Mijimbu 2 34:1-33
34 Yoshiya+ aputukile kuyula omu apwile namyaka yakusemuka 8, kaha ayulile myaka 31 muYelusalema.+
2 Yoshiya alingilenga vyuma vyakwoloka kumeso aYehova, akavilenga jijila josena jakakuluka yenyi Ndavichi, kaha kahandukilile kuchilyo chipwe kuchimosweko.
3 Yoshiya aputukile kutondatonda Kalunga kakakuluka yenyi Ndavichi+ mumwaka wakusokesa 8 wachiyulo chenyi, omu apwile kanyike. Kaha mumwaka wakusokesa 12, aputukile kutomesa muYuta namuYelusalema+ hakufumisamo vihela vyakulunduka,+ najipanda jajila jamitondo,* namakombelo akusonga,+ nawawa akuzuzulula.
4 Kufumaho vatu vapuzwojwele majiko akulumbila avaMbale kumeso enyi. Yoshiya atetele vitumbikilo vyavyuma vyalivumba lyamwaza vize vyapwile helu lyamajiko kana. Apazwojwele nawa jipanda jajila jamitondo,* namakombelo akusonga nawawa akuzuzulula, avichikile chikichiki nakusala ungululu kaha. Ambachile uze ungululu nakuukuva havimbumbe vyavaze valumbililenga vyuma kana vimuna vakuvatula.+
5 Yoshiya ochele vifuwa vyavapilishitu hamajiko avo akulumbila.+ Ngocho atomesele muYuta namuYelusalema.
6 Kaha nawa mujinganda javaManase, navaEfwalime,+ navaShimeyone, swi nakuli vaNafwatale, namujingundu javo mwosena,
7 Yoshiya apuzwilemo majiko akulumbila nakupazwojola jipanda jajila jamitondo,* namakombelo akusonga,+ kaha avichikile chikichiki. Atetele nawa vitumbikilo vyavyuma vyalivumba lyamwaza vyosena mulifuchi lyaIsalele lyosena.+ Kufumaho akindulukile kuYelusalema.
8 Mumwaka wakusokesa 18 wachiyulo chenyi, omu alingile hanatomesa lyehi mulifuchi namutembele,* atumine Shafwane+ mwanaAzaliya, naMaseya mukulwane wanganda, naYowa mwanaYowahaze, muka-kulama mijimbu yawangana vayenga nakuwahisa zuvo yaYehova Kalunga kenyi.+
9 Ava malunga vayile kuli kapilishitu wakulitulaho Hilikiya, vamuhanyine jimbongo jize vanehele vatu kuzuvo yaKalunga. VaLevi vaka-kulama kuvikolo vakiko vatambwile jimbongo kana kuli vaManase, navaEfwalime, navaIsalele+ veka vosena, navaYuta, navaMbenjamine, navatu vamuYelusalema.
10 Jimbongo kana vajihanyine kuli vaze vatongwele kutala mulimo wakuzuvo yaYehova. Kaha vaka-kuzata kuzuvo yaYehova vazachishile jimbongo kana kumulimo wakutungulula zuvo nakuyiwahisa.
11 Jimbongo kana vajihanyine kuli vitotombwe nakuli vaka-kutunga mangana valande malolwa akwola, namaliva akunungisa, namyalachi yakutungisa jizuvo jize vamyangana javaYuta vechelelele jilyenyeke.+
12 Ava malunga vazachile milimo kana nakashishi,+ kaha tulama twavo vapwile vaLevi. VaLevi kana vapwile Yahate naOvachiya vakutanga yavaMelali,+ naZekaliya naMeshulame vakutanga yavaKohate.+ Kaha vaLevi vaze vapwile vakuluwa vaka-kwimba+
13 vakiko vatalilenga vaka-kuzata milimo yeka.* Vapwilenga nawa tulama twavatu vosena vaze vazachilenga milimo yakulisezaseza. VaLevi vamwe vapwilenga vaka-kusoneka, navakulwane, navaka-kulama kuvikolo.+
14 Omu vapwile nakulovola jimbongo vanehele vatu kuzuvo yaYehova,+ kapilishitu Hilikiya awanyine mukanda waJishimbi+ jize Yehova ahanyine kuhichila muli* Mose.+
15 Ngocho Hilikiya ambile kuli Shafwane muka-kusoneka ngwenyi: “Ngunawane mukanda waJishimbi muzuvo yaYehova.” Kaha Hilikiya ahanyine Shafwane uze mukanda.
16 Shafwane atwalile uze mukanda kuli mwangana, amulwezele ngwenyi: “Etu vangamba jove tuli nakuzata milimo yosena unatuhane.
17 Tunambate jimbongo jize japwanga muzuvo yaYehova, kaha tunajihane kuli vaze vatongola kutala mulimo nakuli vaze vali nakuzata mulimo.”
18 Shafwane muka-kusoneka alwezele nawa mwangana ngwenyi: “Kapilishitu Hilikiya nanguhane mukanda.”+ Kaha Shafwane atangile uze mukanda kumeso amwangana.+
19 Omu mwangana evwile mazu amumukanda waJishimbi, apihililile nakupula uvwalo wenyi.+
20 Kaha alwezele Hilikiya, naAhikame+ mwanaShafwane, naAvatone mwanaMika, naShafwane muka-kusoneka, naAsaya ngamba yamwangana ngwenyi:
21 “Yenunga mukangwihwile kuli Yehova, nakwihwilako nawa vatu vaze vanasale muIsalele namuYuta hamazu amumukanda ou vanawane. Yehova natukwachila matoto amanene chikuma mwomwo vakakuluka jetu kavononokele mazu aYehova nakulinga vyuma vyosena vize vasoneka mumukanda ouko.”+
22 Ngocho Hilikiya navakwavo vaze atumine mwangana, vayile kuli kapolofweto Huluta.+ Huluta apwile pwevo lyaShalume mwanaChikiva, Chikiva mwanaHalahase uze apwile muka-kulama kapete kakutulikila uvwalo. Huluta atwaminenga Mundandanda Yayihya muYelusalema, kaha vahanjikile nenyi kuze.+
23 Huluta ambile kuli vakiko ngwenyi: “Yehova Kalunga kaIsalele nambe ngwenyi, ‘Lwezenu mutu ou namitumu kuli ami ngwenu:
24 “Yehova nambe ngwenyi, ‘Nanguneha lupi hanganda yino nahali vatu vatwamamo,+ nge omu munayi vyangu vyosena vasoneka mumukanda+ ou vanatangila mwangana wavaYuta.
25 Hakuwana nge vananguseze+ nakulumbila tulunga veka vimuna vakuvatula mangana vangwivwise kupihya+ navilinga vyavo, shikaho utenu wami nawiza hanganda yino, kaha kaweshi kukumako.’”+
26 Oloze lwezenu mwangana wavaYuta uze namitumu mumwihwile kuli Yehova ngwenu, “Yehova Kalunga kaIsalele nambe kuli ove kutalisa kumazu awa unevu ngwenyi:+
27 ‘Hakuwana nge unavwovuwisa muchima wove nakulinyisa kumeso ayami Kalunga hakwivwa omu ngunahanjika hanganda yino nahali vatu vatwamamo, kahove nawa unalinyisa kumeso ami, unapihilila nakupula uvwalo wove nakulila kumeso ami, shikaho ngunakwivu.+ Omu mukiko ngunambe ami Yehova.
28 Shikaho nangukwecha utoke ngana mwavakakuluka jove, kaha navakakufunda mukuunda muchimbumbe chove. Kaweshi kukamona lupi elu ngunajinyi kuneha hanganda yino nahali vatu vatwamamoko.’”’”+
Ngocho vakindulukile nakulweza mwangana mazu osena awa.
29 Jino mwangana atumine mazu vasanyike vakulwane vosena vamuYuta namuYelusalema,+ kaha vakungulukile.
30 Mwangana ayile kuzuvo yaYehova navatu vamuYuta, navatu vamuYelusalema, navapilishitu, navaLevi, vatu vosena vavalemu navava vamokomoko. Avatangilile mazu amumukanda walushiko uze vawanyine muzuvo yaYehova.+
31 Jino mwangana emanyine muchihela chenyi, kaha alishikile lushiko*+ kumeso aYehova ngwenyi mwatambukanga mujijila jaYehova, nakulamanga jishimbi jenyi, namazu enyi akwanukisa, najindongi jenyi. Mwalinganga ngocho namuchima wenyi wosena, namwono*+ wenyi wosena, nakukava mazu alushiko vasoneka mumukanda kana.+
32 Kufumaho alwezele vatu vamuYelusalema, navaMbenjamine vosena vetavile mazu alushiko kana. Kaha vatu vamuYelusalema valingile nge kutesa nalushiko lwaKalunga kavakakuluka javo.+
33 Yoshiya afumishile vyuma vyaunyengwe* vyosena mujingalila javaIsalele josena.+ Kaha alwezele vatu vosena muIsalele vazachilenga Yehova Kalunga kavo. Hamakumbi osena ayoyele Yoshiya, vaIsalele kavapyapumukile mujijila jaYehova Kalunga kavakakuluka javoko.
Kwinyikila Chamwishi
^ Tala Mukana waMazu.
^ Tala Mukana waMazu.
^ Tala Mukana waMazu.
^ Hepe., “namuzuvo.”
^ Chipwe “vaka-kumbata viteli.”
^ Hepe., “mumavoko.”
^ Chipwe “alishikile cheka lushiko.”
^ Tala Mukana waMazu.
^ Chipwe “afumishile makombelo.”
