Ndanyele 6:1-28
6 Ndaliu achimwene kupwa chamwaza kutongola vasatalape 120 mangana vatalenga vyuma muwangana wenyi wosena.+
2 Atongwele nawa vilolo vatatu mangana vatalenga ava vasatalape.+ Kaha Ndanyele+ apwile hali ava vilolo vatatu. Ngocho vasatalape valwezelenga ava vilolo vyuma vyosena vyalingiwilenga mangana mwangana azeneke kuvindama.
3 Jino Ndanyele apwile wakulindunuka kuhambakana vakwavo vilolo navasatalape, mwomwo apwile nashipilitu yakulipwila.+ Ngocho mwangana ajinyine kumuzezula muwangana wenyi wosena.
4 Halwola kana, vilolo navasatalape vaputukile kutondelatondela Ndanyele katenga kupandama kuvyuma vyalifuchi.* Oloze kavahashile kumuwanyina katenga chipwe mulongako, mwomwo apwile wakushishika. Kapwile nakanengauli chipwe navilinga vyakuhengako.
5 Jino ava malunga vambile ngwavo: “Katweshi kuhasa kuwanyina Ndanyele katenga hachuma numba chimweko, kuvanga hachuma chakupandama kujishimbi jaKalunga kenyi kaha.”+
6 Ngocho ava vilolo navasatalape valikungulwile nakuya kuli mwangana. Vambile kuli ikiye ngwavo: “Ove Mwangana Ndaliu, yoyanga haya myaka yosena.
7 Vangambela jamwangana vosena, navilolo vosena, navasatalape vosena, navaka-kulweza mangana vosena, navanguvulu vosena vanatwame punga ngwavo ove mwangana ukase lushimbi lwakukanyisa vatu kulomba kuli kalunga chipwe kuli mutu hamakumbi 30, kuvanga kuli ove mwangana kaha. Weshowo mwahokola lushimbi kana vamumbile muwina wavandumba.+
8 Shikaho ove mwangana kasa lushimbi nakusonekako lijina lyove+ mangana vazeneke kulwalumuna, nge kutesa najishimbi javaMete navaPeleja jize kavalumunako.”+
9 Ngocho Mwangana Ndaliu asonekele lijina lyenyi kulushimbi elu lwakukanyisa vatu.
10 Omu Ndanyele atachikijile ngwenyi mwangana nasoneka lyehi lijina kulushimbi kana, ayile muzuvo yenyi mukapete kahelu kaze kapwile najinjanena jakusokolola. Jinjanena kana jatalishile kuYelusalema.+ Kaha afukaminenga katatu halikumbi nakulomba kuli Kalunga kenyi nakumwalisa nge muze alingilenga lwola lwosena shimbu kanda vakase lushimbi kana.
11 Jino vaze malunga vosena vengilile muze mukapete, kaha vawanyine Ndanyele ali nakulomba kuli Kalunga kenyi nakumulembelela amwivwile uselewa.
12 Kufumaho vayile kuli mwangana mangana vakamwanukise lushimbi luze akashile. Vamuhulishile ngwavo: “Uno kawasonekanga lijina lyove kulushimbi lwakukanyisa vatu kulomba kuli kalunga chipwe kuli mutu hamakumbi 30, kuvanga kuli ove mwangana kaha, nakwamba ngwove weshowo mwahokola lushimbi kana vamumbile muwina wavandumbako nyi?” Mwangana avakumbulwile ngwenyi: “Lushimbi kana lwakukasa lyehi, nge kutesa najishimbi javaMete navaPeleja jize kavalumunako.”+
13 Hahaze vene vambile kuli mwangana ngwavo: “Ndanyele wahali vafunge vakuYuta,+ kakuvumbikile ove mwanganako, chipwe kumona lushimbi elu unasoneka lijina lyove kupwa lwalulemuko. Ali nakulombanga katatu halikumbi kuli Kalunga kenyi.”+
14 Omu mwangana evwile mazu kana, ahombele chikuma, kaha atondeletondele jila yakuyowelamo Ndanyele. Akilikichile palanga nomu lyatokele likumbi mangana ngwenyi amulwile.
15 Kutwala muze, vaze malunga valikungulwile nakuya kuli mwangana, vambile kuli ikiye ngwavo: “Ove mwangana, tachikiza ngwove jishimbi javaMete navaPeleja javuluka nge lwesholwo lushimbi mwakasa mwangana kavatela kulwalumunako.”+
16 Ngocho mwangana alwezele vatu vakakwate Ndanyele. Kahomu vamunehele, vamumbilile muwina wavandumba.+ Jino mwangana ambile kuli Ndanyele ngwenyi: “Kalunga kove, ou weji kuzachilanga lwola lwosena mwakupululula.”
17 Kaha vanehele lilolwa, valifwikile kukanwa kauze wina. Mwangana alamikile kazeya kenyi kakatachikijilo natuzeya twavatu jenyi vavalemu kulilolwa kana mangana vazeneke kwalumuna chuma chimwe kutalisa kuli Ndanyele.
18 Kufumaho mwangana ayile kuzuvo yenyi. Ufuku wosena kalile vyakulyako, akanyine kumwimbila myaso,* kaha kasavalile tuloko.*
19 Lichako, mwangana amenekele muze pulundundu, alahilile kuze kuwina wavandumba.
20 Omu apandamine kuze kuwina, asanyikile Ndanyele nalizu lyakulinyenga ngwenyi: “Ove Ndanyele, ove ngamba yaKalunga ou ayoya, uno Kalunga kove ou weji kuzachilanga lwola lwosena nakupululula kuvandumba nyi?”
21 Hahaze vene, Ndanyele ambile kuli mwangana ngwenyi: “Ove mwangana, yoyanga haya myaka yosena.
22 Kalunga kami atumanga kangelo kenyi, kaha asokanga kutunwa twavandumba.+ Ngocho kavangulemekeleko+ mwomwo kangweshi namulonga kuli ikiyeko, kaha nawa kangwapihishile chuma numba chimwe kuli ove mwanganako.”
23 Jino mwangana awahililile chikuma, kaha alwezele vatu vafumise Ndanyele muze muwina. Omu vamufumishile muze muwina, vawanyine nge kalemanyineko mwomwo afwelelele Kalunga kenyi.+
24 Jino mwangana alwezele vatu vamunehele malunga vaze vahanyine Ndanyele mulonga.* Kahomu vavanehele, vavambilile muwina wavandumba hohamwe navana vavo namapwevo javo. Vandumba vavakwilile, kaha vawondele vifuwa vyavo shimbu kanda vahete nahamashima awina.+
25 Kaha Mwangana Ndaliu asonekelele vatu veka naveka vosena, navaka-mafuchi vosena, navaka-malimi eka naeka vosena vahamavu+ ngwenyi: “Kuunda chipwenga nayenu.
26 Ngunahane lushimbi ngwami vatu muwangana wami wosena vevwenganga Kalunga kaNdanyele woma,+ mwomwo apwa Kalunga ou ayoya, kaha nawa kwatwama haya myaka yosena. Wangana wenyi kaveshi kukaunongesako, chiyulo* chenyi nawa nachipwangako haya myaka yosena.+
27 Eji kupulululanga nakulwila,+ eji kulinganga vinjikizo navyuma vyakukomwesa mwilu nahano hamavu.+ Napululula Ndanyele kumazo avandumba.”*
28 Ngocho Ndanyele afukililenga muwangana waNdaliu+ namuwangana waKuluse kaPeleja.+
Kwinyikila Chamwishi
^ Alamayi., “vyawangana.”
^ Chipwe pamo, “kavamunehelele vaka-kwimba myasoko.”
^ Alamayi., “kaha tulo twenyi twamuchinyine.”
^ Chipwe “vavangijikilile Ndanyele.”
^ Chipwe “wata.”
^ Chipwe “Napululula Ndanyele kuvyala vyavandumba.”
