Muka-kwambulula 12:1-14
12 Ngocho anukanga Tengi yove Wamunene hamakumbi aukweze wove,+ shimbu kanda makumbi aluyando ezenga,+ shimbu kanda myaka yizenga omu naukamba ngwove: “Kuyoya ngunachihungu,”
2 shimbu kanda likumbi, nakumunyika, nakakweji, navatanganyika vilave wi,+ shimbu kanda mavwi akinduluke omu vula yinachi lyehi,*
3 omu vaka-kulama zuvo navakalichikiminanga, omu malunga vangolo navakafumbama, omu mapwevo navakalitwamina kucheka unga mwomwo yakupwa vavandende, omu mapwevo vaka-kutala hajinjanena navakamona milima kaha,+
4 omu vikolo vyakumukwakwa navikalisoka, omu chivumo chakucheka unga nachikevwakanyina mwishi, omu mutu mwakahinduka hakwivwa kuhanjika chakajila, omu vana vamapwevo vosena navakembila myaso mwishi,+
5 nomu nawa mutu mwakevwa woma vihela vyakulunduka, omu mwakapwa namuzuzu wakutambuka mujila. Mumonde naukafukula,+ mbimba mwakatambuka nakulikoka, kaha chipepa chavyakulya nachikakuma,* mwomwo mutu himwaya kuzuvo yenyi kuze mwakapwanga haya myaka yosena,+ kaha vaka-kulishona hinavatambwojoka mujila.+
6 Anukanga Tengi yove shimbu kanda mukole wapalata uvatuke, shimbu kanda chiloso chaulu chichikike, shimbu kanda mulondo wahakaselwoke upazuke, shimbu kanda mukovocho wakulishima upazuke.
7 Ngocho lukungu hinalukinduluka kumavu+ kuze lwapwile, kaha shipilitu* hinayikinduluka kuli Kalunga wamuchano uze ayihanyine.+
8 Muka-kukungulula+ vatu nambe ngwenyi: “Hiufwefwelekete waunene Vyuma vyosena vinapu vyaufwefwelekete.”+
9 Muka-kukungulula vatu apwile namangana, kaha nawa anangwilenga lika vatu vyuma atachikijile,+ ashinganyekelenga nawa nakuhehwojola kanawa mangana asoneke* vishimo vyavivulu.+
10 Muka-kukungulula vatu afwililile kuwana mazu amwaza+ nakusoneka mazu akwoloka amuchano.
11 Mazu avaka-mangana anapu nge myumba yakutambukisa vangombe,+ kaha vyuma veji kuhanjikanga vosena vinapu nge jimbambo jakupapalila kanawa. Mazu kana afuma kuli kafunga umwe.
12 Ove mwanami, kutalisa kuvyuma vyeka vyakuzomboka hali evi, nangukuhuhumuna ngwami: Kusoneka mikanda yayivulu kachakumako, kaha kuyitanga chikuma cheji kuzeyesanga mujimba.+
13 Hakuwana nge vyuma vyosena tunavivu lyehi, ngocho echi chikiko chikukulwishi chachihande: Ivwanga Kalunga wamuchano woma+ nakulama jishimbi jenyi,+ mwomwo echi chikiko chilika vatwama nacho vatu vosena.+
14 Mwomwo Kalunga wamuchano mwakatala havilinga vyosena, kuhakilako vene navyuma vyakusweka vyosena, mangana akamone numba nge vyamwaza nyi vyavipi.+
Kwinyikila Chamwishi
^ Chipwe pamo, “akinduluke navula.”
^ Hepe., “kaha muhako wakuneha chipepa chavyakulya naukapulika.”
^ Chipwe “kaha ngolo jakuyoya.”
^ Chipwe “alongese.”
