Mika 1:1-16
1 Awa akiko mazu aze ejile kuli Mika*+ wakuMoleshete hamakumbi aYotame,+ naAhaze,+ naHezekiya,+ vaze vapwile vamyangana javaYuta,+ awa vamumwenesele kutalisa kuSamaliya nakuYelusalema:
2 “Enu vatu veka naveka muvosena, ivwililenu.Ove mavu nenu vyuma vyatwamaho, tengelekenu matwitwi enu.Yehova ou ali mutembele yenyi yajila,Mwata Wakulitulaho Yehova, apwenga chinjiho wakumipayisa.+
3 Mwomwo Yehova mwalovoka muchihela chenyi.Mwasuluka nakulyatangila vihela vyakulunduka vyahamavu.
4 Jipili najiyengunuka mwishi yavilyachilo vyenyi,+Kaha vinema* navilipula hakachi,Nge sela vanahake kukakahya,Nge meya vanahingunwina muze mwakumbolomoka.
5 Vyumevi vinasoloka mwomwo yakulikanga chaYakova,Mwomwo yajishili javaze vakuzuvo yaIsalele.+Iya nalingisa Yakova alikange?Uno keshi vatu vamuSamaliyako+ nyi?Iya nanehe vihela vyakulunduka vyamuYuta?+Uno keshi vatu vamuYelusalemako nyi?
6 Nangulingisa Samaliya kupwa nge malala aze ali muchipapa,Nge chihela chakutumba mivinyo.Nangukazukwila* malolwa ayo muchinema,Kaha nangukaseza vihela vyayo munganavene.
7 Makombelo ayo akusonga nangukawachika chikichiki,+Vyonda vyayo vyosena vize vamwondele* navakavyocha mukakahya.+Nangukanongesa makombelo ayo osena.Mwomwo awawanyine muvyonda vyamuujila wenyi,Kaha nawakapwa cheka vyonda vyakuhana vaka-ujila.”
8 Nangukalila nakukalwomwoka mwomwo yavyuma kanevi.+Nangukatambuka mahinjihinji nakutambuka uselesele.+Nangukalila nge vamyumbwe,Nangukalishona nge vanyamalanda.
9 Mbandu yayo kaveshi kukahasa kukayukako.+Yinahete nakuYuta.+Musongo wayo unahete nakuYelusalema,+ kuvikolo vyavatu jami.
10 “Kanda namwambulula chuma kana muNgatako.Kanda namulilako.Lyalangenu mulukungu muMbete-afwala.*
11 Enu mwatwama kuShafwile, yenunga uselesele nasonyi.Ava vatwama muZanane kavalovokelemoko.Vatu vamuMbete-ezele navakalila, kaha kaveshi kukamikafwa chekako.
12 Vatu vatwama muMalote vanavandaminanga vyuma vyamwaza,Oloze Yehova nanehe vyuma vyavipi kuchikolo chaYelusalema.
13 Enu mwatwama kuLakishe,+ kashililenu litemba kutuvalu vaka-kuzata mumazavu.Enu yenu mwalingishile mwanapwevo Zeyone aputuke kulinga shili,Mwomwo milonga yavaIsalele+ yakulikanga vayiwanyine muli enu.*
14 Shikaho namukahana Moleshete-ngata wana wakulisalisa nayo.Jizuvo jaAkajive+ jatangishile vamyangana javaIsalele.
15 Enu mwatwama kuMalesha,+ nangukaminehela muka-kumifungulula.*+Upahu waIsalele naukaheta nakuAtulame.+
16 Liteulenu jikambu jenu, liteulenu tukongo mwomwo yavana venu mwazanga.Liteulenu kumitwe yenu mufwane nge ngonga,Mwomwo vana venu vanamitambulavo nakuvatwala muufunge.”+
Kwinyikila Chamwishi
^ Mika hilijina lyaMikayele chipwe Mikaya mukavatu, kulumbununa “Iya Napu Nge Yehova?”
^ Chipwe “vyana.”
^ Hepe., “Nangukamwangila.”
^ Chipwe “Fweto yamuujila wenyi yosena.”
^ Chipwe “muzuvo yaAfwala.”
^ Chipwe “muli ikiye,” kulumbununa mwanapwevo Zeyone.
^ Chipwe “muka-kumiheta.”