Ndanyele 1:1-21
1 Mumwaka wamuchitatu wachiyulo chaYehoyakime+ mwangana wavaYuta, Nevukataneza mwangana waMbavilone ejile kuYelusalema, kaha ayihakile muchingombela.+
2 Kutwala muze, Yehova ahanyine Yehoyakime mwangana wavaYuta mumavoko+ aNevukataneza. Nevukataneza ambachile navinoma vimwe vyamuzuvo* yaKalunga wamuchano, kaha ayile navyo kulifuchi lyaShinale,*+ kuzuvo* yakalunga kenyi. Vize vinoma akavihakile muzuvo yakalunga kenyi yakulamina vikumba.+
3 Jino mwangana alwezele Ashapenaze chilolo chenyi wamukulwane amunehele vaIsalele* vamwe, navatu vakutanga yawangana, navatu vavalemu.+
4 Vatu kana vatelele kupwa vakweze* vakuzeneka katenga, vamwaza, vaka-mangana, nachinyingi, nakunangakana+ vaze navahasa kuzachila kuzuvo yamwangana. Ashapenaze atelele kuvanangula kutanga nakusoneka nakuvanangula nawa lilimi lyavaKalateya.
5 Mwangana ambile ngwenyi hakumbi hakumbi vavahanenga kulya chiyema chize alilenga ikiye navinyo vize anwinenga. Vatelele kuvanangula* hamyaka yitatu, kaha hakukuma chamyaka kana numba vaputuke kuzachila mwangana.
6 Hali vaze vatu hapwile vamwe vafumine kumuyachi* waYuta. Majina avo vapwile Ndanyele,*+ naHananyiya,* naMishayele,* naAzaliya.*+
7 Jino uze chilolo wamukulwane avalukile majina eka.* Ndanyele amulukile ngwenyi Mbeleteshaza,+ Hananyiya amulukile ngwenyi Shatalake, Mishayele amulukile ngwenyi Meshake, kaha Azaliya amulukile ngwenyi Avete-nengo.+
8 Oloze Ndanyele ajinyine mumuchima wenyi ngwenyi keshi kulipihisa ivene nakulya chamwangana chiyema navinyo vyamwanganako. Ngocho alombele lisesa kuli uze chilolo wamukulwane mangana amwitavise azeneke kulipihisa navyuma kana.
9 Kaha Kalunga wamuchano alingishile uze chilolo wamukulwane evwile Ndanyele uselewa* nakumutetela.+
10 Oloze uze chilolo wamukulwane ambile kuli Ndanyele ngwenyi: “Nguli nakwivwa woma mwata wami mwangana, ou namihane vyakulya vize mwatela kulya navinyo vize mwatela kunwa. Kachi nge mwamimona munahokama okunyi vakwenu vakweze* vanatoho, kaha namunguhakisa mumulonga kuli mwangana.”
11 Oloze Ndanyele ambile kuli muka-kulama uze vatongwele kuli chilolo wamukulwane mangana alamenga ikiye Ndanyele naHananyiya, naMishayele, naAzaliya ngwenyi:
12 “Etu vangamba jove tweseke hamakumbi 10. Vatuhanenga visakwola tulyenga nameya tunwenga.
13 Omu nawakuma makumbi kana, utwesekese navakweze* vaze vali nakulya kulya chamwangana chiyema, kaha ukatulinga mweshomwo naukamona ngwove mwamwaza.”
14 Uze muka-kuvalama etavilile vyuma vahanjikile, kaha avesekele hamakumbi 10.
15 Omu akumine aze makumbi 10, vatohwele nakushikima kuhambakana vakweze* vosena vaze valilenga kulya chamwangana chiyema.
16 Ngocho uze muka-kuvalama avahanyinenga jino visakwola mukutela kuvahana kulya chiyema navinyo.
17 Jino Kalunga wamuchano ahanyine ava vakweze* vawana chinyingi namangana akutanga nakusoneka, nakunangakana. Kaha Ndanyele amuhanyine uhashi wakulumbununa vyakumwenesa navilota.+
18 Omu yakumine yize myaka atongwele mwangana,+ uze chilolo wamukulwane anehele vakweze vosena kumeso aNevukataneza.
19 Omu mwangana apwile nakuhanjika navo, naumwe wauchi halizavu kana apwile nge Ndanyele, naHananyiya, naMishayele, naAzaliyako.+ Ngocho ava vakweze vawana vazachililenga kumeso amwangana.
20 Cheshocho chuma avahulishilenga mwangana, awanyine nge vapwile vakunangakana, vamangana mapapa 10 kuhambakana vapilishitu vosena vaka-kulinga visava, navaka-kutaha+ vosena vaze vapwile muwangana wenyi wosena.
21 Kaha Ndanyele atwaminenga lika kuze palanga nakumwaka wakulivanga wachiyulo chaMwangana Kuluse.+
Kwinyikila Chamwishi
^ Chipwe “vyamutembele.”
^ Ikiko Mbavilone.
^ Chipwe “kutembele.”
^ Hepe., “vana vaIsalele.”
^ Hepe., “vanyike.”
^ Chipwe pamo, “kuvalisa.”
^ Ulumbunwiso, “Yehova Nakafwe.”
^ Kulumbununa pamo, “Iya Apwa Nge Kalunga?”
^ Ulumbunwiso, “Yehova Nasolola Uselewa.”
^ Ulumbunwiso, “Kalunga Ikiye Muka-kunguyula.”
^ Hepe., “kuvana.”
^ Kulumbununa, majina amuMbavilone.
^ Chipwe “likoji.”
^ Hepe., “vanyike.”
^ Hepe., “navanyike.”
^ Hepe., “vanyike.”
^ Hepe., “vanyike.”
