Mika 6:1-16
6 Ivwililenu vyuma mwahanjika Yehova.Katukenu mwambulule chihande chenu kujipili jajinene,Kaha jipili jajindende jivwenga mazu enu.+
2 Enu jipili, nenu vihela vyakukola vyamavu,Ivwililenu omu Yehova mwajimbula chihande chenyi,+Mwomwo Yehova ali nachihande navatu jenyi.Mwasopa navaIsalele, ngwenyi:+
3 “Enu vatu jami, vyuma muka ngunamilingi?Uno ngunamivwisa ngachilihi chipekete?+Ngupayisenu.
4 Ngwamilowele mulifuchi lyaEjipitu,+Ngwamisokwele muzuvo yaundungo.+Ngwamihanyine Mose, naAlone, naMilyame+ vamitetekele.
5 Enu vatu jami, anukenu vyuma ahanjikile Mbalaka mwangana waMowave,+Namazu vamukumbulwile kuli Mbalame mwanaMbeyole,+Mangana mutachikize vilinga vyakwoloka vyaYehova.Vyumevi vyalingiwile kuShichime+ mbwe nakuNgilingale.”+
6 Vyuma muka nanguya navyo kumeso aYehova?Nangulifukula naka kumeso aKalunga uze azezuka helu?Uno nguyenga kumeso enyi namawana akulumba,Navana vavangombe vamwaka umwe tahi?+
7 Uno Yehova mwevwila kuwaha makombakaji avizamba jamikoko,Natulwiji vamaji tununu nyi?+Uno ngumuhane mwanami watwatwa havilinga vyami vyakuhenga nyi?Ou mwanami wakulisemena ngumuhane hajishili jami tahi?*+
8 Ove mutu, Kalunga nakulweze vyuma vyamwaza.Vyuma muka ali nakusaka* Yehova kuli ove?Ali nakusaka kaha ulinge mwaya chiyulo chakwoloka,+ nakuzanga kushishika,*+Nakulinyisa+ hakutambuka naKalunga kove.+
9 Yehova ali nakuvilika kunganda.Vaze vali namangana navevwa lijina lyove woma.Ivwililenu kumukombo nakuli uze nautongola.+
10 Uno muzuvo yamuka-kuhuka muchili lika luheto lwakuwanyina mukuhukaNachesekelo chalifwa* chakutangisa chakwivwisa unyengwe tahi?
11 Kutala ngunahase kupwa nguutoma* nge nanguzachisa vipezaliso vyakuhuka,Najinjeke jamalolwa akupezalisa akutangisa tahi?+
12 Vatu valuheto vatwamamo vanapu vaulyanyi,Kaha vatu vatungamo veji kuhanjikanga makuli.+Malimi avo eji kuhanjikanga vyuma vyakutangisa.+
13 “Shikaho nangukamiveta nakumitwa jimbandu,+Nangukamihombesa mwomwo yajishili jenu.
14 Namukalya, oloze kamweshi kukekutako.Mumajimo enu namukapwa mwamokomoko.+Vyuma namukambata, kavyeshi kukaheta vyosenako,Kaha vize navikaheta, nangukavihana kupoko yamukwale.
15 Namukatumba jimbuto, oloze kamweshi kukajahako,Namukachika jilive namahinji enu, oloze kamweshi kukazachisa maji ajoko.Namukakamuna vinyo vyavihya, oloze kamweshi kukavinwako.+
16 Mwomwo mweji kukavangizanga jishimbi jaOmoli navilinga vyakuzuvo yaAhave+ vyosena.Kaha mweji kulinganga mweshomwo navamilweza,Shikaho nangukamilingisa kupwa chuma chakukomwesa vatu,Kaha vatu navakalihaha havatu jayo.+Namukomika omu navakamihenda kuli vatu veka naveka.”+
Kwinyikila Chamwishi
^ Chipwe “hajishili jamwono wami tahi?”
^ Chipwe “nakupwa nalikoji nakusolola zangi.” Hepe., “nakuzanga zangi yakwilila.”
^ Chipwe “ali nakwihula.”
^ Tala Chihande B14.
^ Chipwe “kupwa wakuhona mulonga.”
