Mijimbu 2 36:1-23
36 Jino vatu vamulifuchi lize vambachile Yehowahaze+ mwanaYoshiya nakumuswanyisa halitanda lyaise+ muYelusalema.
2 Yehowahaze aputukile kuyula omu apwile namyaka yakusemuka 23, kaha ayulile tukweji vatatu muYelusalema.
3 Oloze Mwangana waEjipitu amufumishile halitanda muYelusalema, kaha lifuchi alifwetesele jitalende* japalata 100, natalende yaulu yimwe.+
4 Mwangana waEjipitu atongwele nawa Elyakime ndumbwaYehowahaze kupwa mwangana wavaYuta naYelusalema, kaha amulukile lijina lyeka ngwenyi ikiye Yehoyakime. Jino Neko+ atwalile Yehowahaze ndumbwaElyakime kuEjipitu.+
5 Yehoyakime+ aputukile kuyula omu apwile namyaka yakusemuka 25, kaha ayulile myaka 11 muYelusalema. Yehoyakime alingilenga vyuma vyavipi kumeso aYehova Kalunga kenyi.+
6 Jino Nevukataneza+ mwangana waMbavilone amukatukilile mangana amukase malenge aunengu avali nakumutwala kuMbavilone.+
7 Nevukataneza ambachile vinoma vimwe vyamuzuvo yaYehova, avitwalile kuMbavilone+ nakuvihaka muzuvo yenyi.
8 Mujimbu wosena waYehoyakime wavyuma vyaunyengwe, vyavipi vyosena alingile vavisoneka muMukanda waVamyangana javaIsalele navaYuta. Kaha mwanenyi Yehoyakine aswanyine hawangana.+
9 Yehoyakine+ aputukile kuyula omu apwile namyaka yakusemuka 18, kaha ayulile tukweji vatatu namakumbi 10 muYelusalema. Yehoyakine alingilenga vyuma vyavipi kumeso aYehova.+
10 Kukuputuka chamwaka,* Mwangana Nevukataneza atumine vatu vakasake Yehoyakine nakumuneha kuMbavilone+ hohamwe navikumba vyamuzuvo yaYehova.+ Kaha atongwele Zetekiya ndumbwaise yaYehoyakine kupwa mwangana muYuta namuYelusalema.+
11 Zetekiya+ aputukile kuyula omu apwile namyaka yakusemuka 21, kaha ayulile myaka 11 muYelusalema.+
12 Zetekiya alingilenga vyuma vyavipi kumeso aYehova Kalunga kenyi. Kalinyishile kuli kapolofweto Yelemiya+ uze vatumine kuli Yehovako.
13 Alikangile nawa kuli Mwangana Nevukataneza+ uze amushingishile Kalunga. Anjinjavalile* nakukakamisa muchima wenyi, kaha akanyine kukinduluka kuli Yehova Kalunga kaIsalele.
14 Vakulwane javapilishitu vosena navatu vosena vaswezele kulinga vilinga vyavipi. Valingilenga vyuma vyaunyengwe vyosena vize valingilenga vaka-mafuchi eka, ngocho vapihishile zuvo yaYehova+ yize ajilikile muYelusalema.
15 Yehova Kalunga kavakakuluka javo avatuminyinenga lika valuwa jenyi nakuvahuhumuna. Avahuhumwinenga lika mwomwo evwilile keke vatu jenyi nachihela chenyi.
16 Oloze vakiko vatolekelenga valuwa jaKalunga wamuchano,+ valumbilishilenga vyuma ahanjikilenga,+ kaha vahendelenga nawa vapolofweto jenyi+ palanga nomu chapwile chachikalu kuvahindula. Ngocho utenu waYehova wejile hali vakiko.+
17 Kalunga avakatwilile mwangana wavaKalateya,+ kaha ajihile vakweze javo napoko yamukwale+ muchihela chavo chajila.+ Katetelele vakweze jamalunga navana vamapwevo, tushinakaji chipwe vitonjiko.+ Kalunga ahanyine vyuma vyosena mulivoko lyayou mwangana.+
18 Mwangana wavaKalateya ambachile nawa vinoma vyamuzuvo yaKalunga wamuchano vyosena, vyavinene navyevi vyavindende, navikumba vyamuzuvo yaYehova, navikumba vyamuzuvo yamwangana navilolo jenyi, ayile navyo kuMbavilone.+
19 Ochele zuvo yaKalunga wamuchano+ nakupuzula kembwe yaYelusalema.+ Ochele nawa tuposhi twayo vakukola nakunongesa vyuma vyavilemu vyosena.+
20 Vaze vapulukile kupoko yamukwale avatwalile muufunge kuMbavilone,+ kaha vakapwile vangamba jenyi+ navangamba javana venyi palanga nomu wangana wavaPeleja waputukile kuyula.+
21 Echi chateselemo mazu aYehova aze ahanjikile Yelemiya.+ Ngocho lifuchi lyanokele nakulama jisambata.+ Hamakumbi osena aze lyapwile ngundu, lyalamine sambata palanga nomu yakumine myaka 70.+
22 Mumwaka wakulivanga wachiyulo chaKuluse+ mwangana waPeleja, Yehova akatwile Kuluse avilike luvila muwangana wenyi wosena mangana mazu aYehova aze ahanjikile Yelemiya+ atesemo. Mazu aluvila kana awasonekele namumukanda,+ ngwenyi:
23 “Kuluse mwangana waPeleja nambe ngwenyi, ‘Yehova Kalunga wamelu nanguhane mawangana osena ahamavu,+ kaha nangulweze ngumutungile zuvo kuYelusalema, muYuta.+ Mutu himutu hali enu vatu jenyi, Yehova Kalunga kenyi apwenga naikiye, kaha ayenga kuYelusalema.’”+
Kwinyikila Chamwishi
^ Talende yimwe yapwile jikilongalamu 34.2. Tala Chihande B14.
^ Pamo kuchivatuko chavula.
^ Hepe., “Akakamishile shingo yenyi.”
