Mijimbu 2 5:1-14
5 Solomone akumishile kuzata milimo yosena yakupandama kuzuvo yaYehova.+ Anehele vyuma vyosena vize ajilikile ise Ndavichi,+ kaha ahakile palata, naulu, navyuma vyeka muze mwakulamina vikumba muzuvo yaKalunga wamuchano.+
2 Halwola luze, Solomone akungulwile vakulwane javaIsalele vosena, vatwamina jamiyachi yavaIsalele, navamyata vakujizuvo javaIsalele. Vejile kuYelusalema mangana vambate chikasha chalushiko lwaYehova kufuma kuNganda yaNdavichi,+ yikiko Zeyone.+
3 VaIsalele vosena valikungulwilile kumeso amwangana kuchiwanyino* chize chapwilengako mukakweji wakusokesa 7.+
4 Vakulwane javaIsalele vosena vejile, kaha vaLevi vambachile chize Chikasha.+
5 Vapilishitu navaLevi* vanehele chize Chikasha, nambalaka yakuliwanyina,+ navyuma vyajila vyosena vize vyapwile muze mumbalaka.
6 Mwangana Solomone nalizavu lyavaIsalele lyosena lize lyakungulukilile kuli ikiye, vemanyine kuze kuChikasha. Kaha valumbile mikoko navangombe vavavulu,+ kakwapwile mutu ahashile kuvalavako.
7 Jino vapilishitu vengishile chize chikasha chalushiko lwaYehova muchihela chacho, mukapete kamukachi chikuma, muze Mwajila Chikuma, vachitumbikile mwishi yamavava avakeluve.+
8 Vaze vakeluve vapwile vakutanduula mavava avo hachihela haze hapwile chize Chikasha, ngocho vaze vakeluve vafwikile chize Chikasha namyalachi yacho.+
9 Yize myalachi yasuhwile chikuma, ngocho nge mutu ali muze Mwajila kulutwe lwakaze kapete kamukachi chikuma amwenenga jisongo jayo, oloze nge ali haweluka kajimwenengako. Kaha myalachi kana muyichili nakulikumbi lyalelo.
10 Muze muchikasha kamwapwile vyuma vyekako shina malolwa avali kaha aze ahakilemo Mose kuHoleve+ omu Yehova alishikile lushiko+ navaIsalele hakulovoka mulifuchi lyaEjipitu.+
11 Omu vapilishitu valovokele muchihela chajila (hakuwana nge vapilishitu vosena vaze vapwile kuze valijilikile+ chamokomoko namazavu avo),+
12 vaLevi vaka-kwimba+ vosena vaze vapwile kuli Asafwe,+ nakuli Hemane,+ nakuli Yelutune,+ nakuli vana vavo navandumbwavo, vavwalile mahina amwaza, kaha vakwachile jingunga, navisaji vyamikole, natulyalya. Vemanyine kulijiko lyakulumbila kumutamba wakumututuko. Vemanyine hamwe navapilishitu 120 vaze vapwile nakwimba jineta.+
13 Kahomu vaka-kwimba jineta, navaka-kwimba veka vapwile nakwalishila hamwe Yehova nakumusakwilila, omu chivumo chajineta, najingunga, navisaji vyeka chevwakanyine hakwalisa Yehova, “mwomwo apwa wamwaza, kaha zangi yenyi yakwilila kuyatwama haya myaka yosena,”+ livwi lyafwikile muzuvo yaYehova.+
14 Vapilishitu kavahashile kuzata milimo yavoko mwomwo yalize livwi. Upahu waYehova wazalile muzuvo yaKalunga wamuchano.+
