Ndanyele 8:1-27
8 Mumwaka wamuchitatu wachiyulo chaMwangana Mbeleshaza,+ ami Ndanyele ngwamwene chakumwenesa chikwavo kufuma hali chize ngwamwene hakavanga.+
2 Muchakumwenesa kana ngwamwene nguli muzuvo yakukola* muShushane*+ yize yapwile mungalila yaElame.+ Kahomu ngwatwalileho lika kumona chakumwenesa kana, ngwakasumukile nguli kumuhongi waUlai.
3 Omu ngwandwile meso, ngwamwene chizamba chamukoko+ nemana kungenge yamuhongi kana. Ou chizamba chamukoko apwile najimbinga jivali jajisuku,+ oloze lumbinga lumwe lwapwile lwalusuku kuhambakana lumbinga lukwavo. Elu lwalusuku chikuma lukiko lwakotokelele kusoka.+
4 Ngwamwene uze chizamba mwamyaza jimbinga kumulauko, nakunote, nakusulo, kaha kakwapwile kanyama umwe wamuchipapa ahashile kwimana kumeso enyiko. Kakwapwile umwe ahashile kupululula chuma chimwe kuli ikiyeko.+ Alingilenga vyeshovyo asakilenga, kaha alitohweselenga.
5 Omu ngwatwalileho kutala, ngwamwene chizamba chapembe+ mwafuminyina kumulauko, ali nakutambuka mupeho helu lyamavu chakuzeneka kulyata hamavu. Pembe kana apwile nalumbinga lwalunene mukachi kameso enyi.+
6 Apwile nakwiza kuli chizamba chamukoko uze apwile najimbinga jivali, uze emanyine kungenge yamuhongi. Ou chizamba chapembe apwile nakulaha nautenu nakwiza kuli uze chizamba chamukoko.
7 Ngwamwene uze chizamba chapembe mwapandama kuli uze chizamba chamukoko, apwile nautenu chikuma. Avetele uze chizamba chamukoko nakumuhokola jimbinga jivali, kaha uze chizamba chamukoko kapwile cheka nangolo jakwimanako. Amulimbwilile hamavu nakumulyatangila, kaha kakwapwile umwe ahashile kumupululula kuli ikiyeko.
8 Kufumaho uze chizamba chapembe alitohwesele chikuma. Oloze omu alingile nakwate lyehi ngolo, luze lumbinga lwalunene valuhokwele. Asokele jimbinga jiwana jajinene jize jashishile muli luze lumbinga, kaha jatalishile kumitamba* yamavu yiwana.+
9 Mulumbinga lumwe hali jize jimbinga jiwana mwasokele lumbinga lukwavo lwalundende, kaha lwasuhwile chikuma nakutalisa kusulo, nakumututuko, nakuLifuchi Lyamwaza.+
10 Lumbinga kana lwasuhwile nakuheta kuliyongomena lyamwilu. Lwaholwelele vamwe vahaliyongomena kana navatanganyika vamwe hamavu, kaha lwavalyatangilile.
11 Lwalitohwesele kumeso aMwata waliyongomena, kaha lwamutambwile wana* uze vahanyinenga hakumbi hakumbi. Chihela chenyi chajila nawa chize azamishile vachishiwile.+
12 Lize liyongomena nauze wana* vahanyinenga hakumbi hakumbi vavihanyine kuli luze lumbinga mwomwo yamilonga yakuzombwojoka jishimbi. Kaha luze lumbinga lwambililenga muchano hamavu. Lwazachile nangolo, ngocho lwafukilile.
13 Jino ngwevwile muka-kujila umwe ali nakuhanjika, kaha ngwevwile nawa muka-kujila mukwavo mwahulisa uze apwile nakuhanjika ngwenyi: “Uno echi chakumwenesa chawana* wakuhana hakumbi hakumbi namilonga yakuzombwojoka jishimbi yize yinanehe kunongesa nachitwalaho+ palanga nakumwaka uka? Uno chihela chajila naliyongomena navavilyatangila palanga nakumwaka uka?”
14 Ikiye angukumbulwile ngwenyi: “Namuhita makumbi* 2,300, kaha chihela chajila navakachiwahisa cheka chikapwe nge muze chapwile hakavanga.”
15 Omu ami Ndanyele ngwapwile nakutala echi chakumwenesa nakufwila kachi chingulumbunukile, ngwakasumukile kulutwe lwami kunemana umwe wakufwana nge mutu.
16 Jino ngwevwile lizu lyamutu nalifuminyina mumuhongi waUlai+ ngwalyo: “Ove Ngavalyele,+ mulumbunwine owo mutu vyuma amonanga.”+
17 Ngocho Ngavalyele apandamine kuze ngwemanyine. Oloze omu apandamine hakamwihi, ngwevwile woma, kaha ngwafukamine chameso hamavu. Jino ambile kuli ami ngwenyi: “Ove mwanamutu, tachikiza ngwove echi chakumwenesa nachikatesamo kumakumbi akukuminyina.”+
18 Oloze shimbu apwile nakuhanjika nayami, ngwaulumanyine nakuya mutulo. Kaha angukwachile, angwimikile haze ngwemanyine.+
19 Ambile kuli ami ngwenyi: “Nangukulweza vyuma navikasoloka kusongo yamakumbi autenu waKalunga, mwomwo echi chakumwenesa nachikatesamo halwola vatongola lwakukuminyina.+
20 “Uze chizamba chamukoko wajimbinga jivali wamonanga nemanyinako mwangana waMete nayou waPeleja.+
21 Uze chizamba chapembe wamangona amavulu nemanyinako mwangana waHelase.+ Kaha lumbinga lwalunene luze lwapwanga mukachi kameso enyi lunemanyinako mwangana wakulivanga.+
22 Jize jimbinga jiwana jasokanga jize jashisanga mulumbinga luze lwahokokanga+ jinemanyinako mawangana awana aze nawakakatuka mulifuchi lyenyi. Oloze mawangana kana kaweshi kukapwa nangolo nge wangana wenyiko.
23 “Kaha kusongo yawangana wavo, omu nayikayangilila milonga yavaka-kuzombwojoka jishimbi, nakukakatuka mwangana wakwivwisa woma uze atachikiza mwalumbunukila vyuma vyakujiminyina.
24 Mwakapwa nangolo chikuma, oloze ngolo kana kajeshi kukafuma kuli iveneko. Mwakanongesa vyuma mujila yakukomwesa, kaha mwakafukila muvyuma vyosena mwakalinganga. Mwakanongesa vindume navaze vajila.+
25 Mwakafukila mwomwo yakulunguluka chenyi nakutangisa. Mwakalitohwesa mumuchima wenyi, kaha mwakanongesa vavavulu halwola lwakuunda.* Mwakemanyina Mwata wavamyata nakole, oloze navakamuhokola. Kaveshi kukamuhokola namavoko amutuko.
26 “Vyuma vize vakulwezanga muchakumwenesa kutalisa kumakumbi vavulukanga vinapu vyamuchano. Oloze usweka vyuma wamonanga muchakumwenesa, mwomwo navikasoloka kumakumbi akulutwe chikuma.”+
27 Jino ami Ndanyele ngwazeyele, kaha ngwavijile hamakumbi amavulu.+ Kutwala muze, ngwahindukile nakuputuka kuzata milimo yamwangana.+ Oloze ngwalikomokelele chikuma havyuma ngwamwene, kaha kakwapwile mutu atachikijile ulumbunwiso wavyoko.+
Kwinyikila Chamwishi
^ Chipwe “munganda yamwangana; muchihela chakukola.”
^ Chipwe “muSusa.”
^ Hepe., “kujipeho.”
^ Chipwe “vimuna vakuvatula.”
^ Chipwe “navaze vimuna vakuvatula.”
^ Chipwe “chavimuna vakuvatula.”
^ Hepe., “Namuhita vingoloshi navimene.”
^ Chipwe pamo, “mwakanongesa vavavulu chakuzeneka kuvahuhumuna.”
