Mijimbu 2 35:1-27
35 Jino Yoshiya alingilile Yehova chiwanyino chaPaseka+ muYelusalema, kaha vajihile chimuna wakuvatula waPaseka+ halikumbi lyakusokesa 14 lyakakweji wakulivanga.+
2 Yoshiya ahanyine vapilishitu milimo nakuvakolezeza vazate milimo yavo yakuzuvo yaYehova.+
3 Kaha ambile kuli vaLevi vaze vanangwilenga vaIsalele vosena,+ vaze nawa vapwile vajila kuli Yehova, ngwenyi: “Hakenu Chikasha chajila muzuvo yize atungile Solomone mwanaNdavichi mwangana wavaIsalele.+ Kamweshi kuchimbatanga cheka havifwiji vyenuko.+ Zachilenunga jino Yehova Kalunga kenu navatu jenyi vaIsalele.
4 Pwenu mumazavu enu kweseka najizuvo javakakuluka jenu, nge kutesa namuze asonekele Ndavichi+ mwangana wavaIsalele namuze nawa asonekele mwanenyi Solomone.+
5 Imanenu muchihela chajila mumazavu nge kutesa najizuvo javakakuluka jenu kwakulitalasana navatu vosena,* vandumbwenu vaze nawa vali mumazavu nge kutesa najizuvo javakakuluka javo.
6 Kufumaho jihenu chimuna wakuvatula waPaseka,+ lijilikenu nakuwahishila vandumbwenu vyuma mangana valinge nge omu ahanjikile Yehova kuhichila muli Mose.”
7 Yoshiya ahanyinyineko vatu vana vamikoko vavizamba, navana vavapembe vavizamba kupwa vimuna vakuvatula vaPaseka vavatu vosena vaze vakungulukile. Ahanyine mikoko navapembe 30,000, kuhakilako navangombe 3,000. Vosenava vafumine kuluheto lwamwangana.+
8 Vilolo jenyi navakiko vahanyinyineko vatu, navapilishitu, navaLevi wana wakulisakila. Hilikiya,+ naZekaliya, naYehyele vaze vapwile vatwamina kuzuvo yaKalunga wamuchano vahanyine vapilishitu mikoko navapembe 2,600 kupwa vimuna vakuvatula vaPaseka, navangombe 300.
9 Konanyiya navandumbwenyi, Shemaya naNetanele, hohamwe naHashaviya, naYeyele, naYozavate vaze vapwile vamyata javaLevi vahanyine vaLevi mikoko navapembe 5,000 kupwa vimuna vakuvatula vaPaseka, navangombe 500.
10 Vawahishile vyuma vyosena, kaha vapilishitu vemanyine muvihela vyavo, vaLevi nawa vemanyine mumazavu avo+ nge kutesa nomu ahanjikile mwangana.
11 Kufumaho vajihile vimuna vakuvatula vaPaseka,+ kaha vapilishitu vasapwilile manyinga aze vavahanyine vaLevi halijiko lyakulumbila.+ Halwola kanelu vaLevi vapwile nakuva vimuna.+
12 Vawahishile nawa mawana akulumba nakuwapangila vatu vosena vaze vapwile mumazavu nge kutesa najizuvo javakakuluka javo. Mawana kana vawahanyine Yehova kweseka nomu vasoneka mumukanda waMose. Navaze vangombe nawa vavalingile mwomumwe.
13 Kaha vatelekele* nyama yawana waPaseka halijiko kweseka namuze valingilenga.+ Vatelekele nawa nyama yawana wajila mujindeho jajindende najeji jajinene, nahavikango. Kufumaho nyama kana vayinehele washiwashi kuvatu vosena.
14 VaLevi vawahishile kulya chavo nachechi chavapilishitu hakuwana nge vapilishitu, vaka-tanga yaAlone valumbilenga vimuna vakuvatula namaji palanga nakuufuku. Ngocho vaLevi valiwahishilile kulya chavo nakuwahisa nawa kulya chavapilishitu, vaka-tanga yaAlone.
15 Kaha vaka-kwimba, vana vaAsafwe+ vapwile muvihela vyavo kweseka namuze ahanjikile Ndavichi,+ naAsafwe,+ naHemane, naYelutune+ uze apwile mutu wamwangana muka-kumona vyakumwenesa. Vaka-kulama kuvikolo nawa vapwile kuvikolo vyakulisezaseza.+ Kavasezele milimo yavoko mwomwo vandumbwavo vaLevi vakiko vapwile nakuvawahishila kulya.
16 Ngocho vawahishile vyuma vyaYehova vyosena halikumbi lize mangana valinge chiwanyino chaPaseka+ nakuhana mawana akulumba halijiko lyakulumbila lyaYehova nge kutesa nalushimbi lwaMwangana Yoshiya.+
17 VaIsalele vaze vakungulukile valingile chiwanyino chaPaseka naChiwanyino chaJimbolo Jakuzeneka Chimbalwila hamakumbi 7.+
18 Kakwapwile chiwanyino cheka chaPaseka valingile muIsalele chakufwana nge chizeko, kufuma vene hamakumbi akapolofweto Samwele. Kaha nawa kakwapwile mwangana weka wavaIsalele alingile chiwanyino chaPaseka nge chize alingile Yoshiya,+ navapilishitu, navaLevi, navaYuta vosena, navaIsalele vosena vaze vakungulukile, navatu vamuYelusalemako.
19 Paseka kana vayilingile mumwaka wakusokesa 18 wachiyulo chaYoshiya.
20 Omu vyakumine vyuma vyosenevi, omu Yoshiya alingile hanawahisa lyehi tembele,* Neko+ mwangana waEjipitu ejile nakulwa jita kuKalakemishe kwakamwihi naYufwalate. Kaha Yoshiya ayile akalwe nenyi jita.+
21 Jino Neko atumine valuwa kuli Yoshiya nakwamba kuli ikiye ngwenyi: “Ove mwangana wavaYuta, vyuma muka vinakuwane? Ami kangwejile nakuzunga nayoveko, oloze nguneza nakuzunga nalifuchi lyeka, kaha Kalunga nangulweze ngwanguhwise kuzunga navo. Shikaho litwamine kwimanyina nakole Kalunga ou ali nayami, mokomoko mwakunongesa.”
22 Oloze Yoshiya kalitwaminyineko, alisolwele nge himutu weka+ nakuya akalwe nenyi jita. Kevwililile mazu aNeko aze afumine mukanwa kaKalungako. Ngocho Yoshiya ayile nakulwa jita naNeko muChana chaMengito.+
23 Jino vaka-kwasa mata amanana vashile mwivwi Mwangana Yoshiya, kaha mwangana ambile kuli vangamba jenyi ngwenyi: “Ngufumisenu kuno kujita, mwomwo vanangulemeka chikuma.”
24 Ngocho vangamba jenyi vamufumishile mulitemba lyajita apwile, vamuhakile mulitemba lyenyi lyajita lyamuchivali, kaha vamutwalile kuYelusalema. Yoshiya afwile, kaha vamufunjile muchimbumbe chavakakuluka jenyi.+ Vatu vamuYuta namuYelusalema vosena valilile Yoshiya.
25 Yelemiya+ embile lungungu hali Yoshiya. Kaha vaka-kwimba vamalunga navava vamapwevo+ vanembinga vyaYoshiya mujingungu javo* palanga nakulelo lino. Vatu valikashile nawa kwimbanga jingungu kana muIsalele, kaha vajisoneka mumukanda wajingungu.
26 Mujimbu wosena waYoshiya wazangi yenyi yakwilila asolwele nge kutesa navyuma vasoneka muJishimbi jaYehova,
27 navyuma alingile kufuma kukuputuka swi nakumakumishilo vavisoneka muMukanda waVamyangana javaIsalele navaYuta.+
Kwinyikila Chamwishi
^ Hepe., “navana vavatu.”
^ Chipwe pamo, “vochele.”
^ Hepe., “zuvo.”
^ Chipwe “mumyaso yavo yakulishona.”