Muka-kwambulula 4:1-16
4 Jino ngwashinganyekele cheka havilinga vyaluyanjisa vyosena vize veji kulinganga vatu mwishi yalikumbi. Ngwamwene masoji avaze vayanjishilenga, kaha kakwapwile mutu wakuvavendejekako.+ Vaka-kuvayanjisa vapwile nangolo chikuma, ngocho kakwapwile mutu wakuvavendejekako.
2 Kaha ngwamwene ngwami vatu vaze vafwa lyehi vanawahe kuhambakana vatu vavatonyi.+
3 Oloze nawahe chikumanyi kuhambakana hali ava shina ou kanda achisemuke,+ ou kanda amone vilinga vyavipi vize vali nakulinga vatu mwishi yalikumbi.+
4 Ngunamono nawa omu vatu veji kuzatanga nangolo* nauhashi kachi nge vali nakufwila kulikomwesa.+ Nachechi nawa chinapu chaufwefwelekete, hikuhangasana peho kaha.
5 Chileya eji kukonekanga mavoko enyi okunyi chimwahokama.*+
6 Kunokako chindende* chinawahe kuhambakana kukilikita chikuma* nakuhangasana peho.+
7 Ngwashinganyekele nawa hachuma chikwavo chaufwefwelekete cheji kulingiwanga mwishi yalikumbi.
8 Kwatwama mutu umwe uze atwama uka wenyi. Keshi namasepa, chipwe navana, chipwe navandumbwenyiko, oloze kalitwamina kukilikitako. Meso enyi kawasuuluka naluheto ahetako.+ Kutala eji kulihulisanga ngwenyi, ‘Uno nguli nakukilikichila iya, nguli* nakuhonena ika kulivwisa kuwaha vyuma vyamwaza’?+ Nachechi nawa chinapu chaufwefwelekete, himilimo yakumwenesa lamba kaha.+
9 Vavali vanawahe kuhambakana mutu umwe,+ mwomwo veji kupwanga nafweto yamwaza* kumilimo yavo navakilikita.
10 Kachi nge umwe nalimbuka, mukwavo mwamuhindula. Nyize ou nazeneka mutu wakumuhindula mwalinga muka kachi nge nalimbuka?
11 Kaha nawa kachi nge vatu vavali navasavala hamwe navalizuminyina, oloze mutu uka wenyi mwalizuminyina ngachilihize?
12 Mutu nahase kufungulula mutu uze ali uka wenyi, oloze vatu vavali keshi kuhasa kuvafungululako. Mukole wajitondo jitatu kaveshi kuhasa kuumbitula muwashiwashiko.
13 Kanyike wamangana wakuhutwa nawahe kuhambakana mwangana wakashinakaji wachileya,+ uze azeneka mangana akwivwilila vyuma navamuhuhumuna.+
14 Mwomwo mwafuma* mukamenga nakupwa mwangana,+ numba tuhu asemukilile muuhutu+ muwangana wenyi.
15 Ngwahunananyine havatu vavatonyi vosena vaze veji kutambukanga mwishi yalikumbi, nahavyuma vyeji kusolokanga kuli kanyike uze mwaswana hachihela chamukwavo.
16 Numba tuhu mwapwanga lika navatu vakumukundwiza, oloze vaze navakeza munyima yenyi kaveshi kukasuuluka nenyiko.+ Nachechi nawa chinapu chaufwefwelekete, hikuhangasana peho kaha.
Kwinyikila Chamwishi
^ Chipwe “veji kukilikitanga.”
^ Hepe., “mavoko enyi nakulya nyama yenyi ivene.”
^ Hepe., “Mukamo umwe wakunoka.”
^ Hepe., “kuhambakana mikamo yivali yakukilikita.”
^ Chipwe “mwono wami uli.”
^ Chipwe “nanganyo yayinene.”
^ Pamo vali nakuvuluka kanyike wamangana.
