Ndanyele 11:1-45
11 “Ami ngwayile nakumukolezeza nakumujikijisa mumwaka wakulivanga wachiyulo chaNdaliu+ kaMete.
2 Vyuma vino nangukulweza vyamuchano:
“Mulifuchi lyaPeleja namukakatuka* vamyangana veka vatatu, kaha wamuchiwana mwakaheta luheto lwaluvulu kuhambakana vakwavo vosena. Kahomu mwakakwata ngolo mwomwo yaluheto lwenyi, mwakasowangiza vosena mangana vakafumbukile wangana waHelase.+
3 “Jino nakukakatuka mwangana wangolo, mwakapwa nawata waunene,+ kaha mwakalinga mweshomwo mwakasakila.
4 Oloze omu mwakalinga hanakwate lyehi ngolo, wangana wenyi navakaupula nakuumwangila kumitamba yiwana.+ Kaveshi kukauhana vana venyiko.* Wangana wenyi navakauvunya, kaha navakauhana kuvatu veka. Oloze viyulo vyavo kavyeshi kukeseka hamwe ngolo nachiyulo chenyiko.
5 “Kaha mwangana wakusulo mwakapwa nangolo, ou hichilolo wahali vilolo jenyi. Oloze nakukapwa umwe uze mwakamufungulula, kaha mwakapwa nawata waunene kuhambakana wata wenyi.
6 “Omu namukahita myaka, navakalikasa chivwasano. Mwanamwangana wakusulo wapwevo mwakeza kuli mwangana wakunote mangana vakalikase chivwasano. Oloze uze pwevo keshi kukapwa cheka nangoloko. Uze mwangana nawa keshi kukemanako, kaha ngolo jenyi josena najikakuma. Jino uze pwevo, navaze navakamuneha, nauze amusemene, nauze mwakamuhana ngolo halwola kana, vosena navakavahana mumavoko avatu veka.
7 Kaha mutu wakutanga yauze pwevo mwakashisa muchihela chenyi,* kaha mwakeza kulizavu lyavaka-jita nakunyemukila kaposhi kamwangana wakunote. Mwakalwa navo jita, kaha mwakavafungulula.
8 Mwakambata tulunga twavo, namakombelo avo akuzuzulula, navyuma vyavyo vyamwaza* vyapalata navyevi vyaulu, navafunge nakuya navyo kuEjipitu. Hamyaka yayivulu, keshi kukaswenya kuli mwangana wakunoteko,
9 uze mwakanyemukila wangana wamwangana wakusulo, oloze mwakakinduluka kulifuchi lyenyi.
10 “Vana venyi navakalizanga kuya kujita, kaha navakakungulula vaka-jita vavavulu chikuma. Umwe mwakaya nakukomba vyuma vyosena nge muze lyeji kukombanga livaji. Oloze mwakakinduluka, kaha mwakalwa jita swi nomu mwakaheta kuchihela chenyi chakukola.
11 “Jino mwangana wakusulo mwakevwa matoto, kaha mwakaya nakulwa jita namwangana wakunote. Ou mwangana naikiye mwakakungulula lizavu lyalinene, oloze lizavu kana navakalihana mumavoko amwangana mukwavo.
12 Kaha lize lizavu navakalimbata. Uze mwangana mwakalitohwesa mumuchima, kaha mwakalingisa tununu natununu vakalindumuke. Mwakapwa nangolo, oloze keshi kukajizachisako.
13 “Uze mwangana wakunote mwakakinduluka, kaha mwakakungulula lizavu lyalinene kuhambakana lize lyakavanga. Omu namukahita lwola, chipwe myaka, mwakeza navaka-jita vavavulu navikumba vyavivulu.
14 Halwola luze, vavavulu navakafumbukila mwangana wakusulo.
“Vikenya* vamuli vatu jove navakavambata mangana vakatesemo chakumwenesa, oloze navakahona.
15 “Mwangana wakunote mwakeza kunganda yakujingulwisa kembwe, mwakayihaka muchingombela, kaha mwakayitambula. Kaha vaka-jita vakusulo navatu jenyi vakusakula kaveshi kukahasa kwimanako. Kaveshi kukapwa nangolo jakwimanako.
16 Uze mwakamunyemukila mwakalinga mweshomwo mwakasakila, kaha naumwe wauchi mwakahasa kwimana kumeso enyi. Mwakemana muLifuchi Lyamwaza,+ kaha mwakapwa nangolo jakulalisa.
17 Mwakafwila kwiza nangolo jawangana wenyi, navakalikasa chivwasano nenyi, kaha mwakafukila muvyuma mwakalinga. Navakamwitavisa akanongese uze pwevo. Kaha uze pwevo keshi kukahasa kwimanako, keshi kukapwa nenyiko.
18 Uze mwangana mwakatalikisa jino kumatungu, kaha mwakatambula jingalila jajivulu. Kapitau kamaswalale mwakakumisa kutoleka vanatolekanga uze mwangana, kaha kaveshi kukamutoleka chekako. Mwakalingisa vakatolekenga jino uze mukwavo.
19 Kufumaho mwakakinduluka kuvihela vyakukola vyamulifuchi lyenyi, kaha mwakahukana nakulimbuka, keshi kukapwako chekako.
20 “Jino nakukakatuka mutu weka uze mwakashisa muchihela chenyi, kaha mwakatuma muka-kutambula milambu* akahitangane muwangana waukelenga. Oloze mumakumbi amandende kaha mwakahokoka. Kaveshi kukamuhokola kujita chipwe hakumukwachila utenuko.
21 “Nakukakatuka mutu uze valumbilisa,* kaha mwakashisa muchihela chenyi. Kaveshi kukamuhana ulemu wawanganako. Mwakeza mulwola lwakuunda* nakutambula wangana mujila yakumbembejeka.*
22 Vaka-jita vakufwana nge livaji navakavakomba mwomwo yaikiye, kaha navakavahokola nge omu navakahokola Twamina+ walushiko.+
23 Mutu kana mwakambembejeka lika mwomwo yachivwasano chize navakalikasa nenyi. Mwakakatuka nakupwa nangolo kuzachisa muyachi waundende.
24 Mwakeza muvihela vyaluheto* vyamungalila mulwola lwakuunda,* kaha mwakalinga vyuma vize kavalingile vakakuluka jenyiko. Mwakapangila vatu vyuma vyakupukula, navyevi vyakupupa, navikumba vyeka. Mwakajina kulukuka vihela vyakukingiwa, oloze mwakalinga ngocho halwola lwalundende kaha.
25 “Mwakomika nakukakwata ngolo jajivulu, kaha mwakaya nalizavu lyavaka-jita lyalinene nakunyemukila mwangana wakusulo. Oloze mwangana wakusulo nalizavu lyenyi lyalinene lyavaka-jita vangolo navakalizanga kulwa jita. Kaha keshi kukahasa kwimanako mwomwo navakajina kumulinga mwamupi.
26 Vaze vali nakulya vyakulya vyenyi viyema vakiko navakamunongesa.
“Lizavu lyenyi lyavaka-jita navakalikomba,* kaha vavavulu navakafwa.
27 “Ava vamyangana vavali navakafwila kulinga vyuma vyavipi, kaha navakatwama hamesa yimwe nakulyonga mwavomwavo. Oloze kaveshi kukafukilako, mwomwo kukuma chavo nachikapwako halwola vatongola.+
28 “Mwakakinduluka kulifuchi lyenyi navikumba vyavivulu chikuma, kaha mwakahunga lushiko lwajila mumuchima wenyi. Mwakafukila muvyuma mwakalinga, kaha mwakakinduluka kulifuchi lyenyi.
29 “Mwakakinduluka halwola luze vatongola, kaha mwakeza nakunyemukila lifuchi lyakusulo. Oloze kacheshi kukapwa nge muze chapwile hakavangako,
30 mwomwo mato akuKichime+ nawakamukatukila, kaha navakamwinyisa.
“Mwakakinduluka, mwakapihilila* nalushiko lwajila,+ kaha mwakafukila muvyuma mwakalinga. Mwakakinduluka, kaha mwakanyingilila vaze navakaseza lushiko lwajila.
31 Kuli ikiye nakukakatuka vaka-jita, kaha navakajilulula chihela chajila,+ chakukola, nakufumisako mulimo wakuhana wana* wahakumbi hakumbi.+
“Kaha navakahakako chuma chakwivwisa unyengwe chakuneha kunongesa.+
32 “Vaze veji kupihisanga nakuhokola lushiko, mwakavambembejeka* nakuvalingisa vakalikange. Oloze vaze vatachikiza Kalunga kavo navakajikiza nakufukila muvyuma navakalinga.
33 Vaze vakwechi mangana+ muli vatu navakanangula vavavulu vakapwe vakunangakana. Navakalindwomwoka kujipoko jamikwale, nakumilangi yakakahya. Navakavakwata ufunge, nakuvapukula vyuma hamakumbi amavulu.
34 Omu navakalindumuka, navakavakafwako chindende. Kaha vavavulu navakalipanjika kuli vakiko mwomwo yahanjikiso yavo yakuleleveka.*
35 Hali vaze vakwechi mangana nahakalindumuka vamwe mangana vakaveseke mwomwo yavakiko, vakavatomese+ nakupwa valambwe palanga nakumakumbi akukuminyina. Echi nachikalingiwa halwola vatongola.
36 “Mwangana kana mwakalinga mweshomwo mwakasakila, kaha mwakalitohwesa nakulizezula helu lyatulunga vosena. Mwakahanjika vyuma vyakukomwesa hali Kalunga katulunga.+ Mwakafukila palanga nomu Kalunga mwakaneha utenu wenyi. Mwomwo vyuma vanajinyi kuvanga vikatesemo.
37 Keshi kukavumbika Kalunga kavakakuluka jenyi, chipwe tulunga veka, chipwe chuma vafwila mapwevoko. Mwakalizezula helu lyavosena.
38 Oloze mwakalisanga kalunga wachihela chakukola. Mwakalisanga kalunga uze kavatachikijile vakakuluka jenyiko. Mwakamuhana ulu, napalata, namalolwa eka andando yayinene, navyuma vyeka vyamwaza.*
39 Mwakalukuka vihela vyakukola vyavivulu hamwe nakalunga weka. Mwakalisanga chikuma vaze vamuvumbika,* kaha mwakavahana wata vakayule vatu vavavulu. Mwakapulapula* misuka yamavu nakuyilanjisa.
40 “Hamakumbi akukuminyina mwangana wakusulo mwakalipika nenyi,* kaha mwangana wakunote mwakamunyemukila namatemba ajita amavulu, navaka-kutambukila hatuvalu vavavulu, namato amavulu. Mwakengila mumafuchi nakukombamo nge muze lyeji kukombanga livaji.
41 Mwakengila nawa muLifuchi Lyamwaza,+ kaha mafuchi amavulu nawakalindumuka. Oloze awa akiko mafuchi nawakapuluka mulivoko lyenyi: Etome, naMowave, nangalila yayilemu yavaAmone.
42 Mwakolwela mafuchi amavulu livoko lyenyi nakuwazungisa. Kaha lifuchi lyaEjipitu kalyeshi kukayovokako.
43 Mwakapwa nawata haluheto lwakuvumbama: ulu, napalata, navyuma vyeka vyamwaza* vyamuEjipitu. Vaka-Livya navaka-Echopa navakamukavangizanga.
44 “Oloze mijimbu yize nayikafuma kumututuko nakunote nayikamwivwisa kupihya, kaha mwakakwata utenu, mwakaya nakunongesa nakulalisa vavavulu.
45 Mwajika jimbalaka jawangana wenyi* hakachi, oku kalungalwiji wamunene, oku pili yajila yaLifuchi Lyamwaza.+ Kukuma chenyi nachikeza, kaha naumwe wauchi mwakamukafwa.
Kwinyikila Chamwishi
^ Chipwe “namukemana.”
^ Chipwe “kukauhana kuli ava navakasemuka kulutweko.”
^ Pamo, mwangana wakusulo.
^ Chipwe “vyandando yayinene.”
^ Chipwe “Vana vavihwanga.”
^ Chipwe “muka-kushinyinyika,” pamo kutalisa kukutelesa mitelo. Chipwe “muka-kuzachisa vatu milimo.”
^ Chipwe “mutu wamokomoko.”
^ Chipwe pamo, “Mwakeza chakuzeneka kuvahuhumuna.”
^ Chipwe “yakwonga.”
^ Hepe., “vyamaji.”
^ Chipwe pamo, “vyamungalila chakuzeneka kuvahuhumuna.”
^ Chipwe “navakalijimika.”
^ Chipwe “mwakakwachila utenu.”
^ Chipwe “vimuna vakuvatula.”
^ Chipwe “mwakavonga.”
^ Chipwe “yakwonga.”
^ Chipwe “vyandando yayinene.”
^ Chipwe pamo, “vaze atachikiza.”
^ Chipwe “Mwakapangila.”
^ Chipwe “mwakalipula nenyi jipami.”
^ Chipwe “vyandando yayinene.”
^ Chipwe “jimbalaka jamwaza chikuma.”
