Mijimbu 2 7:1-22
7 Omu Solomone akumishile kulomba,+ kakahya kafumine mwilu+ nakwocha mawana akulumba, navimuna vakuvatula. Kaha upahu waYehova wazalile muzuvo.+
2 Vapilishitu kavahashile kwingila muzuvo yaYehovako mwomwo upahu waYehova wazalile muze muzuvo yaYehova.+
3 VaIsalele vosena vamwene omu kakahya kejile kufuma mwilu, nomu nawa upahu waYehova wejile haze hazuvo. Ngocho vafukamine chameso hamavu hamalolwa akwala, valifukwile nakusakwilila Yehova, “mwomwo apwa wamwaza, kaha zangi yenyi yakwilila kuyatwama haya myaka yosena.”
4 Mwangana navatu vosena vahanyine Yehova+ vimuna vakuvatula.
5 Mwangana Solomone ahanyine vangombe 22,000, namikoko 120,000. Ngocho mwangana navatu vosena vakunjikile zuvo yaKalunga wamuchano.+
6 Vapilishitu vemanyine muvihela vyavo muze vavalwezele kwimana. VaLevi navakiko vemanyine oku vanakwate visaji vize vazachishilenga hakwimbila Yehova myaso.+ (Mwangana Ndavichi asongele visaji kana mangana vipwenga vyakuzachisa hakusakwilila Yehova omu amwalishilenga hamwe navaLevi, “mwomwo zangi yenyi yakwilila kuyatwama haya myaka yosena.”) Vapilishitu vembile jineta+ kumeso avaLevi oku vaIsalele vosena vanemana.
7 Jino Solomone ajilikile chihela chamukachi kachipango chize chapwile kulutwe lwazuvo yaYehova, mwomwo mukiko alumbilile mawana akulumba,+ namaji amawana akusolola kuunda. Alingile ngocho mwomwo lijiko lyakulumbila lyaunengu+ lize atungile Solomone lyapwile lyalindende kulumbila vimuna vakuvatula, namawana amanona,+ namaji.+
8 Solomone alingile chiwanyino navaIsalele vosena hamakumbi 7.+ Vatu vaze vakungulukile vapwile vavavulu chikuma. Vafumine kuLevo-hamate* swi nakuMwanakalwiji* wakuEjipitu.+
9 Lijiko lyakulumbila valikunjikile hamakumbi 7, chiwanyino nawa vachilingile hamakumbi 7, kaha halikumbi lyakusokesa 8,* vapwile nakukunguluka chajila.+
10 Jino halikumbi lyakusokesa 23 lyakakweji wakusokesa 7, Solomone asuwile vatu vayenga kumembo avo, kaha vatu vawahililile+ nakusuuluka mumichima yavo havyuma vyamwaza vyosena vize Yehova alingilile Ndavichi, naSolomone, navatu jenyi vaIsalele.+
11 Ngocho Solomone akumishile kutunga zuvo yaYehova, nazuvo* yamwangana.+ Solomone akumishile nawa kuzata vyuma vyosena vize ajinyine mumuchima wenyi kupandama kuzuvo yaYehova nazuvo yenyi.+
12 Jino Yehova alisolwele kuli Solomone+ naufuku, ambile kuli ikiye ngwenyi: “Ngunevu kulomba chove, kaha ngunasakula chihela chino chipwenga zuvo yami yakuhanyinanga vimuna vakuvatula.+
13 Kachi nge nangusoka mwilu mangana vula yizeneke kunoka, chipwe nge nanguneha vambimba mangana venyeke lifuchi, chipwe nge nangutuma musongo wachihita muli vatu jami,
14 kaha vatu jami vaze vavulukila lijina lyami+ navalinyisa,+ nakulomba kuli ami, nakungutondatonda, nakuseza vilinga vyavo vyavipi,+ kaha nangwivwa kulomba chavo mwilu ngwatwama, nanguvakonekela shili yavo, nakulingisa lifuchi lyavo lipwenga jino kanawa.+
15 Nanguvatala, kaha nangutengelekanga matwitwi ami kukulomba navalombelanga hachihela chino.+
16 Shikaho ngunasakula eyi zuvo nakuyijilika mangana vayivulukilenga lijina lyami haya myaka yosena.+ Nangulamanga zuvo eyi nakuyijika muchima.+
17 “Kachi nge nautambukanga mukulonga kumeso ami nge muze atambukilenga iso Ndavichi, nakulinga vyuma vyosena vize ngunakulweze, nakukavangiza jindongi jami, namazu ami akuyula,+
18 kaha nanguzamisa litanda lyove lyawangana,+ nge muze ngwashikile iso Ndavichi,+ ngwami, ‘VaIsalele navakavayulanga lika kuli mutu wamuchisaka chove.’+
19 Kachi nge ove naulitwamina kungukavangiza, nakukana jindongi najishimbi jami jize ngunakuhane, oloze hinauya nakuzachila tulunga veka nakulifukula kuli vakiko,+
20 kaha nangukamivunya mulifuchi lize ngunamihane.+ Zuvo eyi ngunajilika mangana vayivulukilenga lijina lyami nangukayiseza, kaha navakayisaula* nakuyitoleka kuli vatu veka naveka.+
21 Zuvo eyi nayikapwa malala. Mahitajila navakayitala nakulikomokela,+ nakwamba ngwavo, ‘Mwomwo ika Yehova alingilile chuma kana kulifuchi eli nakuzuvo eyi?’+
22 Jino navakavakumbulula ngwavo, ‘Mwomwo vasezele Yehova+ Kalunga kavakakuluka javo uze avalowele mulifuchi lyaEjipitu,+ kaha valemesele tulunga veka nakulifukula kuli vakiko nakuvazachila.+ Shikaho navanehela lupi lwosena elu.’”+
Kwinyikila Chamwishi
^ Chipwe “kuwingililo wakuHamate.”
^ Tala Mukana waMazu.
^ Likumbi lyakavangijileho kufuma hachiwanyino, chipwe halikumbi lyakusokesa 15.
^ Chipwe “nanganda.”
^ Hepe., “navakayivulukanga mutushimutwiji.”
