Ndanyele 4:1-37
4 “Awa akiko mazu ngunatumu ami Mwangana Nevukataneza kuli enu vatu veka naveka muvosena, nayenu vaka-mafuchi muvosena, nayenu vaka-malimi eka naeka muvosena, enu muli nakutwama hamavu hosena: Kuunda chipwenga nayenu.
2 Ngunawahilila kumilweza vinjikizo navyuma vyakukomwesa vize nangulingila Kalunga Wakulitulaho Chikuma.
3 Vinjikizo vyenyi vyapwa vyavinene, kaha vyuma vyakukomwesa eji kulinganga vyapwa vyangolo. Wangana wenyi wapwa wangana wahaya myaka yosena, chiyulo chenyi nawa nachipwangako hachisemunwino hichisemunwino.+
4 “Ami Nevukataneza ngwatwaminenga mukuunda muzuvo yami, kaha ngwapwile nakufukila munganda yami.
5 Jino ngwalotele chilota chize changwivwishile woma. Omu ngwasavalile hakahela kami, ngwaputukile kumona vifwanyisa navyakumwenesa vize vyanguzuzwishile.+
6 Ngocho ngwasanyikile vaka-mangana vamuMbavilone vosena mangana vezenga kuli ami vangulumbunwine chilota chami.+
7 “Kaha vapilishitu vaka-kulinga visava, navaka-kutaha, navaKalateya,* navaka-kuzachisa vatanganyika+ vejile kuli ami. Omu ngwavahichililemo chilota chami, kavahashile kungulweza ulumbunwiso wachoko.+
8 Hakukuminyina, kwejile Ndanyele uze vavulukilenga ngwavo Mbeleteshaza,+ lijina lize lyafuma kulijina lyakalunga kami.+ Ou lunga apwile nashipilitu yatulunga vajila,+ kaha ngwamulwezele chilota chami ngwami:
9 “‘Ove Mbeleteshaza, ove mukulwane wavapilishitu+ vaka-kulinga visava, ngunatachikiza ngwami ove ukwechi shipilitu yatulunga vajila,+ kaha kakweshi chuma chakusweka chize nachikukaluhwilako.+ Ngocho ngulweze vyakumwenesa vize ngwamwene muchilota chami, nomu vyalumbunukila.
10 “‘Omu ngwasavalile hakahela kami, ngwamwene vyakumwenesa. Ngwamwene mutondo+ unasoko hakachi kamavu. Mutondo kana wapwile wausuku chikuma.+
11 Wakolele nakuzama, kaha songo yawo yahetele namwilu. Wapwile nakusoloka nakusongosongo yamavu.
12 Mafwo awo apwile amwaza. Wemine mihako yayivulu, kaha wapwile navyakulya vyavosena. Tunyama vamuchipapa vapwile nakutwama mumuvule wawo, tujila vakutuka mwilu nawa vapwile nakutongama hamitango yawo, kaha vyuma vyakuyoya vyosena* vyapwile nakulya kumutondo kana.
13 “‘Omu ngwatwalileho lika kumona vyakumwenesa hakahela kami, ngwamwene muka-kutala ou wajila, ali nakwiza kufuma mwilu.+
14 Atambakanyine nalizu lyakukanguka ngwenyi: “Pakulenu ou mutondo,+ saululenu mitango yawo, hululenu mafwo awo nakusanda mihako yawo. Tunyama vaze vali mwishi yawo natujila vaze vanatongama hamitango yawo vachine.
15 Oloze sezenu chimbunji namiji yacho mumavu. Chimbunji kana chikasenu muhya wafwelu nawou waunengu nakuchiseza mumwila. Chechenu chizove nalyume, kaha chipwenga natunyama vamuchipapa navyuma vyakusoka hamavu.+
16 Muchima wacho wautu vawalumune upwenga muchima waunyama. Echenu muhite+ jitando 7.+
17 Elu lukiko lushimbi lwavaka-kutala,+ namazu vanavilika ava vajila mangana vatu vavatonyi vatachikize ngwavo ou Wakulitulaho Chikuma ikiye Muka-kuyula wangana wavatu.+ Eji kuuhananga kuli weshowo nasake, kaha eji kuswanyisangaho namutu wamokomoko chikuma.”
18 “‘Echi chikiko chilota ngwalotele ami Mwangana Nevukataneza. Shikaho ove Mbeleteshaza, ngulweze ulumbunwiso wacho mwomwo vakwenu vaka-mangana vamuwangana wami vosena vanahono kungulweza ulumbunwiso wacho.+ Oloze ove unahase mwomwo ukwechi shipilitu yatulunga vajila.’
19 “Halwola kana Ndanyele uze vavulukilenga ngwavo Mbeleteshaza+ alizuzukilile nawoma, kaha aputukile kwivwa woma hakushinganyeka hachuma kana.
“Jino mwangana ambile ngwenyi, ‘Ove Mbeleteshaza, kanda nawivwa woma echi chilota naulumbunwiso wachoko.’
“Kaha Mbeleteshaza ambile ngwenyi, ‘Ove mwata wami, vyuma unaloto muchilota chove visolokele vaze vakuhunga, kaha ulumbunwiso wacho nawa upandame kuli vaka-kole jove.
20 “‘Mutondo uze wamwene uze wakolele nakuzama, uze ukwechi songo yawo yahetele namwilu, uze nawa wapwile nakusoloka nakusongosongo yamavu,+
21 uze wapwile namafwo amwaza, namihako yayivulu, navyakulya vyavosena, uze wahanyine muvule tunyama vamuchipapa, uze nawa ukwechi mitango hatongamine tujila vakutuka mwilu,+
22 unapu yove mwangana, mwomwo unatoho nakuzama, kaha unene wove unahete namwilu.+ Chiyulo chove nawa chinahete nakusongosongo yamavu.+
23 “‘Jino ove mwangana wamwene muka-kutala ou wajila,+ ali nakwiza kufuma mwilu. Kaha ambile ngwenyi: “Pakulenu ou mutondo, unongesenu. Oloze sezenu chimbunji namiji yacho mumavu. Chimbunji kana chikasenu muhya wafwelu nawou waunengu nakuchiseza mumwila wamuchipapa. Chechenu chizove nalyume, kaha chipwenga natunyama vamuchipapa palanga nomu namuhita jitando 7.”+
24 Ove mwangana, ou ukiko ulumbunwiso, kahevi vikiko navikusolokela ove mwata wami mwangana nge kutesa nomu nakase ou Wakulitulaho Chikuma.
25 Navakufumisa muli vatu, kaha naupwanga natunyama vamuchipapa. Naulyanga mwila nge vangombe, nauzovanga nalyume.+ Namuhita+ jitando 7+ palanga nomu naukatachikiza ngwove ou Wakulitulaho Chikuma ikiye Muka-kuyula wangana wavatu. Kaha eji kuuhananga kuli weshowo nasake.+
26 “‘Oloze hakuwana nge vambile ngwavo sezenu chimbunji chamutondo kana namiji yacho,+ ngocho wangana wove navakakukindulwishilawo omu naukatachikiza ngwove Kalunga ali nakuyula mwilu.
27 Shikaho ove mwangana, ivwilila vyuma nangukulweza. Seza jishili jove, linga vyuma vyakwoloka. Litwamine kuhengesa chiyulo, tetela vaka-kuhutwa. Nge naulinga ngocho, kaha pamo naufukilanga myaka yayivulu.’”+
28 Vyuma vyosenevi vyamusolokelele Mwangana Nevukataneza.
29 Omu mwahichile tukweji 12, likumbi limwe Mwangana Nevukataneza apwile nakutambuka helu lyazuvo yenyi muMbavilone.
30 Ambile ngwenyi: “Eyi ikiko Mbavilone Yayinene, eyi ngunatungu nangolo jami jajinene mangana yipwenga zuvo yawangana yize nayisolola ukelenga wami wakukomwesa.”
31 Jino shimbu apwile nakuhanjika mazu awa, mwilu mwafumine lizu ngwalyo: “Ivwilila ove Mwangana Nevukataneza, ‘Wangana vanakutambulawo,+
32 kaha navakufumisa muli vatu. Naupwanga natunyama vamuchipapa, naulyanga mwila nge vangombe. Namuhita jitando 7 palanga nomu naukatachikiza ngwove ou Wakulitulaho Chikuma ikiye Muka-kuyula wangana wavatu. Kaha eji kuuhananga kuli weshowo nasake.’”+
33 Hahaze vene, mazu aze vahanjikile hali Nevukataneza ateselemo. Vamufumishile muli vatu, kaha aputukile kulya mwila nge vangombe. Mujimba wenyi wazovelenga nalyume, jikambu jenyi jasuwile nge mangona angonga, kaha vyala vyenyi vyasuhwile nge vyala vyakajila.+
34 “Omu akumine makumbi kana,+ ami Nevukataneza ngwatalile mwilu, kaha ngwaputukile jino kushinganyeka kanawa. Ngocho ngwalishile ou Wakulitulaho Chikuma. Ngwalishile Ou ayoya haya myaka yosena nakumutohwesa mwomwo chiyulo chenyi chapwa chiyulo chahaya myaka yosena, kaha wangana wenyi naupwangako hachisemunwino hichisemunwino.+
35 Vaka-mavu avamona kupwa vamokomoko, kaha eji kulinganga mweshomwo nasake kumayongomena amwilu nakuvatu vahamavu. Naumwe wauchi nahase kumuhonesa+ chipwe kumuhulisa ngwenyi: ‘Ika unalingila chuma kana?’+
36 “Halwola kana ngwaputukile kushinganyeka kanawa, kaha vangukindulwishilile wangana wami, nawata wami, naukelenga wami.+ Vilolo jami navatu jami vavalemu vangutondeletondele chikuma. Vangukindulwishile hawangana wami, kaha vanguhakilileko ulemu.
37 “Ami Nevukataneza nangwalisa Mwangana wamwilu,+ nangumuzezula nakumutohwesa mwomwo milimo yenyi yosena yapwa yamuchano, jijila jenyi nawa japwa jakwoloka.+ Eji kwinyisanga vaka-kulivwimba.”+
Kwinyikila Chamwishi
^ Kulumbununa, lizavu lyavaka-kutaha navaka-kuzachisa vatanganyika vakukuluka malambu.
^ Alamayi., “vikwechi mijimba vyosena.”
