Mika 7:1-20
7 Lamba kuli ami! Ngunapu nge ouMwazeneka kuwana mihako yamivinyo alyenga,Nge ou mwazeneka kuwana jikuyu jakulivanga jize afwila*Muwande muze vanahe lyehi mihako yamungonde yanonga,Muze vanahuhwojola lyehi mihako yamivinyo.
2 Vatu vakushishika vanafu* hamavu.Hali vatu kaheshi mutu wakusungamako.+Vosena vanaswame mangana vamwange manyinga avatu.+Mutu himutu ali nakutela ndumbwenyi lyoji.
3 Mavoko avo anejilila kulinga vyuma vyavipi.+Chilolo ali nakufwila kumuhanako vyuma vimwe,Muka-kuyula ali nakusaka kumufweta,+Mutu wamulemu nasolola ovyo ali nakufwila mumuchima wenyi,*+Vosena vali nakuzachila hamwe vyuma vyavipi.
4 Mutu wamwenemwene muli vakiko napu nge chikwata,Mutu wakusungama chikuma muli vakiko napihi kuhambakana chipato chamingonga.Likumbi lyakuvazangamisa,* lize vavulukile vaka-kuvalama, lili nakwiza.+Kaha navakevwa woma.+
5 Kanda namufwelela minenuko,Kanda namufwelela sepa lyenu wahamuchimako.+Zangamenu navyuma namuhanjika kuli mutu uze munasavala nenyi.
6 Mwomwo mwana walunga mwalumbilisa ise,Kaha mwana wapwevo mwakindukila naye,+Nayewenu yamutu mwakindukila nayewenu.+Vaka-kole jamutu vanapu vaze vakuzuvo yenyi.+
7 Oloze ami kwami nangutalililanga Yehova,+Nanguvandaminanga Kalunga muka-kungulwila.+Kalunga kami mwangwivwa.+
8 Ove muka-kole* wami, kanda nauwahilila hali amiko.Numba tuhu ngunaholoka, nangukatuka cheka.Numba tuhu nguli mumilima, Yehova mwapwa mumunyi wami.
9 Nangumika utenu waYehovaMwomwo ngunalingi shili kuli ikiye.+Nangumika palanga nomu mwahakula chihande chami nakulinga mwachiyulo kuli ami.Mwanguneha mumusana.Kaha nangumonanga kwoloka chenyi.
10 Muka-kole wami naikiye mwakachimona.Kaha sonyi nayikawana uze angwambile ngwenyi:“Yehova Kalunga kove ali kulihi?”+Ngocho nangukamutala.Kaha navakamulyatangila nge ulova uze uli mujila.
11 Likumbi lize nalikapwa lyakutungulula kembwe yove yamalolwa.Halikumbi kana, ngiza yove navakayitohwesa.
12 Kaha kuli ove nakukeza vatuVakufuma kuAsulya, nakujinganda jakuEjipitu,Kufuma kuEjipitu swi nakuKalwiji,*Kufuma kukalungalwiji swi nakukalungalwiji mukwavo, kufuma kupili yimwe swi nakupili yikwavo.+
13 Kaha lifuchi nalikasala ngunduMwomwo yavyuma vanalingi vaze vatwamamo.*
14 Funganga vatu jove nambwechi yove, utanga uze wapwa uswana wove,+Uze wapwilenga ukawawo mumusenge, mukachi kamilemba.Veche valile vyakulya muMbashane namuNgileyate+ nge muze chapwilenga kumakumbi akushikulu.
15 “Nangukamisolwela vyuma vyamwaza,Nge muze ngwamisolwelelevyo omu mwafumine mulifuchi lyaEjipitu.+
16 Vaka-mafuchi navakamona vyuma kana, kaha navakevwa sonyi chamokomoko nangolo javo.+Navakalikwata kutunwa twavo.Matwitwi avo nawakajika.
17 Navakalya mavu nge manoka.+Navakalichikimina nakulovoka muvihela vyavo vyakukola nge vaka-kuhalala hamavu.Navakalichikimina nakwiza kuli Yehova Kalunga ketu.Kaha navakamwivwanga woma.”+
18 Kalunga muka apwa nge yove,Uze eji kukonekelanga vaze vasalaho havatu jenyi+ milonga yavo yakuzombwojoka jishimbi nakuhenga chavo?+Kaweshi kukapihilila haya myaka yosenako.Mwomwo ukwechi zangi yakwilila.+
19 Naukatutetela cheka,+ naukafungulula* vilinga vyetu vyakuhenga.Naukambila jishili jetu josena mumwambe wakalungalwiji.+
20 Naukashishika kuli Yakova,Naukasolola zangi yove yakwilila kuli Apalahama,Nge muze walishingile kuli vakakuluka jetu kumakumbi akushikulu.+
Kwinyikila Chamwishi
^ Chipwe “jize wafwila mwono wenyi.”
^ Chipwe “vananongo.”
^ Chipwe “ovyo wafwila mwono wenyi.”
^ Hepe., “Likumbi lyakumizangamisa.”
^ MuchiHepeleu, ou “muka-kole” apwa wapwevo.
^ Ikiye Yufwalate.
^ Hepe., “Mwomwo yamihako yavilinga vyavaze vatwamamo.”
^ Chipwe “naukalyatangila.”
