Ndanyele 9:1-27
9 Mumwaka wakulivanga wachiyulo chaNdaliu+ mwanaAhaswelu, uze apwile wakutanga yavaMete, uze nawa vaswanyishile hawangana wavaKalateya,+
2 mumwaka wakulivanga wachiyulo chenyi, ami Ndanyele ngwatangile mikanda,* kaha ngwatachikijile ngwami Yelusalema+ nayikasala ngundu hamyaka 70+ kweseka nomu Yehova alwezele kapolofweto Yelemiya.
3 Ngocho ngwandwile meso nakutala kuli Yehova Kalunga wamuchano. Ngwamulembelelele, ngwalijilikile kulya,+ ngwavwalile vikeleyi nakulishikila uto.
4 Ngwalombele kuli Yehova Kalunga kami nakulitavila jishili jetu ngwami:
“Ove Yehova Kalunga wamuchano, ove Kalunga wamunene wakwivwisa woma, ove weji kulamanga lushiko lwove nakusolola zangi yakwilila+ kuli vaze vakuzanga nakulama jishimbi jove,+
5 tunalingi shili, tunavulumuna, tunalingi vyuma vyavipi, kaha nawa tunalikange.+ Tunaseze jishimbi jove namazu ove akuyula.
6 Katwevwililile vangamba jove vapolofweto+ vaze vahanjikilenga mulijina lyove kuli vamyangana jetu, nakuli vilolo jetu, nakuli vakakuluka jetu, nakuli vatu vosena vamulifuchi lyetuko.
7 Ove Yehova, ove wapwa uwakwoloka, oloze etu sonyi yinatukwate* nge omu chili oholyapwa. Sonyi yinakwate vatu vamuYuta, navatu vamuYelusalema, navaIsalele vosena vaze vali kwakamwihi navaze vali kwakusuku, vaze unamwangila kumafuchi osena mwomwo yakuhona kushishika kuli ove.+
8 “Ove Yehova, sonyi yinatukwate* navamyangana jetu, navilolo jetu, navakakuluka jetu mwomwo tunalingi shili kuli ove.
9 Ove Yehova Kalunga ketu, ove wapwa umuka-kutetela,+ umuka-kukonekela, oloze etu tunalikange kuli ove.+
10 Katwononokele mulizu lyayove Yehova Kalunga ketuko. Katwakavangijile jishimbi jove jize watuhanyine kuhichila muli vangamba jove vapolofwetoko.+
11 VaIsalele vosena vanahokola Jishimbi jove nakupyapumuka. Kavononokele mulizu lyoveko, ngocho unatumwenesa vyangu namashingo vasoneka muJishimbi jaMose ngamba yayove Kalunga wamuchano,+ mwomwo tunalingi shili kuli ove.
12 Unalingi vyuma vize wahanjikile hali etu nahali vatwamina jetu* vaze vatuyulilenga,+ kaha unatunehela lupi lwalunene. Lupi luze lunasolokela Yelusalema+ kanda lusolokengaho lyehi mwishi yamelu mwosenako.
13 Lupi lwosenelu lunatuwane+ nge omu vasoneka muJishimbi jaMose. Oloze katwakulembelelele ove Yehova Kalunga ketu utwivwile uselewako. Katwasezele jishili jetu,+ katwanyingililile kushishika* choveko.
14 “Ngocho ove Yehova watalilenga, kaha watunehelele lupi, mwomwo ove Yehova Kalunga ketu wapwa uwakwoloka muvyuma vyosena weji kulinganga. Oloze etu katwononokele mulizu lyoveko.+
15 “Ove Yehova Kalunga ketu, ove walowele vatu jove mulifuchi lyaEjipitu nalivoko lyangolo,+ ove unalifumakanyisa palanga nakulelo lino,+ etu tunalingi shili, tunalingi vyuma vyavipi.
16 Ove Yehova, peula utenu wove nakulundundu yove hanganda yaYelusalema, pili yove yajila. Linga ngocho mwomwo yavilinga vyove vyakwoloka.+ Yelusalema nayetu vatu jove vali nakututoleka kuvatu vosena vaze vatujingilika mwomwo yajishili jetu nakuhenga chavakakuluka jetu.+
17 Shikaho ove Kalunga ketu, ivwilila kukulomba nakukulembelela chayami ngamba yove. Ivwila uselewa chihela chove chajila+ chize chinasale ngundu.+ Linga ngocho mwomwo yalijina lyove, ove Yehova.
18 Ove Kalunga kami, tengeleka matwitwi ove wivwilile. Tona umone vihuli vyetu nanganda yize vavulukila lijina lyove. Katweshi nakukulembelela mwomwo ngwetu twapwa tuvaka-kwolokako, nduma. Oloze tuli nakukulembelela mwomwo yakeke yove yayinene.+
19 Ove Yehova, ivwilila. Ove Yehova, tukonekele.+ Ove Yehova, tengeleka matwitwi ove nakulingaho chuma chimwe. Ove Kalunga kami, kanda naulangisako mwomwo yalijina lyove, nanganda yove navatu jove vaze vavulukila lijina lyove.”+
20 Shimbu ngwapwile nakuhanjika, nakulomba, nakulitavila jishili jami najishili javatu jami vaIsalele nakulembelela Yehova Kalunga kami evwile uselewa pili yenyi yajila,+
21 shimbu ngwapwile nakulomba, Ngavalyele+ uze ngwamwene hakavanga muchakumwenesa ejile kuli ami omu ngwalingile ngunazeye chikuma.+ Ejile kuli ami nachingoloshi halwola vahanyinenga mawana.
22 Angukafwile ngutachikize vyuma, ambile ngwenyi:
“Ove Ndanyele, nguneza jino ngukuhane mangana nauhashi wakutachikiza vyuma.
23 Omu waputukanga kulembelela, ngwatambulanga mujimbu, kaha nguneza nakukwambulilawo mwomwo ove uwamulemu chikuma.*+ Shikaho nyingilila chihande echi nakumona munalumbunukila chakumwenesa.
24 “Vatu jove nanganda yove yajila+ vanavatongwela vyalumingo* 70 mangana milonga yakuzombwojoka jishimbi vayijimbangane, nakukumisa jishili,+ nakulinga chakufwika hashili,+ nakuneha kwoloka chahaya myaka yosena,+ nakulamika katachikijilo kuchakumwenesa nakuupolofweto,*+ nakuwavisa muze Mwajila Chikuma.
25 Tachikiza nakunyingilila ngwove kufuma halwola lwakuhanjika mazu akuwahisa nakutungulula Yelusalema+ palanga nomu mwakasoloka Twamina+ Meshiya,*+ namukahita vyalumingo 7, navyalumingo 62.+ Yelusalema navakayiwahisa nakuyitungulula, kaha nayikapwa nachihela chasanga nakapila kakanene, oloze navakayiwahisa nakuyitungulula mulwola lwavihuli.
26 “Oloze omu navikakuma vize vyalumingo 62, Meshiya navakamujiha,+ keshi kukasala nachuma numba chimweko.+
“Kaha vatu jatwamina uze ali nakwiza, navakanongesa nganda nachihela chajila.+ Navakachinongesa nalivaji. Nakukapwanga lika jita palanga nakusongo. Vanajinyi kuchinongesa ndolokoto.+
27 “Mwakalingisa lushiko lukazate hachalumingo chimwe mwomwo yavatu vavavulu. Kaha kuheta hakachi kachalumingo kana, mwakafumisako mulimo wakuhana vimuna vakuvatula namawana eka.+
“Kaha muka-kunongesa+ mwakatambukila halivava lyavyuma vyaunyengwe. Vyuma vanajinyi navikasolokela ou nasale ngundu palanga nomu navakamunongesa ndolokoto.”
Kwinyikila Chamwishi
^ Kulumbununa, mikanda yajila.
^ Hepe., “oloze kumeso etu kuli sonyi.”
^ Hepe., “kumeso etu kuli sonyi.”
^ Hepe., “nahali vaka-kutuyula.”
^ Chipwe “muchano.”
^ Chipwe “uwamwaza chikuma.”
^ Hepe., “nakapolofweto.”
^ Kulumbununa, vyalumingo vyamyaka.
^ Chipwe “Ou Vawavisa.”