Mijimbu 2 33:1-25
33 Manase+ aputukile kuyula omu apwile namyaka yakusemuka 12, kaha ayulile myaka 55 muYelusalema.+
2 Manase alingilenga vyuma vyavipi kumeso aYehova. Alingilenga vyuma vyaunyengwe vize valingilenga vaka-mafuchi vaze ahangile Yehova kumeso avaIsalele.+
3 Atungulwile vihela vyakulunduka vize apuzwile ise Hezekiya.+ Atungilile vaMbale majiko akulumbila, atungile najipanda jajila jamitondo.* Alifukwilenga kumayongomena amwilu osena nakuwazachilanga.+
4 Atungile nawa majiko akulumbila muzuvo yaYehova yize ahanjikile Yehova+ ngwenyi: “MuYelusalema mukiko navavulukilanga lijina lyami haya myaka yosena.”+
5 Atungilile mayongomena amwilu majiko akulumbila muvipango vivali vyakuzuvo yaYehova.+
6 Manase alumbile vana venyi mukakahya+ muChinema chaMwanaHinome,+ alingilenga visava,+ atahilenga jingombo, apanjile, atongwelenga vaka-kutahisa vashipilitu, navaka-kulweza vyuma vyakulutwe.+ Alingilenga vyuma vyavipi vyavivulu kumeso aYehova mangana amwivwise kupihya.
7 Kaha likombelo lyakusonga lyapanda yajila yamutondo lize atengele alihakile muzuvo yaKalunga wamuchano+ yize ahanjikile Kalunga kuli Ndavichi nakuli mwanenyi Solomone ngwenyi: “Muzuvo yino, naYelusalema eyi ngunasakula mumiyachi yavaIsalele yosena, navavulukilangamo lijina lyami haya myaka yosena.+
8 Kachi nge vaIsalele navalama vyuma vyosena ngwavalwezele, nge navalama Jishimbi josena, najindongi, namazu akuyula vize ngwavahanyine kuhichila muli Mose, kaha kangweshi kukavahanga mulifuchi lize ngwahanyine vakakuluka javoko.”
9 Manase ahungumwishile vaYuta navatu vamuYelusalema nakuvalingisa valinge vyuma vyavipi chikuma kuhambakana vize valingilenga vaka-mafuchi vaze anongesele Yehova kumeso avo.+
10 Yehova ahanjikililenga lika Manase navatu jenyi, oloze vakiko kavamwivwilililengako.+
11 Ngocho Yehova avakatwilile tupitau twamaswalale jamwangana waAsulya, kaha vakwachile Manase namalovo, vamukashile malenge aunengu avali nakumutwala kuMbavilone.
12 Oloze omu apwile muluyando, alembelelele Yehova Kalunga kenyi mangana amwivwile kuwaha. Alinyishile chikuma kumeso aKalunga kavakakuluka jenyi.
13 Alombelenga lika kuli Kalunga, kaha Kalunga evwile kulomba chenyi amulombele mangana amwivwile uselewa, ngocho amwivwililile keke. Kaha amukindulwishile kuYelusalema nakumuhana cheka wangana wenyi.+ Manase atachikijile jino ngwenyi Yehova ikiye Kalunga wamuchano.+
14 Kufumaho, Manase atungile kembwe yakusali yaNganda yaNdavichi,+ kumulauko waNgihone+ muchinema.* Kembwe kana yahetele nakuChikolo chaVaishi,+ kaha yajingulukile nakukaheta nakuOfwele.+ Kembwe kana yapwile yayisuku chikuma mukujindama helu. Kaha Manase atongwele tupitau twamaswalale mujinganda jakukingiwa jamuYuta josena.
15 Kufumaho, afumishile tulunga twavaka-mafuchi eka nalikombelo muzuvo yaYehova.+ Afumishile nawa majiko akulumbila osena aze atungile hapili yazuvo yaYehova+ namuYelusalema. Kaha vyosena avimbilile kuweluka wanganda.
16 Awahishile nawa lijiko lyakulumbila lyaYehova,+ kaha aputukile kulumbilaho vimuna vamawana akusolola kuunda+ navimuna vamawana akusakwilila.+ Alwezele vaYuta vazachilenga Yehova Kalunga kaIsalele.
17 Chipwe ngocho, vatu valumbililenga lika Yehova Kalunga kavo vimuna havihela vyakulunduka.
18 Mujimbu wosena waManase wavyuma alingile, nakulomba alombele kuli Kalunga kenyi, namazu avaka-kumona vyakumwenesa vaze vamuhanjikililenga mulijina lyaYehova Kalunga kaIsalele vavisoneka mumijimbu yavamyangana javaIsalele.
19 Kaha nawa kulomba chenyi,+ nomu Kalunga amuhanyine vyuma amulembelelele, najishili jenyi josena, navilinga vyenyi vyakuhenga vyosena,+ noku atungililile vihela vyakulunduka nakujika jipanda jajila jamitondo*+ namakombelo akusonga shimbu kanda alinyise, vyatwama mumijimbu vasonekele vatu jenyi vaka-kumona vyakumwenesa.
20 Manase atokele ngana mwavakakuluka jenyi, kaha vamufunjile hazuvo yenyi. Kaha mwanenyi Amone aswanyine hawangana.+
21 Amone+ aputukile kuyula omu apwile namyaka yakusemuka 22, kaha ayulile myaka yivali muYelusalema.+
22 Amone alingilenga vyuma vyavipi kumeso aYehova nge muze alingilenga ise Manase.+ Makombelo akusonga aze atengele ise awalumbililenga vimuna vakuvatula, kaha awalemeselenga.+
23 Amone kalinyishile kumeso aYehova+ ngana muze alinyishile ise Manaseko.+ Aswezele kuvulumuna milonga.
24 Kutwala muze vangamba jenyi vamufumbukilile+ nakumujihila muzuvo yenyi.
25 Oloze vatu vamulifuchi lize vajihile vangamba vaze vafumbukilile Mwangana Amone.+ Kaha vaswanyishile mwanenyi Yoshiya+ hawangana waise.
