Muka-kwambulula 6:1-12
6 Elu lukiko luvinda* ngunalimwena mwishi yalikumbi luze lweji kusolokanga chikuma kuvatu:
2 Kalunga wamuchano eji kuhananga mutu luheto, navikumba, naupahu, ngocho keshi kukalikiza chuma afwila numba chimweko. Oloze Kalunga wamuchano keshi kumulingisa alivwisevyo kuwahako, okunyi mutu weka nahase kulivwisavyo kuwaha. Echi chinapu chaufwefwelekete, kaha nawa hiluyando lwalunene.
3 Kachi nge mutu mwasema vana 100 nakuyoya myaka yayivulu nakupwa kashinakaji, oloze mwahona kulivwisa kuwaha vyuma vyenyi vyamwaza shimbu kanda ayenga mufuka, kaha nangwamba ngwami nakemba uze nafwila mujimo lyanaye nawahe kuhambakana ikiye.+
4 Mwomwo ou kemba nalishinyi tuhu kulovoka hakuwana nge nayi mumilima. Lijina lyenyi linejiva kutoka mumilima.
5 Numba tuhu kamwene likumbi chipwe kutachikiza chuma numba chimweko, oloze nawahe* kuhambakana ikiye.+
6 Nganyo muka yiliho kachi nge mutu mwayoya myaka 2,000, oloze mwazeneka kulivwisa kuwaha? Kutala vatu vosena kaveshi kuya kuchihela chochimweko nyi?+
7 Vatu vosena vazachila kulya,+ oloze chipepa chavyakulya kachakumako.
8 Uno muka-mangana ahambakanyina chileya+ halihi? Mokomoko nganyo muka mwawanyinaho muka-kuhutwa hakulisolola ngwenyi ali nakuyoya kanawa?*
9 Chinawahe mutu kulivwisa kuwaha vyuma namono nameso enyi kuhambakana kufwila vyuma vize kamweneko. Nachechi nawa chinapu chaufwefwelekete, hikuhangasana peho kaha.
10 Vyeshovyo viliko, vavilukile lyehi majina. Kaha namutu vamutachikiza omu apwa, keshi kuhasa kulipula jipami* namutu uze namuhambakana ngoloko.
11 Kuhanjika chikuma cheji kulingisanga mutu ahanjike navyevi vyaufwefwelekete. Kahaze nganyo muka mwawanyinaho mutu kana?
12 Iyaze atachikiza vyuma vyamwaza atela kulinga mutu mukuyoya chenyi, hamakumbi amandende akuyoya chenyi chaufwefwelekete chize cheji kulelangananga nge muvwimbimbi?+ Iyaze nahase kulweza mutu vyuma navikasoloka mwishi yalikumbi nge hiwauchiko?
Kwinyikila Chamwishi
^ Chipwe “luyando.”
^ Hepe., “nanoko chikuma.”
^ Hepe., “ali nakutambuka kumeso avatu vavatonyi.”
^ Chipwe “kuhasa kusopa.”
