Mijimbu 2 8:1-18
8 Omu yakumine myaka 20 yize Solomone atungile zuvo yaYehova nazuvo* yenyi,+
2 Solomone atungulwile nawa jinganda jize vamuhanyine kuli Hilame,+ kaha ajihanyine vaIsalele* vatwamengamo.
3 Kutwala muze, Solomone ayile nakulukuka ngalila yaHamate-zova, kaha ayitambwile.
4 Atungile* nganda yaTatamole mupambo nakutungulula nawa jinganda josena jakulamina vyuma+ jize atungile muHamate.+
5 Atungile nawa Mbete-holone yaKutunda+ naMbete-holone yaKuchikulo.+ Jinganda kana japwile jakujingulwisa jikembwe, kaha japwile navikolo, natupachiso.
6 Solomone atungile nawa Mbalate,+ najinganda jakulamina vyuma, najinganda jamatemba enyi ajita josena,+ najinganda javaka-kutambukila hatuvalu, navyuma vyeka vize ajinyine kutunga muYelusalema, namuLevanone, namulifuchi mwosena muze ayulilenga.
7 Jino vatu vosena vaze vasalileho hali vaHete, navaAmole, navaPeliji, navaHivi, navaYevuse+ vaze kavapwile vaIsaleleko,+
8 vana vavo vaze vasalile mulifuchi, vaze kavajihile kuli vaIsaleleko,+ vavahanyine milimo yaundungo kuli Solomone yize vanazatenga palanga nakulelo lino.+
9 Oloze Solomone katengele vaIsalele kupwa vandungo vakumuzachila milimo yenyiko,+ mwomwo vapwile vatu jenyi vaka-kwasa jita, navakulwane jatupitau twenyi, navakulwane javaka-kutambukisa matemba enyi, navakulwane javaka-kutambukila hatuvalu twenyi.+
10 Mwangana Solomone apwile nawa navamyata vakulitulaho 250, tupitau twavatu vaze vazachilenga milimo.+
11 Solomone afumishile nawa mwanaFwalo+ muNganda yaNdavichi, amutwalile muzuvo yize amutungilile,+ mwomwo ambile ngwenyi: “Numba tuhu hipuwami, oloze katela kutwama muzuvo yaMwangana wavaIsalele Ndavichiko, mwomwo kweshokwo kuli Chikasha chaYehova kunapu kwajila.”+
12 Jino Solomone alumbilile Yehova vimuna vakuvatula+ halijiko lyakulumbila+ lyaYehova lize atungile kulutwe lwasenge.+
13 Akavangijile mwosena muze valingilenga hakumbi hakumbi. Kaha ahanyine mawana kweseka najishimbi jaMose jakupandama kujiSambata,+ nakukumweka chakakweji,+ nakuviwanyino vyahalwola vatongola vize valingilenga katatu mumwaka.+ Viwanyino kana shina Chiwanyino chaJimbolo Jakuzeneka Chimbalwila,+ naChiwanyino chaVyalumingo,+ naChiwanyino chaVisakila.+
14 Kufumaho, atongwele vapilishitu+ mumazavu avo mangana vazatenga milimo yavo kweseka nalushimbi lwaise Ndavichi. Atongwele nawa vaLevi vemanenga muvihela vyavo muze vavalwezele kwimana mangana valisenga+ Kalunga nakuzachila kumeso avapilishitu kweseka namilimo yahakumbi hakumbi. Atongwele nawa vaka-kulama kuvikolo mumazavu avo mangana valamenga kuvikolo vyakulisezaseza+ kweseka nalushimbi lwaNdavichi, mutu waKalunga wamuchano.
15 Kaha kavapyapumukile nakuseza lushimbi lwamwangana luze alwezele vapilishitu navaLevi kutalisa kuvyuma vyosena, chipwe kujizuvo jakulamina vikumbako.
16 Solomone alongesele kanawa* milimo yosena kufuma vene halikumbi lize valile+ chihela chazuvo yaYehova nakuheta halikumbi vakumishile kuyitunga. Ngocho zuvo yaYehova vayikumishile kuyitunga yosena.+
17 Kufumaho Solomone ayile kuEjone-ngevele+ nakuElote,+ kungenge yakalungalwiji mulifuchi lyaEtome.+
18 Hilame+ atuminyine Solomone mato navatu vaze vatachikijile mwakutambukila hakalungalwiji. Atumine awa mato navatu kana kuhichila muli vangamba jenyi, kaha vayile hamwe navangamba jaSolomone kuOfwile,+ vakambachile jitalende* jaulu 450+ nakujineha kuli Mwangana Solomone.+
Kwinyikila Chamwishi
^ Chipwe “nanganda.”
^ Hepe., “vana vaIsalele.”
^ Chipwe “Atungulwile.”
^ Chipwe “awahishile kanawa; akumishile.”
^ Talende yimwe yapwile jikilongalamu 34.2. Tala Chihande B14.
