Ndanyele 12:1-13
12 “Mikayele,*+ mwata wamunene uze mwakemanyinako vatu jove*+ mwakakatuka* halwola luze. Kaha nakukeza lwola lwavihuli vize kanda visolokengaho lyehi kufuma haze waputukile muyachi watete nakuheta kulwola kana. Halwola kana, vatu jove vosena vaze vakwechi majina avo vasoneka mumukanda+ navakayovoka.+
2 Kaha vavavulu vaze vanasavala kwishi yamavu navakahinduka. Vamwe navakatambula kuyoya chahaya myaka yosena, veka navakavasaula nakuvalumbilisa haya myaka yosena.
3 “Vaze vanangakana navakamunyika nge kumunyika chamuutangatanga walilu, kaha vaze vali nakukafwa vatu vavavulu mangana vapwenga vaka-kwoloka navakamunyika nge vatanganyika haya myaka namyaka.
4 “Oloze ove Ndanyele, sweka mazu awa, lamika katachikijilo kumukanda palanga nakumakumbi akukuminyina.+ Vatu vavavulu navakatambwojokanga noku noku,* kaha chinyingi chamwenemwene nachikavula.”+
5 Kufumaho ami Ndanyele ngwamwene vangelo veka vavali vanemana kuze. Umwe emanyine kungenge musali yimwe yakalwiji, kaha mukwavo emanyine kungenge musali yikwavo.+
6 Kaha umwe atambakanyine uze lunga avwalile lihina,+ uze apwile helu lyameya akalwiji kana ngwenyi: “Namuhita tando yipwa halihi numba evi vyuma vyamwaza vikatesemo?”
7 Jino uze lunga avwalile lihina, uze apwile helu lyameya akalwiji kana ngwamwivwile mwakumbulula oku nazundula livoko lyachilyo nalyeli lyachimoswe mwilu nakulishinga Ou ayoya haya myaka yosena,+ ngwenyi: “Navikatesamo hatando vatongola, najitando vatongola, nachimbwa chatando.* Vyuma vyosenevi navikaheta kumakumishilo+ omu navakalinga vanachiki lyehi ngolo javatu vaze vajila.”
8 Jino vyuma ahanjikile ngwavivwile, oloze kavyangulumbunukilileko.+ Ngocho ngwamwihwile ngwami; “Ove mwata wami, vyuma muka navikasoloka jino kusongo?”
9 Kaha angwambile ngwenyi: “Ove Ndanyele, yakonga mwomwo mazu kana vatela kuwasweka nakuwalamika katachikijilo palanga nakumakumbi akukuminyina.+
10 Vatu vavavulu navakalitomesa, kaha navakaveseka.+ Vaka-kuhuka navakalinga vyuma vyavipi, kaha naumwe wauchi mwakatachikiza mazu kana. Oloze vaze vanangakana navakawatachikiza.+
11 “Kufuma halikumbi lize navakafumisako mulimo wakuhana wana* wahakumbi hakumbi,+ navakahakako nawa chuma chakwivwisa unyengwe chakuneha kunongesa,+ namukahita makumbi 1,290.
12 “Awahilila mutu uze mwatalililanga,* uze mwakaheta kusongo yamakumbi 1,335.
13 “Oloze ove kakachila lika palanga nakusongo. Naunoka, oloze naukahinduka nakutambula chazano chove* kusongo yamakumbi kana.”+
Kwinyikila Chamwishi
^ Ulumbunwiso, “Iya Apwa Nge Kalunga?”
^ Hepe., “mwakemanyinako vana vavatu jove.”
^ Chipwe “mwakemana.”
^ Chipwe “navakaukekesa kanawa [kulumbununa, mukanda].”
^ Kulumbununa, jitando jitatu nachimbwa.
^ Chipwe “vimuna vakuvatula.”
^ Chipwe “mwavandaminanga.”
^ Chipwe “naukemana hachihela chove vakuhana.”