Muka-kwambulula 2:1-26
2 Jino ngwalyambile mumuchima wami ngwami: “Mana ngweseke kwingila muviseke* ngumone vyuma vyamwaza vyeji kufumangamo.” Oloze talenu! Nachechi nawa chapwile chaufwefwelekete.
2 Ngwahanjikile ngwami, “Kuseha chapwa kuzaluka.”Ngwahanjikile nawa ngwami, “Viseke* vyapwa vyakaze?”
3 Ngwajinyine namuchima wami wosena kundupukila mukunwa chikuma vinyo+ oku nguli nakulama mangana ami. Ngwalingilenga navyuma vyauleya mangana ngumone chuma chamwaza vatela kulinga vatu hamakumbi amandende navayoyanga mwishi yamelu.
4 Ngwazachilenga milimo yayinene.+ Ngwalitungilile jizuvo,+ nakulilimina mande amivinyo.+
5 Ngwaliliminyine matepa namilemba, kaha ngwatumbilemo mitondo yamihako yakulisezaseza.
6 Ngwalifulilile vijiva vyameya mangana ngutukumwinenga chipapa chize chapwile namitondo yize yafukililenga.
7 Ngwahetele vangamba vamalunga navava vamapwevo,+ kaha ngwapwile navangamba vakusemukila muzuvo yami.* Ngwahetele nawa vimuna vavavulu, vangombe navimuna veka vavandende.+ Ngwapwile naluheto chikuma kuhambakana vaze vatwaminenga muYelusalema shimbu kanda ami ngupwengako.
8 Ngwahetele palata naulu wauvulu,+ vize vyapwa luheto* lwavamyangana najingalila.+ Ngwalikungulwilile nawa vaka-kwimba vamalunga navava vamapwevo, navyuma vize vyeji kwivwisanga malunga kuwaha chikuma. Vyuma kana shina mapwevo vavavulu.
9 Ngocho ngwapwile naulemu chikuma kuhambakana vatu vosena vatwaminenga muYelusalema+ shimbu kanda ami ngupwengako. Kaha ngwapwile lika namangana.
10 Ngwalingilenga cheshocho ngwafwilililenga.*+ Ngwalingilenga cheshocho chasuulwishile muchima wami, mwomwo muchima wami wawahililile namilimo yami yosena ngwakilikichilenga. Eyi yikiko yapwile fweto* yakumilimo yami yosena ngwakilikichilenga.+
11 Oloze omu ngwashinganyekele hamilimo yosena ngwazachilenga namavoko ami, nahamilimo yosena ngwateselemo,+ ngwamwene ngwami vyuma vyosena vyapwile vyaufwefwelekete, hikuhangasana peho kaha.+ Mwishi yalikumbi+ kamwapwile chuma chimwe chize chapwile nanganyo yamwenemweneko.
12 Kaha ngwakekesele nawa mangana, nakuzaluka, nauleya.+ (Mwomwo mutu uze mwakaswana mwangana mwakalinga ikaze? Mwakalinga vyuma vize vanalingi lyehi vatu.)
13 Ngwamwene ngwami mangana apwa amwaza kuhambakana uleya,+ nganomu musana wapwa wamwaza kuhambakana milima.
14 Mutu wamangana eji kumonanga kanawa,+ oloze chileya eji kutambukanga mumilima.+ Oloze ngunamono ngwami kwatwama chuma chochimwe chize cheji kuvawananga vosena.+
15 Shikaho ngwalyambile mumuchima wami ngwami: “Vyuma vize vyeji kusolokanga kuli chileya vikiko navikasoloka nakuli ami.”+ Kaha nganyo mukaze ngunawanyinaho hakupwa namangana chikuma? Ngocho ngwalyambile mumuchima wami ngwami: “Nachechi nawa chinapu chaufwefwelekete.”
16 Mwomwo namutu wamangana nachileya kaveshi kuvanuka haya myaka yosenako.+ Vosena veji kuvavulyamanga hakuhita chamakumbi. Mutu wamangana eji kufwanga ngachilihi? Eji kufwanga nganomu eji kufwanga chileya.+
17 Ngocho ngwahungile kuyoya+ mwomwo ngwamwene ngwami vyuma vyosena vize vyeji kulingiwanga mwishi yalikumbi vyapwa hikuyandangila kaha. Vyuma vyosena vinapu vyaufwefwelekete,+ hikuhangasana peho kaha.+
18 Ngwahungile vyuma vyosena ngwatukuchililenga mwishi yalikumbi,+ mwomwo nangukavisela mutu uze mwakanguswana.+
19 Iyaze natachikiza numba nge mutu kana mwakapwa muka-mangana nyi chileya?+ Oloze mwakapwa nawata havyuma vyosena vize ngwazachile nangolo jami namangana ami numba nguvihete mwishi yalikumbi. Nachechi nawa chinapu chaufwefwelekete.
20 Ngocho muchima wami wahombele hakwanuka milimo yosena ngwakilikichile mwishi yalikumbi.
21 Mwomwo mutu nahase kukilikita namangana, nachinyingi, nauhashi, oloze mwakaseza vyuma vyenyi vyosena kumutu uze azenekele kuvitukuchila.+ Nachechi nawa chinapu chaufwefwelekete kaha nawa hiluvinda.*
22 Nganyo mukaze eji kuwanyinangaho mutu hamilimo yenyi yosena eji kuhundangananga nahakupwa namuchima wakufwila kukilikita mwishi yalikumbi?+
23 Mwomwo mukuyoya chenyi chosena milimo yenyi yeji kumunehelanga lamba nachipekete.+ Kaha nawa naufuku muchima wenyi kaweshi kunokako.+ Nachechi nawa chinapu chaufwefwelekete.
24 Kakweshi chuma chamwaza atela kulinga mutu kuhambakana kulya nakunwa nakulivwisa kuwaha* hamilimo yenyi eji kukilikitangako.+ Ngunamono ngwami nachechi nawa chafuma kulivoko lyaKalunga wamuchano,+
25 mwomwo iyaze eji kulyanga nakunwa kanawa kunguhambakana ami?+
26 Kalunga eji kuhananga mangana nachinyingi nakuwahilila+ kumutu uze eji kumwivwisanga kuwaha. Oloze muka-shili eji kumuhananga mulimo wakukungulula vyuma nakuvilunjika mangana avihane kumutu uze eji kwivwisanga Kalunga wamuchano kuwaha.+ Nachechi nawa chinapu chaufwefwelekete, hikuhangasana peho kaha.
Kwinyikila Chamwishi
^ Chipwe “mukuwahilila.”
^ Chipwe “Kuwahilila.”
^ Hepe., “navana vamuzuvo yami.”
^ Chipwe “vikumba vaheta kaha.”
^ Hepe., “cheshocho azangilenga meso ami.”
^ Chipwe “chazano.”
^ Chipwe “hiluyando.”
^ Chipwe “nakulingisa mwono wenyi ulivwise kuwaha.”
