambakanyinenga namazu akukanguka mulilimi lyavaYuleya kuli vatu vamuYelusalema vaze vapwile hakembwe mangana vavevwise woma, vavazuzwise nakuvatambula nganda yavo.+
19 Vasawile Kalunga kaYelusalema ngana muze vasawilenga tulunga twavatu veka naveka vahamavu, tulunga vakutenga kumavoko avatu.
20 Oloze Mwangana Hezekiya nakapolofweto Isaya+ mwanaAmoze valombelenga lika hachumechi nakutwa kawelele kuli Kalunga wamwilu.+
21 Jino Yehova atumine kangelo kenyi, ajihile vaka-kwasa jita vangolo vosena,+ navatwamina vosena, natupitau vosena muchilombo chamwangana waAsulya, kaha mwangana waAsulya akindulukile kulifuchi lyenyi nasonyi. Kufumaho akengilile muzuvo* yakalunga kenyi, kaha vana venyi vamwe vamujihile napoko yamukwale.+
22 Ngocho Yehova apululwile Hezekiya navatu vamuYelusalema mulivoko lyaSenakelive mwangana waAsulya namumavoko avatu veka vosena. Avalingishile vatwame mukuunda chakuzeneka kuvazungisa kuli vaka-kole javo vaze vavajingilikile.
23 Vatu vavavulu vanehelele Yehova mawana kuYelusalema nakunehela nawa Hezekiya mwangana wavaYuta vyuma vyamwaza.+ Ngocho Hezekiya vamuvumbikilenga chikuma kuli vaka-mafuchi osena.
24 Hamakumbi aze, Hezekiya avijile chikuma, kaha hasalile hahandende nakufwa. Ngocho alombele kuli Yehova,+ kaha amukumbulwile nakumuhana chinjikizo.*+
25 Oloze Hezekiya kasakwililile havyumevi vyamwaza vamulingilileko. Alivwimbile, ngocho Kalunga amukwachilile utenu nakukwachila nawa vatu vamuYuta namuYelusalema utenu.
26 Jino Hezekiya navatu vamuYelusalema valinyishile nakumbila muchima+ wakulivwimba vapwile nawo, kaha Yehova apewile utenu wenyi hali vakiko hamakumbi aze aHezekiya.+
27 Hezekiya apwile naluheto lwaluvulu naulemu chikuma.+ Kaha atungile jizuvo+ jize atulikililenga palata, naulu, namalolwa andando yayinene, namaji ambalasamu, najikepwe, navyuma vyeka vyamwaza.
28 Atungile nawa visete vyakulamina jimbuto jamanona, navinyo vyavihya, namaji. Atungile nawa memba amikoko nawawa avimuna vakulisezaseza vosena.
29 Ahetele jinganda, navimuna vavavulu vakufwana nge mikoko navangombe, mwomwo Kalunga amuhanyine luheto lwaluvulu chikuma.
30 Hezekiya ajikile nawa kaselwoke+ kahelu kaNgihone+ nakukondolola meya ashikumuke kumulauko, kuNganda yaNdavichi.+ Hezekiya afukililenga mumilimo yosena azachilenga.
31 Oloze omu vilolo vamuMbavilone vatumine vaka-kuvahanjikilako vakahulise Hezekiya vyachinjikizo*+ chize chasolokele mulifuchi,+ Kalunga wamuchano asezele Hezekiya mangana amweseke,+ atachikize vyuma vyosena vyapwile mumuchima wenyi.+
32 Mujimbu wosena waHezekiya wavyuma alingile, nazangi yenyi yakwilila+ asolwele vavisoneka muchakumwenesa vamumwenesele kapolofweto Isaya+ mwanaAmoze, muMukanda waVamyangana javaYuta navaIsalele.+
33 Hezekiya atokele ngana mwavakakuluka jenyi, kaha vamufunjile kumukandu, kufuka yavana vaNdavichi.+ VaYuta vosena navatu vamuYelusalema vamuvumbikile hakufwa chenyi. Kaha mwanenyi Manase aswanyine hawangana.
Kwinyikila Chamwishi
^ Chipwe “Milo.” Milo hilizu lyachiHepeleu lyalumbununa “kuzala.”
^ Chipwe “matongo.”
^ Hepe., “Ahanjikile kumichima yavo.”
^ Hepe., “kenyi.”
^ Chipwe “mutembele.”
^ Chipwe “chuma chakukomwesa.”
^ Chipwe “vyachuma chakukomwesa.”
