Mijimbu 2 9:1-31
9 Jino mwangana wapwevo wakuSheva+ evwile puho yaSolomone. Ngocho ayile kuYelusalema mangana akamweseke navihula vyakujiminyina.* Ayile hamwe nalizavu* lyavatu lyalinene, navangamela vaze vambachile maji ambalasamu, naulu wauvulu,+ namalolwa andando yayinene. Apandamine kuli Solomone, kaha ahanjikile nenyi vyuma vyosena vyapwile kumuchima wenyi.+
2 Solomone akumbulwile vihula vyenyi vyosena. Kakwapwile chuma numba chimwe chakaluhwilile* Solomone kulumbununako.
3 Omu mwangana wapwevo wakuSheva amwene mangana aSolomone,+ nazuvo yize atungile,+
4 navyakulya alilenga,+ nomu vangamba jenyi vatwaminenga kumesa, nomu vangamba jenyi vazachilenga kumesa, nauvwalo vavwalilenga, navaka-kumuhana lupasa, nauvwalo vavwalilenga, navimuna vakuvatula vaze ahanyinenga hakumbi hakumbi kuzuvo yaYehova,+ alikomokelele chikuma.*
5 Ngocho ambile kuli mwangana ngwenyi: “Mujimbu ngwevwile mulifuchi lyami wakuvuluka mangana ove navyuma unalingi* unapu wamuchano.
6 Oloze kangwetavilile mujimbu kanako, kuvangomu nguneza nakulimwena nameso ami.+ Vyuma vangulwezele vyakuvuluka mangana ove akukomwesa+ vyapwile vyavindende kaha. Ove unahambakana puho ngwevwile.+
7 Vatu jove vapwenga vakuwahilila, vangamba jove vaze veji kwimananga kumeso ove lwola lwosena nakwivwilila kumangana ove vapwenga vakuwahilila.
8 Vamwalisenga Yehova Kalunga kove, ou nakwivwila kuwaha nakukuhaka halitanda lyenyi mangana upwenga umwangana waYehova Kalunga kove. Yehova nakutongola kupwa umwangana wavaIsalele mangana uyulenga mwaya chiyulo namukwoloka, mwomwo azanga vaIsalele+ haya myaka yosena.”
9 Mwangana wapwevo wakuSheva ahanyine mwangana jitalende* jaulu 120,+ namaji ambalasamu amavulu, namalolwa andando yayinene. Kakwapwile vatu vanehele maji ambalasamu amavulu nge aze anehele mwangana wapwevo wakuSheva kuli Mwangana Solomoneko.+
10 Kaha vangamba jaHilame navangamba jaSolomone vaze vanehele ulu kufuma kuOfwile,+ vanehele nawa vitondo vyamalamunge, namalolwa andando yayinene.+
11 Kuvitondo evi vyamalamunge, mwangana asongeleko jindondelo jakuzuvo yaYehova,+ nakuzuvo* yamwangana,+ natulyalya, navisaji vyamikole vyavaka-kwimba.+ Vitondo kana kanda vavimonengaho lyehi mulifuchi lyaYutako.
12 Mwangana Solomone naikiye ahanyine mwangana wapwevo wakuSheva vyuma vyosena asakile navize alombele. Amuhanyine vyuma vyavivulu kuhambakana* vize amunehelele ikiye. Kufumaho ou mwangana wapwevo akindulukile kulifuchi lyenyi navangamba jenyi hamwe.+
13 Ulu vanehelele Solomone mumwaka umwe walemene kafwe jitalende 666,+
14 kufumisako uze vanehele vaka-kusekasana, navaka-kusepa, navamyangana vakuAlavya vosena navanguvulu vamulifuchi vaze vanehelelenga Solomone ulu napalata.+
15 Mwangana Solomone atengele jikepwe jajinene jaulu wakutatula 200+ (kepwe hikepwe vayitengele najishekele* jaulu wakutatula 600).+
16 Atengele nawa mikingo* yaulu wakutatula 300 (mukingo himukingo vautengele najimina* jaulu jitatu). Mwangana avihakile muzuvo vavulukile ngwavo Zuvo yaMusenge waLevanone.+
17 Mwangana atungile nawa litanda lyalinene lyamazo avanjamba, kaha alishilile ulu wamwaza.+
18 Kulitanda kana kwapwile jindondelo jakunyinyina 6, kaha kwapwile nawa chitwamo chaulu chakulyata mahinji. Chitwamo kana chapwile chakununga kulitanda. Litanda lyapwile nawa namavoko akusachila kujihachi josena jivali, kaha kuluhachi hiluhachi kwapwile ndumba.+
19 Kwapwile nawa vandumba 12+ vaze vemanyine hajindondelo jize 6, kusongo yandondelo hindondelo kwapwile ndumba. Kakwapwile mwangana weka atungile litanda lyakufwana nge eliko.
20 Jipasa jaMwangana Solomone josena japwile jaulu, kaha vyuma vyosena vyamuzuvo vavulukile ngwavo Zuvo yaMusenge waLevanone vyapwile vyaulu wakutomesa. Kakwapwile chuma chapalatako, mwomwo palata vayimwenenga kupwa yamokomoko hamakumbi aSolomone.+
21 Mato amwangana ayilenga hamwe navangamba jaHilame+ kuTalashishe.+ Awa mato akuTalashishe anehelenga ulu, napalata, namazo avanjamba,+ namahundu, navapau kamwe mumyaka yitatu.
22 Ngocho Mwangana Solomone apwile naluheto lwaluvulu namangana+ amavulu kuhambakana vamyangana vahamavu vosena.
23 Kaha vamyangana vahamavu vosena vejilenga kuli Solomone mangana vevwenga mangana aze amuhanyine Kalunga wamuchano.+
24 Vamyangana vanehelenga milambu yavo yavyuma vyapalata, navyuma vyaulu, nauvwalo,+ navitwa vyajita, namaji ambalasamu, natuvalu, navimbulu. Omu mukiko valingilenga mwaka himwaka.
25 Solomone apwile najizuvo 4,000 jakulamina tuvalu namatemba enyi. Apwile nawa natuvalu* 12,000,+ kaha avilaminyine mujinganda jamatemba, kwakamwihi namwangana muYelusalema.+
26 Solomone apwilenga nawata havamyangana vosena, kuputukila kuKalwiji* nakuheta kulifuchi lyavaFwilishite swi nakungiza yaEjipitu.+
27 Mwangana alikungulwilile palata yayivulu muYelusalema kwijiva nge malolwa, navitondo vyamishitale vyavivulu kwijiva nge misukumole yamuShefwela.+
28 Vatu vanehelelenga Solomone tuvalu kufuma kuEjipitu+ nakumafuchi eka osena.
29 Mujimbu wosena waSolomone+ wavyuma alingile kufuma kukuputuka swi nakumakumishilo watwama mumijimbu yakapolofweto Natane,+ namuupolofweto waAhiya+ wakuShilo, namumijimbu yavyakumwenesa amwene Ito+ kupandama kuli Yelovowame+ mwanaNevate.
30 Solomone ayulile vaIsalele vosena muYelusalema hamyaka 40.
31 Solomone atokele ngana mwavakakuluka jenyi, kaha vamufunjile muNganda yaise Ndavichi.+ Ngocho mwanenyi Lehovowame aswanyine hawangana.+
Kwinyikila Chamwishi
^ Chipwe “nachendo.”
^ Chipwe “natushimutwiji.”
^ Hepe., “chuma numba chimwe chapwile chakuswama kuli.”
^ Hepe., “muli ikiye kamwapwile shipilituko.”
^ Chipwe “namazu ove.”
^ Talende yimwe yapwile jikilongalamu 34.2. Tala Chihande B14.
^ Chipwe “nakunganda.”
^ Chipwe pamo, “vyakuhakila kumawana akuteseka hamwe navyuma.”
^ Shekele yimwe yapwile jingalamu 11.4. Tala Chihande B14.
^ Jikepwe jajindende jize vambachilenga vaka-kwasa mata amanana.
^ MuVisoneka VyachiHepeleu, mina yimwe yapwile jingalamu 570. Tala Chihande B14.
^ Chipwe “navaka-kutambukila hatuvalu.”
^ Ikiye Yufwalate.
