Ndanyele 5:1-31
5 Jino likumbi limwe, Mwangana Mbeleshaza+ alingilile vatu jenyi vavalemu 1,000 chiwanyino chakulya nakunwa. Kaha atwamine kumeso avo oku ali nakunwa vinyo.+
2 Omu Mbeleshaza apendele, alwezele vatu vayenga vakasake jipasa jaulu napalata jize akambachile ise* Nevukataneza mutembele kuYelusalema.+ Avatumine vakasake jipasa kana mangana anwinemo navatu jenyi vavalemu, natulumbu twenyi twamasano, namapwevo jenyi veka.
3 Ngocho vanehele jize jipasa jaulu vakambachile muzuvo yaKalunga kuYelusalema. Kaha mwangana, navatu jenyi vavalemu, natulumbu twenyi twamasano, namapwevo jenyi veka vaputukile kunwinamo.
4 Vanwine vinyo, kaha vaputukile kwalisa tulunga vaulu napalata, navava vaunengu, nafwelu, namitondo, namalolwa.
5 Hahaze vene, kwasolokele minwe yalivoko lyamutu, kaha yaputukile kusoneka hambango yazuvo yamwangana, kwakulitalasana nachitumbikilo chalinongo. Hambango kana hapwile hakusalimba. Mwangana apwile nakumona chikamba chalivoko lize lyapwile nakusoneka.
6 Ngocho mwangana ahombele nakulizuzukila hakushinganyeka chuma kana, kaha jitungi jenyi+ namambuli enyi vyaputukile kundenda.
7 Mwangana atambakanyine mangana vamusanyikile vaka-kutaha, navaKalateya,* navaka-kuzachisa vatanganyika.+ Ambile kuli vaka-mangana vamuMbavilone ngwenyi: “Weshowo mwatanga awa mazu vanasoneka nakungulweza ulumbunwiso wamazu kana, navamuvwika lihina lyaungonyi, nalilenge lyaulu mushingo yenyi.+ Kaha mwapwa muka-kuyula wamuchitatu muwangana wami.”+
8 Jino vatu jamwangana vaka-mangana vosena vejile, oloze kavahashile kutanga mazu aze vasonekele chipwe kuwalumbunwina mwanganako.+
9 Ngocho Mwangana Mbeleshaza alizuzukilile chikuma, ahombele kumeso, kaha navatu jenyi vavalemu valikomokelele.+
10 Omu naye yamwangana* evwile mazu amwangana navatu jenyi vavalemu, engilile muze muzuvo vapwile nakulingila chiwanyino chakulya nakunwa. Ambile ngwenyi: “Ove mwangana, yoyanga haya myaka yosena. Kanda naulizuzukila havyuma kana chipwe kuhomba kumesoko.
11 Muwangana wove muli lunga umwe* uze atwama nashipilitu yatulunga vajila. Mumakumbi aiso, lunga kana apwile nauhashi wakutachikiza vyuma, wakunangakana, kaha nawa apwile namangana nge aze atulunga.+ Shikaho iso, Mwangana Nevukataneza amutongwele kupwa mukulwane wavapilishitu vaka-kulinga visava, navaka-kutaha, navaKalateya,* navaka-kuzachisa vatanganyika.+ Ove mwangana, evi vikiko alingile iso
12 mwomwo Ndanyele uze valukile kuli mwangana ngwavo Mbeleteshaza+ apwile nashipilitu yakukomwesa, nachinyingi, namangana akulumbununa vilota, natushimutwiji, nakukasununa vihande vyavikalu.*+ Shikaho sanyika Ndanyele, kaha mwakulweza ulumbunwiso wamazu awa.”
13 Ngocho vanehele Ndanyele kumeso amwangana, kaha amuhulishile ngwenyi: “Ove yove Ndanyele wahali vafunge+ vaze anehele tata mwangana kufuma kuYuta+ nyi?
14 Ngunevu ngwavo ukwechi shipilitu yatulunga, nauhashi wakutachikiza vyuma,+ uwakunangakana, kaha nawa ukwechi mangana akukomwesa.+
15 Tala, vangunehelanga vaka-mangana, navaka-kutaha mangana vatange mazu awa vanasoneka nakungulumbunwinawo, oloze vanahono kungulweza ulumbunwiso wamazu awa.+
16 Oloze ngunevu ngwavo ove unahase kulumbununa vyuma+ nakukasununa vihande vyavikalu.* Shikaho kachi nge nautanga awa mazu vanasoneka nakungulweza ulumbunwiso wamazu kana, kaha navakuvwika lihina lyaungonyi, nalilenge lyaulu mushingo yove. Naupwa nawa umuka-kuyula wamuchitatu muwangana wami.”+
17 Jino Ndanyele ambile kuli mwangana ngwenyi: “Tulika tuhu mawana ove, chipwe ahane vatu veka. Ami nangukutangila ove mwangana mazu awa vanasoneka nakukulweza ulumbunwiso wamazu kana.
18 Ove mwangana, Kalunga Wakulitulaho Chikuma ahanyine iso Nevukataneza wangana, naunene, naulemu, naukelenga.+
19 Vatu veka naveka vosena, navaka-mafuchi vosena, navaka-malimi eka naeka vosena vamwivwilenga woma mwomwo yaunene uze amuhanyine Kalunga.+ Ajihilenga weshowo asakilenga kujiha, kaha ayowelenga weshowo asakilenga kuyovola. Azezwilenga weshowo asakilenga kuzezula, kaha enyishilenga weshowo asakilenga kwinyisa.+
20 Oloze omu aputukile kulivwimba nakunjinjavala, nakupwa namuchima wakazamuzamu,+ vamukatumwine halitanda lyenyi lyawangana nakumutambula ulemu.
21 Vamufumishile muli vatu, kaha muchima wenyi vawalumwine kupwa waunyama. Atwaminenga navimbulu vamuchipapa, alilenga mwila nge vangombe, mujimba wenyi wazovelenga nalyume, palanga nomu atachikijile ngwenyi ou Wakulitulaho Chikuma ikiye Muka-kuyula wangana wavatu. Kaha eji kuuhananga kuli weshowo nasake.+
22 “Oloze ove mwanenyi* Mbeleshaza kawalinyishileko numba tuhu unatachikiza vyuma vyosenevi.
23 Unalitohwesa kumeso aMwata wamwilu,+ kaha watumanga vatu vakunehele jipasa jamuzuvo yenyi.+ Kufumaho, wanwinangamo vinyo navatu jove vavalemu, natulumbu twove twamasano, namapwevo jove veka, kaha wapwanga nakwalisa tulunga vaulu napalata, navava vaunengu, nafwelu, namitondo, namalolwa. Tulunga kana kaveshi kumona, chipwe kwivwa, chipwe kutachikiza chuma numba chimweko.+ Kawatohwesele Kalunga uze akuhana kuyoya,+ uze nawa atachikiza jijila joveko.
24 Shikaho atumanga livoko lize lyasonekanga awa mazu.+
25 Awa akiko mazu vasonekanga: MENE, MENE, TEKELE, naPALASHINE.
26 “Ou ukiko ulumbunwiso wamazu awa. Lizu MENE lyalumbununa nge Kalunga nalave makumbi awangana wove, kaha naukumisa.+
27 “Lizu TEKELE lyalumbununa nge vanakupezalisa lyehi hachipezaliso, kaha vanakuwane nge unakuminamo.
28 “Lizu PELESE lyalumbununa nge wangana wove vanaupulu hakachi, kaha vanauhane kuli vaMete navaPeleja.”+
29 Jino Mbeleshaza alwezele vatu vavwike Ndanyele lihina lyaungonyi nalilenge lyaulu mushingo yenyi. Kaha vavilikile ngwavo mwakapwa muka-kuyula wamuchitatu muwangana.+
30 Jino haufuku vene uze, Mbeleshaza mwangana wavaKalateya vamujihile.+
31 Kaha Ndaliu+ kaMete ashishile hawangana. Apwile namyaka yakusemuka kafwe 62.
Kwinyikila Chamwishi
^ Chipwe “kaka yenyi.”
^ Kulumbununa, lizavu lyavaka-kutaha navaka-kuzachisa vatanganyika vakukuluka malambu.
^ Alamayi., “Omu mwangana wapwevo.”
^ Chipwe “muli chingazule chalunga.”
^ Kulumbununa, lizavu lyavaka-kutaha navaka-kuzachisa vatanganyika vakukuluka malambu.
^ Alamayi., “nakukasununa mahunda.”
^ Alamayi., “nakukasununa mahunda.”
^ Chipwe “muzukulyenyi.”
