Mijimbu 2 6:1-42
6 Kaha Solomone ambile ngwenyi: “Yehova ambile ngwenyi mwatwamanga mulivwi lilava.+
2 Ngocho ngunakutungila zuvo yaulangaji, chihela chize mutwamangamo haya myaka yosena.”+
3 Jino mwangana alumukile nakutala lizavu lyavaIsalele lyosena, kaha aputukile kuvakisula oku lizavu lyavaIsalele lyosena linemana.+
4 Ambile ngwenyi: “Vamwalisenga Yehova Kalunga kaIsalele, ou ashikile tata Ndavichi nakanwa kenyi, ou ukwechi livoko lyenyi linalingi vyuma ashikile, ngwenyi,
5 ‘Kufuma halikumbi lize ngwalowele vatu jami vaIsalele muEjipitu, kangwasakwile nganda yeka mumiyachi yavaIsalele yosena yakutela kungutungila zuvo navavulukilanga lijina lyamiko.+ Kangwasakwile nawa mutu ayulenga vatu jami vaIsaleleko.
6 Oloze ngunasakula Yelusalema+ yize navavulukilanga lijina lyami. Ngunasakula Ndavichi ayulenga vatu jami vaIsalele.’+
7 Tata Ndavichi asakile kutunga zuvo navavulukilanga lijina lyaYehova Kalunga kaIsalele.+
8 Jino Yehova ambile kuli tata Ndavichi ngwenyi, ‘Unasake vene kutunga zuvo navavulukilanga lijina lyami, kaha unalingi kanawa kujina chuma kana mumuchima wove.
9 Oloze kaweshi kutunga zuvo kanako. Mwanove walunga uze naukasema* ikiye mwakatunga zuvo navakavulukilanga lijina lyami.’+
10 Yehova natesamo vyuma ashikile. Ami ngunaswane tata Ndavichi nakutwama halitanda lyaIsalele,+ nge muze ashikile Yehova.+ Ngunatungu nawa zuvo navavulukilanga lijina lyaYehova Kalunga kaIsalele.
11 Muzuvo kana mukiko ngunatumbika Chikasha chalushiko+ lwaYehova luze alishikile navaIsalele.”
12 Kufumaho Solomone emanyine kulijiko lyakulumbila lyaYehova kulizavu* lyavaIsalele lyosena, kaha olwele mavoko enyi mwilu.+
13 (Mwomwo Solomone atengele utenda waunengu, kaha auhakile muchipango.+ Wapwile jikuvite* jitanu muusuku, muwihi wapwile jikuvite jitanu, mukujindama helu wapwile jikuvite jitatu. Solomone emanyine haze hautenda.) Afukamine kulizavu* lyavaIsalele lyosena, kaha olwele mavoko enyi mwilu.+
14 Ambile ngwenyi: “Ove Yehova Kalunga kaIsalele, kakweshi Kalunga weka nge ove mwilu chipwe hano hamavuko. Weji kulamanga lushiko nakusolola zangi yove yakwilila kuli vangamba jove vaze veji kukuzachilanga namichima yavo yosena.+
15 Unalame lushiko lwove luze washikile ngamba yove tata Ndavichi.+ Washikile lushiko nakanwa kove, kaha livoko lyove linalingi vyuma washikile.+
16 Ngocho jino, ove Yehova Kalunga kaIsalele, lamanga mazu ove washikile ngamba yove tata Ndavichi ngwove: ‘Kachi nge vana vove navalamanga jijila javo nakukavangizanga jishimbi jami+ nge muze unalinginga ove,+ kaha halitanda lyawangana waIsalele nahakatwamanga lika mutu wamuchisaka chove.’
17 Shikaho, ove Yehova Kalunga kaIsalele, tesamo jino lushiko lwove luze washikile ngamba yove tata Ndavichi.
18 “Uno ove Kalunga unahase kutwama navatu hamavu numba?+ Kachi nge melu akukehela,+ nyi ngachilihi zuvo eyi ngunatungu?+
19 Shikaho ove Yehova Kalunga kami, tengeleka matwitwi ove kukulomba chayami ngamba yove, nakukulembelela chami, ivwilila kukawelele kami nakukulomba echi nguli nakulomba ami ngamba yove.
20 Meso ove atalenga hazuvo yino musana naufuku, hazuvo yino wambile ngwove navakayivulukilanga lijina lyove,+ mangana wivwilile kukulomba chayami ngamba yove chize nangulombanga oku ngunatale kuzuvo yino.
21 Ivwilila kukulembelela chayami ngamba yove navatu jove vaIsalele omu natukulembelelanga oku tunatale kuchihela chino.+ Twivwilile omwo mwilu watwama,+ twivwilile nakutukonekela.+
22 “Kachi nge mutu mwavulumuna mulonga kuli mukwavo, kahou vanavulumuna mwashingisa uze namuvulumuna* nakumulweza atesemo lushingo* lwenyi, kachi nge uze navulumuna mukwavo mweza kulijiko lyove lyakulumbila eli lili muno muzuvo+ shimbu achili nachishingo* kana,
23 kahove ivwilila omwo mwilu watwama, uyule vangamba jove. Muka-kuhuka umuhane mulonga nakumuzangamisa kweseka navilinga vyenyi,+ kaha muka-kwoloka nawa umusambise nakumufweta kweseka nakwoloka chenyi.+
24 “Kachi nge vatu jove vaIsalele navavafungulula kuli vaka-kole javo mwomwo yakulinga shili kumeso ove,+ kaha hinavakinduluka kuli ove nakwalisa lijina lyove,+ nakukulomba,+ nakukulembelela uvevwile uselewa kuzuvo yino,+
25 kaha ivwilila omwo mwilu watwama,+ ukonekele shili yavatu jove vaIsalele nakuvakindulwisa mulifuchi wahanyine vakakuluka javo.+
26 “Kachi nge mwilu munalisoko, vula kayeshi nakunokako+ mwomwo yakulinga shili kumeso ove,+ kaha hinavalomba oku vanatale kuchihela chino nakwalisa lijina lyove nakuseza shili yavo mwomwo yakuvenyisa,*+
27 kaha ivwilila omwo mwilu watwama, ukonekele shili yavangamba jove, vatu jove vaIsalele, kaha uvanangule jila yamwaza vatela kuya.+ Unokese vula+ mulifuchi lize wahanyine vatu jove kupwa uswana wavo.
28 “Kachi nge mulifuchi namwiza zala yakalombolombo,+ chipwe musongo wachihita,+ chipwe musana wakaza, chipwe kambukungulu,+ chipwe vambimba makumbi, chipwe mavongolo,+ chipwe nge vaka-kole javo navakavahaka muchingombela munganda yimwe yamulifuchi lyavo,*+ chipwe cheshocho chipupu chipwe musongo naukavawana,+
29 cheshocho kulomba+ navakakulomba, chipwe cheshocho kulembelela+ navakakulembelela kuli mutu, chipwe kuli vatu jove vaIsalele vosena (mwomwo mutu himutu natachikiza ukalu wenyi nakukola ali nakwivwa),+ kaha hinavolola mavoko avo kuzuvo yino,+
30 kaha ivwilila omwo mwilu watwama,+ uvakonekele+ nakufweta mutu himutu kweseka navilinga vyenyi, mwomwo watachikiza muchima wenyi (ove yove kaha watachikiza muchima wamutu himutu),+
31 mangana vakwivwenga woma nakutambukanga mujijila jove hamakumbi osena navayoyanga mulifuchi lize wahanyine vakakuluka jetu.
32 “Jino kuli vaka-mafuchi eka, vaze kaveshi vamuli vatu jove vaIsaleleko, vaze navafuma kumafuchi akwakusuku mwomwo yalijina* lyove lyalinene,+ nalivoko lyove lyangolo, lyaundume, nakwiza nakulomba kuzuvo yino,+
33 kaha ivwilila omwo mwilu watwama, uvalingile vyuma navakulomba, mangana vatu vosena vahano hamavu vatachikize lijina lyove+ nakukwivwa woma nge muze veji kukwivwanga woma vatu jove vaIsalele. Kaha vatachikize ngwavo zuvo yino ngunatungu vanayivulukila lijina lyove.
34 “Kachi nge vatu jove navaya nakulwa jita navaka-kole javo kuze unavatumu,+ kaha hinavalomba+ kuli ove oku vanatale kunganda eyi unasakula, nakuzuvo ngunatungu eyi navavulukilanga lijina lyove,+
35 kaha ivwilila kukulomba chavo nakukulembelela chavo omwo mwilu watwama, ulinge mwachiyulo kuli vakiko.+
36 “Kachi nge navalinga shili kuli ove (hakuwana nge kakweshi mutu azeneka kulinga shiliko),+ kaha hinaupihilila nakuvahana mumavoko avaka-kole javo, ngocho hinavavakwata ufunge nakuvatwala kulifuchi lyakwakusuku chipwe kwakamwihi,+
37 kahomu navakanuka kulifuchi lize vanavatwale ufunge ngwavo tunalingi shili, kaha hinavakinduluka kuli ove nakukulembelela mulifuchi lize vanavakwate ufunge, ngwavo, ‘Tunalingi shili, tunapihisa, tunahengesa,’+
38 kaha hinavakinduluka kuli ove namichima yavo yosena,+ namyono* yavo yosena mulifuchi lize vanavakwate ufunge,+ kaha hinavalomba kuli ove oku vanatale kulifuchi eli wahanyine vakakuluka javo, nakunganda eyi unasakula,+ nakuzuvo ngunatungu eyi navavulukilanga lijina lyove,
39 kaha ivwilila kukulomba chavo nakukulembelela chavo omwo mwilu watwama, ulinge mwachiyulo kuli vakiko,+ ukonekele vatu jove vaze vanalingi shili kuli ove.
40 “Shikaho ove Kalunga kami, meso ove atutalenga, utengelekenga matwitwi ove kukulomba navalombelanga hachihela chino.*+
41 Ove Yehova Kalunga, yako kuchihela chove chakunokela,+ ove naChikasha changolo jove. Ove Yehova Kalunga, vapilishitu jove vavalwile.* Vatu jove vakushishika vawahilile mwomwo yakuwaha chove.+
42 Ove Yehova Kalunga, kanda naukana ou wove wawavisako.+ Anuka zangi yove yakwilila yize wasolwelele ngamba yove Ndavichi.”+
Kwinyikila Chamwishi
^ Hepe., “mwanove walunga uze mwakafuma kumitanda yove.”
^ Chipwe “kuchikungulwilo.”
^ Kuvite yimwe yapwile jisendimita 44.5. Tala Chihande B14.
^ Chipwe “kuchikungulwilo.”
^ Hepe., “nachangu.”
^ Hepe., “changu.”
^ Chipwe “kahou vanavulumuna mwangula uze namuvulumuna.” Kulumbununa changu chize nachiza hali uze namuvulumuna kachi nge mwalishinga mwamakuli chipwe mwahokola vyuma nalishingi.
^ Chipwe “yakuvayanjisa.”
^ Hepe., “yamulifuchi lyavikolo vyavo.”
^ Chipwe “yapuho.”
^ Tala Mukana waMazu.
^ Chipwe “navalombanga kutalisa kuchihela chino.”
^ Hepe., “vapilishitu jove vavwale ulwilo.”
