Mijimbu 2 4:1-22
4 Kufumaho, atengele lijiko lyakulumbila+ lyaunengu. Lijiko kana lyapwile jikuvite 20 muusuku, najikuvite 20 muwihi, najikuvite 10 mukujindama helu.
2 Jino atengele Limbashiya*+ lyakuzuzulula. Lyapwile lyamujingulule, kaha kutohwa chalyo kukanwa lyapwile jikuvite 10, kuzandama chalyo lyapwile jikuvite jitanu. Kaha muutengejiva walyo lyapwile jikuvite 30.+
3 Mwishi yamuvumbo walyo mwapwile vimbilingwa vyamaundu+ jingulwishi ndo, kuvite hikuvite yapwile namaundu 10. Aze maundu amumikana yivali, valingile akuzuzulwilaho.
4 Lize Limbashiya lyatwamine havangombe 12,+ vatatu vatalile kunote, vatatu vatalile kumulauko, vatatu vatalile kusulo, vatatu vatalile kumututuko. Limbashiya kana valitumbikile hajinyima javo, kaha vatalishile chamatako mukachi.
5 Pimo yalyo yapwile nge chikapa chalivoko.* Kaha mivumbo yalyo yapwile nge mivumbo yalupasa, yakufwana nge lutemo. MuLimbashiya kana mwengililenga jimbate* 3,000 jameya.
6 Kufumaho, atengele jimbashiya 10 jakukosela. Jimbashiya jitanu ajihakile kuluhachi lwazuvo kuchilyo, jimbashiya jikwavo jitanu ajihakile kuluhachi lwazuvo kuchimoswe.+ Mujimbashiya kana mukiko vakoselelenga vyuma vize valumbilenga kupwa wana wakulumba.+ Oloze muze muLimbashiya mukiko vasanyinyinenga vapilishitu.+
7 Kaha atengele vitumbikilo vyamanongo 10 vyaulu,+ kweseka najindongi jakuvitengelamo.+ Avihakile mutembele, vitanu kuchilyo, vitanu kuchimoswe.+
8 Atengele nawa jimesa 10 nakujihaka mutembele. Jimesa jitanu ajihakile kuchilyo, jimesa jikwavo jitanu ajihakile kuchimoswe.+ Kaha atengele nawa viloso vyaulu 100.
9 Atungile chipango+ chavapilishitu,+ nachipango chachinene,+ namapito akuchipango. Mapito kana awashilile unengu.
10 Lize Limbashiya alihakile kuluhachi lwazuvo kuchilyo, kumututuko, chakutala kusulo.+
11 Hilame atengele nawa vifwoyo, najifwosholo, naviloso.+
Ngocho akumishile milimo yosena azachililile Mwangana Solomone kuzuvo yaKalunga wamuchano.+
12 Akumishile kutenga jipanda+ jivali, namitwe yivali yize ahakile helu lyajize jipanda, nawanda wakuselasana+ uze ahakile kuze kumitwe,
13 najiloma+ 400 jamumikana yivali yivali yize aselasanyine hawanda wakuhaka kuze kumitwe yize yapwile hajipanda,+
14 namatemba* 10, najimbashiya 10 jize vahakile helu lyamatemba,+
15 naLimbashiya, navangombe 12 vaze vapwile mwishi yalize Limbashiya,+
16 navifwoyo, najifwosholo, najingalafwa,+ navyuma vyosena vyakuzuvo yaYehova vyaunengu wakutomesa vize Hilame-avive+ atungilile Mwangana Solomone.
17 Mwangana avitungililile mungalila yaYotau kuvitapu vize vyatwama mukachi kaSukote+ naZeleta.
18 Solomone atungile vyuma kanevi vyavivulu chikuma. Kaha kulema chaunengu wavyo kavachitachikijileko.+
19 Solomone atungile vyuma vyosena+ vyamuzuvo yaKalunga wamuchano, lijiko lyakulumbila lyaulu,+ najimesa+ haze hapwilenga jimbolo+ jakuhana Kalunga,
20 navitumbikilo vyamanongo namanongo avyo aulu wakutomesa+ mangana amunyikenga mukapete kamukachi chikuma, kweseka nomu mwayile jindongi,
21 najitemo, namanongo, najimanya, vyosena vyapwile vyaulu wakutomesa kanawa.
22 Atungile nawa tuzola twamanongo, naviloso, najipasa, natumalonga twakukwachila kakahya, vyosena vyapwile vyaulu wakutomesa. Atungile nawa chikolo chazuvo, namapito amukachi amuze Mwajila Chikuma,+ namapito akuzuvo yatembele, vyosenevi vyapwile vyaulu.+
Kwinyikila Chamwishi
^ Chipwe “mwakulamina meya.”
^ Kafwe jisendimita 7.4. Tala Chihande B14.
^ Mbate yapwile kafwe jilita 22. Tala Chihande B14.
^ Chipwe “namatemba ameya.”
