Ndanyele 10:1-21
10 Mumwaka wamuchitatu wachiyulo chaKuluse+ mwangana waPeleja, Ndanyele uze vavulukilenga ngwavo Mbeleteshaza+ vamumwenesele chakumwenesa. Muchakumwenesa kana vamulwezele mujimbu wamuchano uze wahanjikile hapindangano yayinene. Mujimbu kana wamulumbunukilile, vamukafwile atachikize vyuma amwene.
2 Hamakumbi kana, ami Ndanyele ngwalishonene+ havyalumingo vitatu vyamuundu.
3 Kangwalile vyakulya vyamwaza, chipwe nyama, chipwe kunwa vinyoko. Kangwalikwichile maji havyalumingo evi vitatuko.
4 Omu ngwapwile kuchikulo chakalwiji wamunene Chingilise*+ halikumbi lyakusokesa 24 lyakakweji wakulivanga,
5 ngwandwile meso ami, kaha ngwamwene lunga umwe navwale lihina+ namuhya waulu wakuUfwaze mumbunda yenyi.
6 Mujimba wenyi wasolokele nge lilolwa lyakulusolite,+ kumeso enyi kwaveselenga nge miveso, kaha meso enyi amunyikile nge jisoka. Mavoko enyi namahinji enyi vyasolokele nge unengu wakutumuna,+ kaha lizu lyenyi lyevwakanyine nge mazu avatu vavavulu.
7 Ami Ndanyele, yami kaha ngwamwene echi chakumwenesa,+ oloze vaze ngwapwile navo kavachimweneko. Chipwe ngocho, vaputukile kulichikimina chikuma, kaha vachinyine nakuswama.
8 Ngocho vangusezele uka wami. Echi chakumwenesa chakukomwesa ngwamwene changulingishile ngulizuzukile. Ngwasolokele mweka, ngolo jangukumine.+
9 Jino ngwevwile uze lunga mwahanjika. Oloze omu aputukile kuhanjika, ngwaulumanyine nakuya mutulo.+
10 Jino ngwevwile livoko nalingukwata,+ kaha lyangunyikishile mangana nguhinduke. Ngwahindukile nakufukama hamambuli nakulijikilila namavoko ami.
11 Uze lunga ambile kuli ami ngwenyi:
“Ove Ndanyele, ove mutu wamulemu chikuma,*+ ivwilila mazu nangukulweza. Katuka wimane, vanangutumu kuli ove.”
Kahomu ahanjikile mazu awa, ngwakatukile nakwimana oku nguli nakulichikimina.
12 Ambile nawa kuli ami ngwenyi: “Ove Ndanyele, kanda nawivwa womako.+ Kufuma vene halikumbi lyakulivanga lize wasakile kutachikiza mwalumbunukila vyuma evi, lize walinyishile kumeso aKalunga kove, kulomba chove vanachivu. Shikaho nguneza mwomwo yakulomba chove.+
13 Oloze mwata+ wangalila yawangana waPeleja angujikililanga hamakumbi 21. Jino Mikayele*+ uze apwa mwata wamulemu* ezanga nakungukafwa. Kaha ngunapunga lika kuze kuli vamyangana vaPeleja.
14 Ngocho nguneza nakukulweza vyuma navikasolokela vatu jove kumakumbi akukuminyina+ mwomwo chakumwenesa kana nachikatesamo kumakumbi akulutwe.”+
15 Jino omu angulwezele mazu awa, ngwatalile hamavu, kaha kangwahashile kuhanjikako.
16 Kaha umwe wakufwana nge mutu angukwachile hamivumbo,+ ngocho ngwalokolwele mukanwa kami nakuhanjika kuli uze emanyine kulutwe lwami ngwami: “Ove mwata wami, nguli nakulichikimina hachakumwenesa ngunamono, kaha ngolo jinangukumu.+
17 Shikaho ami ngamba yove nanguhanjika ngachilihize nayove mwata wami?+ Muno nguli nangolo jinangukumu, kaha kangweshi nakuhasa kuhwimako.”+
18 Jino uze afwanyine nge mutu angukwachile cheka nakungukolezeza.+
19 Ambile kuli ami ngwenyi: “Ove mutu wamulemu chikuma,*+ kanda nawivwa womako.+ Kuunda chipwenga nayove.+ Jikiza, jikiza.” Ngocho ngwajikijile omu angulwezele mazu kana, kaha ngwambile ngwami: “Ove mwata wami hanjika, mwomwo unangukolezeza.”
20 Ikiye ambile ngwenyi: “Unatachikiza vyuma ngunejila kuli ove? Nangukinduluka jino ngukazunge namwata waPeleja.+ Omu nanguya, mwata waHelase mweza.
21 Oloze nangukulweza vyuma vasoneka mumukanda wamuchano. Mwata wove Mikayele+ ikiye ali nakungukafwa muvyuma vyosenevi, kakweshi wekako.+
Kwinyikila Chamwishi
^ Hepe., “Hitekele.”
^ Chipwe “mutu wamwaza chikuma.”
^ Chipwe “apwa mukulwane wavamyata.”
^ Ulumbunwiso, “Iya Apwa Nge Kalunga?”
^ Chipwe “mutu wamwaza chikuma.”
