Ndanyele 3:1-30
-
Likombelo lyaulu lyaMwangana Nevukataneza (1-7)
-
Mwalweza vatu valemese likombelo (4-6)
-
-
VaHepeleu vatatu navavavangijikila ngwavo vanalikange (8-18)
-
“Etu tunakane kuzachila tulunga twove” (18)
-
-
Navavambila mulilungu lyakakahya (19-23)
-
Navavayovola mukakahya mujila yakukomwesa (24-27)
-
Mwangana mwalisa Kalunga kavaHepeleu (28-30)
3 Jino mwangana Nevukataneza atengele likombelo lyaulu. Likombelo kana lyasuhwile jikuvite 60,* kaha lyatohwele jikuvite 6.* Alijikile muchana chaNdula mungalila yaMbavilone.
2 Kaha Mwangana Nevukataneza atumine mazu akulweza vasatalape, navilolo, navanguvulu, navaka-kulweza mangana, navaka-kulama luheto, navaka-kuyula, navaka-kusopa milonga, navaka-kutala jingalila josena mangana vakunguluke kuchiwanyino chakukunjika likombelo lize ajikile.
3 Ngocho vasatalape, navilolo, navanguvulu, navaka-kulweza mangana, navaka-kulama luheto, navaka-kuyula, navaka-kusopa milonga, navaka-kutala jingalila josena vakungulukile kuchiwanyino chakukunjika likombelo lize ajikile Mwangana Nevukataneza. Kaha vemanyine kulutwe lwalize likombelo.
4 Muka-kuvilika avilikile nalizu lyakukanguka ngwenyi: “Ivwenu enu vatu veka naveka, nayenu vaka-mafuchi, nayenu vaka-malimi eka naeka.
5 Omu namwivwa chivumo chajineta, najipanda jakulisezaseza, natulyalya, navisaji vyamikole, navisaji vyeka vyakulisezaseza, mwatela kufukama nakulifukula kulikombelo lyaulu lize najiki Mwangana Nevukataneza.
6 Weshowo mwakana kufukama nakulifukula kulikombelo kana, navamumbila mulilungu lyakakahya hahaze vene.”+
7 Ngocho omu vatu veka naveka, navaka-mafuchi, navaka-malimi eka naeka vevwile chivumo chajineta, najipanda, natulyalya, navisaji vyamikole, navisaji vyeka vyakulisezaseza, vafukamine nakulifukula kulikombelo lyaulu lize ajikile Mwangana Nevukataneza.
8 Halwola kanelu, vaKalateya vamwe vejile nakufulilila* vaYuleya.
9 Vambile kuli Mwangana Nevukataneza ngwavo: “Ove mwangana, yoyanga haya myaka yosena.
10 Ove wahananga lushimbi ngwove weshowo mwevwa chivumo chajineta, najipanda jakulisezaseza, natulyalya, navisaji vyamikole, navisaji vyeka vyakulisezaseza, atela kufukama nakulifukula kulikombelo lyaulu.
11 Wambanga nawa ngwove weshowo mwakana kufukama nakulifukula kulikombelo kana vamumbile mulilungu lyakakahya.+
12 Oloze Shatalake, naMeshake, naAvete-nengo,+ vaYuleya vaze unatongola kupwa vaka-kutala ngalila yaMbavilone, kavakuvumbikile ove mwanganako. Vanakane kuzachila tulunga twove chipwe kulifukula kulikombelo lyaulu lize unajiki.”
13 Jino Nevukataneza akwachile matoto, kaha alwezele vatu vamunehele Shatalake, naMeshake, naAvete-nengo. Ngocho ava malunga vavanehele kumeso enyi.
14 Nevukataneza ambile kuli vakiko ngwenyi: “Kutala chamuchano vene ove Shatalake, nayove Meshake, nayove Avete-nengo munakane kuzachila tulunga twami+ nakulifukula kulikombelo lyaulu lize ngunajiki nyi?
15 Shikaho kachi nge namufukama nakulifukula kulikombelo lize ngunatenge omu namwivwa chivumo chajineta, najipanda jakulisezaseza, natulyalya, navisaji vyamikole, navisaji vyeka vyakulisezaseza, kaha namulinga kanawa. Oloze nge namukana kulifukula, kaha navamimbila mulilungu lyakakahya hahaze vene. Uno kalunga mukaze nahase kumipululula mumavoko ami?”+
16 Shatalake, naMeshake, naAvete-nengo vambile kuli mwangana ngwavo: “Ove Nevukataneza, etu katweshi namazu eka hachihande kanechiko.
17 Kachi nge navatumbila mulilungu lyakakahya, kaha Kalunga ou tweji kuzachilanga mwatuyovola mulilungu kana nakutupululula mumavoko ayove mwangana.+
18 Oloze numba nge keshi kutuyovolako, kahove mwangana tachikiza ngwove etu tunakane kuzachila tulunga twove chipwe kulifukula kulikombelo lyaulu lize unajiki.”+
19 Jino Nevukataneza apihililile naShatalake, naMeshake, naAvete-nengo, kaha avatalile nautenu.* Alwezele vatu venyese lilungu mapapa 7 kuhambakana muze valyenyeselenga makumbi osena.
20 Kaha alwezele maswalale jenyi vamwe vangolo vakase Shatalake, naMeshake, naAvete-nengo nakuvambila mulilungu lyakakahya.
21 Ava malunga vavakashile oku vanavwale vikuto vyavo, namahina avo, namatepa avo, nauvwalo wavo weka, kaha vavambilile mulilungu lyakakahya.
22 Hakuwana nge lushimbi akashile mwangana lwapwile lwalukalu, kaha nawa lilungu lyakakahya lyapwile nakwenya chikuma, ngocho malunga vaze vatwalile Shatalake, naMeshake, naAvete-nengo kulilungu vakiko vafwile namilangi yakakahya.
23 Oloze ava malunga vatatu, Shatalake, naMeshake, naAvete-nengo vaholokelele muze mulilungu oku vanavakase.
24 Jino Mwangana Nevukataneza evwile woma chikuma, kaha akatukile, ehwile vilolo jenyi ngwenyi: “Uno katwakasanga kaha malunga vatatu nakuvambila mukakahyako nyi?” Vakiko vamukumbulwile ngwavo: “Eyo twakasanga vatatu, ove mwangana.”
25 Mwangana ambile ngwenyi: “Talenu! Nguli nakumona malunga vawana vali nakulitambwojokela kwavo mukakahya. Kaveshi nakuwemako, kaha wamuchiwana ali nakusoloka nge kalunga.”
26 Nevukataneza apandamine kuchikolo chalilungu lyakakahya, kaha ambile ngwenyi: “Ove Shatalake, nayove Meshake, nayove Avete-nengo, enu vangamba jaKalunga Wakulitulaho Chikuma,+ fumenu omwo mulilungu mwizenga kuno.” Hahaze vene Shatalake, naMeshake, naAvete-nengo vafumine muze mukakahya.
27 Kaha vasatalape, navilolo, navanguvulu, navilolo jamwangana veka vaze vakungulukile kuze+ vamwene ngwavo vaze malunga+ kavawemene nakakahya kanako. Jikambu javo kajavaukile numba hahandendeko. Vikuto vyavo nawa kavyalumukileko, kaha kavapwile nakunuka wishiko.
28 Jino Nevukataneza ambile ngwenyi: “Vamwalisenga Kalunga kaShatalake, naMeshake, naAvete-nengo+ uze atumanga kangelo kenyi ezenga nakuyovola vangamba jenyi. Ava malunga vafwelelanga muli ikiye, kaha vahokolanga lushimbi lwayami mwangana nakulisuula vafwenga* mukutela kuzachila kalunga weka chipwe kulifukula kuli ikiye, kuvanga Kalunga kavo kaha.+
29 Ngocho ngunakase lushimbi ngwami veshovo vatu, chipwe vaka-mafuchi, chipwe vaka-malimi eka naeka vaze navahanjika vyuma vyavipi hali Kalunga kaShatalake, naMeshake, naAvete-nengo navavateta vipinji vipinji, kaha jizuvo javo navajitenga kupwa vimbushu* vyavatu vavavulu, mwomwo kakweshi kalunga weka nahase kuyovola vatu nge ou Kalunga kavoko.”+
30 Jino mwangana azezwile* Shatalake, naMeshake, naAvete-nengo mungalila yaMbavilone.+
Kwinyikila Chamwishi
^ Kafwe jimita 27. Tala Chihande B14.
^ Kafwe jimita 2.7. Tala Chihande B14.
^ Chipwe “nakuvangijikila.”
^ Chipwe “kaha muchima wenyi walumukile.”
^ Chipwe “nakusuula mijimba yavo.”
^ Chipwe pamo, “kwakumbilila swali; kuvishita vyatuji.”
^ Alamayi., “afukishile.”
