Muka-kwambulula 5:1-20
5 Lama lihinji lyove omu nauya kuzuvo yaKalunga wamuchano.+ Chinawahe kupandama kwakamwihi nakwivwilila+ kuhambakana kuhana vimuna vakuvatula nganomu veji kulinganga vileya,+ mwomwo kavatachikiza ngwavo kulinga ngocho chapwa chachipiko.
2 Kanda naulusuka kuhanjika nakanwa kove chipwe kulusuka kuhanjika namuchima wove kumeso aKalunga wamuchanoko,+ mwomwo Kalunga wamuchano atwama mwilu, oloze ove watwama hamavu. Shikaho watela kwesekela vyakuhanjika.+
3 Mutu eji kulotanga mwomwo yakupwa navishinganyeka vyavivulu,*+ kaha chileya eji kumbombolanga mwomwo yakuhanjika mazu amavulu.+
4 Omu naushika Kalunga lushiko, kanda naulangisa kulutesamoko,+ mwomwo keshi kwivwila kuwaha vileyako.+ Tesamo lushiko unashiki.+
5 Chinawahe kuli ove kuzeneka kushika lushiko kuhambakana kushika lushiko nakuzeneka kulutesamo.+
6 Kanda nawechelela kanwa kove kakulingise* shili,+ chipwe kwamba kumeso akangelo* ngwove chapwanga kulimbenja kahako.+ Ikaze naulingishila Kalunga wamuchano akukwachile matoto mwomwo yavyuma unahanjika, nakunongesa jino milimo yamavoko ove?+
7 Nganomu kupwa navishinganyeka vyavivulu cheji kunehanga vilota,+ mukiko nakuhanjika mazu amavulu chapwila chaufwefwelekete. Oloze ivwa Kalunga wamuchano woma.+
8 Kachi nge naumona chilolo mwayanjisa muka-kuhutwa mungalila yove, chipwe mwazeneka kulinga mwachiyulo, mwakwoloka, kaha kanda naulikomokela hachuma kanako.+ Mwomwo chilolo kana vali nakumumona kuli uze namuhambakana ngolo. Kaha kuli veka nawa vanahambakana vakwavo ngolo.
9 Nganyo yalifuchi nawa veji kulipangilangayo vosena. Mwangana naikiye nawa apendamina hajimbuto vanamulimina muwande.+
10 Ou azanga palata keshi kukasuuluka napalatako, kahou azanga nawa luheto keshi kukasuuluka najimbongo mwawanako.+ Nachechi nawa chinapu chaufwefwelekete.+
11 Nge vyuma vyamwaza vinavulu, navaka-kuvilya nawa veji kuvulanga.+ Kaha mwenyavyo mwawanyinaho yikaze? Mwejiva kuvitala nameso kaha.+
12 Tulo twamuka-kuzata twapwa tuyema, numba apwa nakulya chachindende chipwe chachivulu. Oloze muka-luheto keshi kuya mutuloko mwomwo yakuvula chavyuma aheta.
13 Elu lukiko luvinda* lwalunene ngunalimwena mwishi yalikumbi: luheto luze aheta mutu lweji kumwingisanga ivene muukalu.
14 Luheto kana eji kulujimbalisanga hakuluzachisa kumilimo yakuhingama, ngocho keshi kusala naluheto numba lumweko+ omu mwasema mwanenyi.
15 Nganomu mutu eji kusemukanga mujimo lyanaye uselesele, mukiko mwakaya vene ngana.+ Keshi kukambata chuma numba chimwe chakumilimo yenyi nakilikitako.+
16 Nachechi nawa chinapu hiluvinda* lwalunene: Mwamuze vene ejile mukiko nawa mwakaya. Shikaho nganyo mukaze mwawanyinaho mutu uze mwakilikichila peho kaha?+
17 Kaha nawa makumbi osena eji kulilanga vyakulya mumilima oku ali nakwivwa chipekete chikuma, nakukola, namatoto.+
18 Echi chikiko chuma chamwaza, chamwenemwene ngunamono: mutu kana atela kulya nakunwa nakulivwisa kuwaha hamilimo+ yenyi yosena mwakilikita mwishi yalikumbi, hamakumbi amandende akuyoya chenyi aze namuhane Kalunga wamuchano. Mwomwo eyi yikiko fweto* yenyi.+
19 Kaha nawa nge Kalunga wamuchano nahane mutu luheto navikumba+ nangolo jakulivwisavyo kuwaha, mutu kana ambate fweto* yenyi nakulivwisa kuwaha hamilimo yenyi nakilikita. Ou unapu hiwana waKalunga.+
20 Mwomwo keshi kumona* omu nawahita makumbi akuyoya chenyi hakuwana nge Kalunga wamuchano namuhungika navyuma vize vili nakumwivwisa kumuchima kuwaha.+
Kwinyikila Chamwishi
^ Chipwe “yakulizakamina chikuma.”
^ Hepe., “kalingise mujimba wove ulinge.”
^ Chipwe “amuluwa.”
^ Chipwe “luyando.”
^ Chipwe “hiluyando.”
^ Chipwe “chazano.”
^ Chipwe “chazano.”
^ Chipwe “keshi kwanuka.”
