Muka-kwambulula 8:1-17
8 Iyaze alifwana namuka-mangana? Iyaze atachikiza mwakukumishila ukalu?* Mangana eji kulingisanga mutu ataunuke kumeso, kaha eji kufumisanga mikanya kumeso.
2 Nangwamba ngwami: “Kavangiza jindongi+ jamwangana mwomwo yalushingo unalishingi kuli Kalunga.+
3 Kanda nawanguhwisa kufuma kumeso enyiko.+ Kanda nawazana muchuma chachipiko,+ mwomwo nahase kulinga cheshocho nasake kulinga,
4 hakuwana nge lizu lyamwangana lyatwama nangolo.+ Iyaze nahase kumulweza ngwenyi, ‘Ika uli nakulingila chuma kana?’”
5 Ou eji kukavangizanga jishimbi keshi kukengila muukaluko,+ kaha mutu wamuchima wamangana mwatachikiza lwola lwakutamo lwakulinga chuma najila yakuchilingilamo.+
6 Mwomwo chuma hichuma chikwechi lwola lwakuchilinga najila yakuchilingilamo,+ kaha nawa ukalu wavatu wapwa wauvulu chikuma.
7 Mwomwo nayou atachikiza vyuma navikasoloka kulutwe wauchi, ngocho iyaze nahase kwambulula jila navikasolokelamo?
8 Nganomu mutu azeneka kupwa nangolo hashipilitu* chipwe kuyihonesa, naumwe wauchi akwechi ngolo jakuhonesa likumbi lyakufwa.+ Nganomu kaveshi kuhasa kusuula mutu halwola lwajitako, navilinga vyakuhuka nawa kavyeshi kwechelela uze eji kuvilinganga achineko.*
9 Vyuma vyosenevi ngunavimono, kaha ngwahakile muchima kumilimo yosena yize vanazatenga vatu mwishi yalikumbi, halwola luze mutu nashinyinyika mukwavo mutu mangana amuyanjise.*+
10 Kaha ngwamwene vaka-kuhuka vaze vengililenga nakulovoka muchihela chajila navavafunda. Oloze nakushimbula chiku, vavavulyamine munganda yize valingililenga vilinga vyakuhuka.+ Nachechi nawa chinapu chaufwefwelekete.
11 Hakuwana nge vatu vavilinga vyavipi kavavazangamishile washiko,+ michima yavatu yili nakufwila lika kulinga vyavipi.+
12 Numba tuhu muka-shili mwalinga vyuma vyavipi mapapa 100 nakuyoya nawa myaka yayivulu, oloze ngunatachikiza ngwami vaze vevwa Kalunga wamuchano woma vyuma navivawahila mwomwo vamwivwa woma.+
13 Oloze muka-kuhuka+ vyuma kavyeshi kumuwahilako, kaha nawa keshi kuvulisa makumbi akuyoya chenyi aze eji kulelangananga nge muvwimbimbiko,+ mwomwo kevwa Kalunga womako.
14 Kuli chuma chimwe chaufwefwelekete* chize cheji kulingiwanga hano hamavu: Vaka-kwoloka vamwe veji kuvalinganga mwamupi kwijiva nge vali nakulinga vyuma vyavipi,+ kaha vaka-kuhuka vamwe nawa veji kuvalinganga mwamwaza kwijiva nge vali nakulinga vyuma vyakwoloka.+ Nangwamba ngwami nachechi nawa chinapu chaufwefwelekete.
15 Shikaho ngwamwene ngwami kuwahilila chinawahe,+ mwomwo kakweshi chuma chamwaza atela kulinga mutu mwishi yalikumbi kuhambakana kulya nakunwa nakuwahililako. Echi chikiko atela kulinga mutu omu mwakilikita hamakumbi akuyoya chenyi+ aze namuhane Kalunga wamuchano mwishi yalikumbi.
16 Ngwajikile muchima wami kukuheta mangana nakumona vyuma* vyosena vyeji kulingiwanga hano hamavu,+ kaha kangwasavalilenga tulo musana naufukuko.*
17 Ngwahunananyine hamilimo yaKalunga wamuchano yosena, kaha ngwamwene ngwami vatu kaveshi kuhasa kumona mwalumbunukila vyuma vyeji kulingiwanga mwishi yalikumbiko.+ Numba veseka tuhu ngachilihi, kaveshi kuhasa kumona omu vyalumbunukilako. Numba nge navamba ngwavo vatwama namangana akutachikiza vyuma, oloze kaveshi kuhasa kumona omu vyalumbunukilako.+
Kwinyikila Chamwishi
^ Chipwe “mwalumbunukila chuma?”
^ Chipwe “hakuhwima; hapeho.”
^ Chipwe pamo, “navilinga vyavaka-kuhuka nawa kavyeshi kuhasa kuvapulululako.”
^ Chipwe “amulemeke; amulinge mwamupi.”
^ Chipwe “chakwivwisa chipekete.”
^ “Chipwe “nakumona milimo.”
^ Chipwe pamo, “kaha vatu kavamwenenga tulo musana naufukuko.”
